မဲခေါင်၊ ဇွန် ၁၅
ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်မှ စစ်ကောင်စီလက်ပါးစေ ပျူစောထီးအဖွဲ့ခေါင်းဆောင်တစ်ဦး ယနေ့၊ နံနက်ပိုင်းအချိန်က သေနတ်ဖြင့် ပစ်ခတ်ခံခဲ့ရကြောင်း ဒေသခံပြည်သူ့ကာကွယ်ရေးတပ်ဖွဲ့သတင်းရင်းမြစ်များထံမှ သိရသည်။
ရွာငံမြို့နယ်၊ ကျောက္ကူပြင်ရွာ၊ စာသင်ကျောင်းရှေ့တွင် ရွာငံမြောက်ပိုင်းပျူစောထီးအဖွဲ့ခေါင်းဆောင် ကိုအောင်ဆိုသူက မုန့်ဆိုင်၌ ထိုင်နေစဥ် ပြည်သူ့ကာကွယ်ရေးတပ်ဖွဲ့ဝင်များက လာရောက်ပစ်ခတ်သွားခြင်းဖြစ်ကြောင်း PDF သတင်းရင်းမြစ်တစ်ဦးက ပြောသည်။
"မုန့်ဆိုင်မှာထိုင်နေတုန်းပစ်ခံရတာ။ ပစ်တာကတော့ ၇ ချက်ပစ်တယ်။ ရင်ဝတွေ၊ နောက်ကျောတွေရော မှန်တယ်။ ဒါပေမယ့် သူကျည်ကာဝတ်ထားတော့ မသေဘဲ ဒဏ်ရာပဲရသွားတာ။ ကျည်တော့ထိသွားတယ်။ လက်မောင်းတွေလောက်ပဲ ဒဏ်ရာရသွားတာ။ တပ်ဖွဲ့ဝင်တွေရဲ့ လုံခြုံရေးအခြေအနေအရ ဘယ်အဖွဲ့ကလုပ်ဆောင်တယ်လို့တော့ မထုတ်ပြန်သေးပါဘူး။ လုံခြုံစိတ်ချရတဲ့နေရာရောက်မှ သတင်းထုတ်ပြန်ပေးမှာပါ" ဟု ၎င်းကပြောသည်။
ကိုအောင်ဆိုသူသည် ရွာငံမြို့နယ်၊ ဆင်နက်ချောင်ရွာသားဖြစ်ပြီး ပြည်သူ့စစ်သင်တန်းဆင်းပျူစောထီးခေါင်းဆောင်တယောက်ဖြစ်ကာ အာဏာသိမ်းစစ်တပ်မှ G-3အမျိုးအစား သေနတ် ၅ လက်နှင့် ယင်းကျည် ၁၂၀၀၀ တောင့်၊ လက်ပစ်ဗုံးများ တပ်ဆင်ပေးထားခြင်းခံရသူဖြစ်ကြောင်း သိရသည်။
၎င်းသည် ရဲများနှင့်ပူးပေါင်း၍ ယခင်ကတည်းကမူးယစ်ဆေးဝါးများ ရောင်းဝယ်ဖောက်ကားနေသူတယောက်ဖြစ်ကြောင်း၊ နွားဘန်းကြီးရွာရှိ နေအိမ်များကိုမီးရှို့ဖျက်ဆီးခြင်း၊ စစ်တပ်နှင့် နေ့ကင်း၊ ညကင်း များကို ကားဖြင့်လှည့်လည်ခြင်းများကို လုပ်ဆောင်နေသူဖြစ်ကြောင်း သိရသည်။
ပြီးခဲ့သည် ဇွန်လ ၁၂ ရက်ကလည်း ရွာငံမြို့နယ်၊ တပ်ပုပ်ရွာအနီးရှိ ကားလမ်းမပေါ်၌ ရွာငံမြို့နယ်ပျူစောထီးခေါင်းဆောင် ဦးဝင်းမြင့်နှင့် အဖွဲ့ဝင် ၂ ဦး စီးနင်းလာသော ကားအား ဒေသခံပြည်သူ့ကာကွယ်ရေးတပ်ဖွဲ့မှ ပစ်ခတ်တိုက်ခိုက်ခဲ့ပြီး ၂ ဦး သေဆုံးကာ တစ်ဦး အပြင်းအထန်ဒဏ်ရာရရှိခဲ့ကြောင်းကိုလည်း သိရသည်။
MeKong News - မဲခေါင်သတင်း
Reviewed by THITHTOOLWIN
on
22:50
Rating:
No comments:
Post a Comment