ပင်လောင်းနှင့် အင်းလေးဒေသရှိ နေရာအချို့ ဖုန်းလိုင်းများပြတ်တောက်နေပြီး တိုက်ပွဲဖြစ်လာနိုင်ကြောင်း သတိပေး

မဲခေါင်၊ မေ ၁၃

ရှမ်းပြည်နယ်တောင်ပိုင်း၊ ပင်လောင်းမြို့နယ်နှင့် ညောင်ရွှေမြို့နယ်၊ အင်းလေးဒေသရှိ နေရာအချို့တွင် ယနေ့၊ နံနက်အစောပိုင်းအချိန်မှစတင်ပြီး ဖုန်းလိုင်းများပြတ်တောက်လျက်ရှိသလို တိုက်ပွဲများဖြစ်ပေါ်လာနိုင်ကြောင်း ဒေသတွင်းတော်လှန်ရေးအင်အားစုများက ပြည်သူများထံ သတိပေးပြောဆိုထားသည်။

ယမန်နေ့၊ မေလ ၁၂ရက်ကဖြစ်ပွားခဲ့သည့် စစ်ကောင်စီတပ်၏ ဗိုလ်မှူးအပါအဝင် ၁၅ဦး‌သေပြီး ၅ဦးလက်နက်ချ အညံ့ခံခဲ့ကြရသည့် ညောင်ရွှေမြို့နယ်၊ ထီးရီးရွာ တိုက်ပွဲအပြီး စစ်တပ်နှင့် PNOက အင်အားတိုးချဲ့ထားသလို ဖုန်းလိုင်းများပါ ပြတ်တောက်နေကြောင်း ဒေသတွင်းတော်လှန်ရေးထောက်ပို့ခေါင်းဆောင်တစ်ဦးက ပြောသည်။

"တချို့နေရာတွေက ‌မနေ့ကတည်းကပြတ်နေတယ်လို့သတင်းရတယ်။ ကျွန်တော်တို့ဖက်ကတော့ ဒီမနက်မှ မရတော့တာ။ သူတို့ဖက်ကလည်း အင်အားတိုးချဲ့လာတော့ တိုက်ပွဲတွေဖြစ်လာနိုင်တယ်။ ဒေသခံတွေကို အသိပေးချင်တာက သတင်းတွေကို အမြဲတမ်းနားစွင့်ထားပြီး အရေးကြီးတာတွေကို တစ်စုတစ်စည်းတည်း သိမ်းဆည်းထားဖို့နဲ့ အရေးပေါ်ပြောင်းရွေ့ဖို့ဖြစ်လာရင် ကြိုတင်ပြင်ဆင်ထားဖို့ ပြောချင်ပါတယ်။ အလှူရှင်တွေကိုလည်း ပုံမှန်လှူနေကြအဖွဲ့တွေကို ပိုလှူပေးကြဖို့ မေတ္တာရပ်ခံပါတယ်"ဟု ၎င်းကပြောသည်။

အလားတူ ပင်းတယနှင့် ရွာငံဒေသတွင်လည်း စစ်ကောင်စီတပ်နှင့် ပျူစောထီးများက အင်အားအများအပြားဖြင့် ကျေးရွာများသို့ ဝင်ရောက်တပ်စွဲကာ PDFများကို စီးနင်းရှာဖွေလျက်ရှိသဖြင့် ဒေသခံပြည်သူ့ကာကွယ်ရေးတပ်ဖွဲ့များက ခုခံစစ်ပြင်ဆင်နေရကြောင်း အဆိုပါဒေသ၏ ထောက်ပို့ခေါင်းဆောင်တစ်ဦးက ထပ်ပြောသည်။

"ဘာဖြစ်လို့လဲဆိုတော့ ကျွန်တော်တို့ဒေသက တခြားဒေသတွေလောက် အာရုံစိုက်မခံရသလို တော်လှန်ရေးလှုပ်ရှားမှုတွေကလည်း တခြားဒေသက သတင်းတွေလောက် သိပ်စိတ်မဝင်စားကြဘူးလေ"ဟု ၎င်းကပြောသည်။

ညောင်ရွှေမြို့နယ်၊ ထီရိကျေးရွာ၊ စာသင်ကျောင်းအတွင်း အခိုင်အမာတပ်စွဲထားသည့် တပ်မ(၅၅) လက်အောက်ခံ ခမရ-၁၈ တပ်နှင့် PNO အဖွဲ့ကို Pekhon People Defence Force - 2  ၊ KNDF B-3 တပ်ခွဲ ၄တို့က မေလ ၁၂ရက်၊ နံနက်ပိုင်းက ပူးပေါင်းတိုက်ခိုက်ခဲ့ရာ စခန်းသိမ်းနိုင်ခဲ့ပြီး  စစ်ကောင်စီတပ်၏ ဗိုလ်မှူးအပါအဝင် ၁၅ဦး‌သေကာ ၅ဦးမှာ လက်နက်ချ အညံ့ခံခဲ့ကြောင်း သိရသည်။ 

ထို့အပြင် အာဏာသိမ်းစစ်တပ်၏ ဖယ်ခုံမြို့နယ်အခြေစိုက် အမှတ် ၃၃၆တပ်မှ စစ်သား ၆ဦးက ဖယ်ခုံအရှေ့ဖက်ကမ်းသို့ မေလ ၁၂ရက်က ထွက်ပြေးသွားသဖြင့် စစ်တပ်မှလိုက်လံရှာဖွေနေသည်ဟု တပ်တွင်းသတင်းရင်းမြစ်များထံမှ သိရသော်လည်း မဲခေါင်သတင်းဌာနက သီးခြားအတည်မပြုနိုင်သေးပေ။

MeKong News - မဲခေါင်သတင်း