အင်းတော်တွင် စစ်ကောင်စီယာဥ်တန်းကား ၈ စီး မိုင်းဆွဲခံရပြီး တစ်စီး မိုင်းထိပျက်စီး

 

စစ်ကိုင်းတိုင်းဒေသကြီး၊ အင်းတော်မြို့နယ်တွင် ယနေ့ နံနက် ၅ နာရီဝန်းကျင်ခန့်တွင် စစ်ကောင်စီတပ်၏ စစ်ယာဥ်တန်း ကား ၈ စီး မိုင်းဆွဲတိုက်ခိုက်ခံခဲ့ရပြီး တစ်စီးမိုင်းထိကာ ပျက်စီးသွားကြောင်း Indaw Revolution -IR မှ သိရသည်။

ထီးချိုင့်ဘက်မှ ကချင်ပြည်နယ်ဘက်သို့ စစ်အင်အားဖြည့်ရန်တက်လာသည့် စစ်ကောင်စီတပ်၏ စစ်ကားရှစ်စီးကို Indaw Revolution -IR မှ အင်းတော်နဲ့ကျောင်းကုန်းကြားတွင် လေးကြိမ်တိတိ မိုင်းဆွဲတိုက်ခိုက်ခဲ့ရာ ကားတစ်စီး မိုင်းထိမှန်ပျက်စီးခဲ့ပြီး စစ်ကောင်စီတပ်ဘက်မှ ကျဆုံးမှုများနိုင်ကြောင်း Indaw Revolution - IR မှ တာဝန်ရှိသူတစ်ဦး က KNG သတင်းဌာနသို့ ပြောသည်။

''ရှစ်စီးလာခဲ့တာ အင်းတော်နဲ့ကျောင်းကုန်းကြားမှာ လေးနေရာ မိုင်းဆွဲလိုက်တော့စစ်ကားတစ်စီးပျက်သွားတယ် ခုနှစ်စီးပဲ အထက်တက်သွားတယ် အထိအခိုက်ကတော့ ရှိမှာ စစ်ကားတစ်စီးပေါ်ကို လက်ပစ်ဗုံးနဲ့ပစ်ခဲ့တာဆိုတော့ အတိအကျကတော့မသိရဘူး။ အဲ့ချိန်ကမှောင်လည်းမှောင်နေသေးတယ်ဗျ ဆက်တက်သွားတဲ့ ၇စီးက နန့်စီးအောင်တော့ကျော်ပြီလို့သိရတယ်''ဟု ၎င်းကပြောသည်။

အဆိုပါပျက်စီးသွားသည့်စစ်ကား တစ်စီးကို အင်းတော်အနီးတွင်ကျန်ထားကြောင်းသိရပြီး မိုင်းဆွဲတိုက်ခိုက်ခံရစဥ် စစ်ကောင်စီဘက်က ပြန်လည်ပစ်ခတ်ခဲ့သော်လည်း အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သူက ဆက်ပြောသည်။

Indaw Revolution -IR အနေဖြင့် အင်းတော်မြို့နယ်အတွင်း စစ်ကောင်စီ တပ်ယာဥ်တန်းများကို အကြိမ်ငါးဆယ်ထက်မနည်း မိုင်းဆွဲတိုက်ခိုက်ခဲ့ပြီ ဖြစ်ကြောင်းသိရပြီး စစ်ကောင်စီဘက်က ထိခိုက်သေဆုံးမှုလည်း အများအပြားရှိခဲ့ကြောင်း သိရသည်။

စစ်ကိုင်းတိုင်းဒေသကြီး အင်းတော်မြို့နယ်တစ်လျှောက် စစ်ကောင်စီတပ်၏ စစ်ကြောင်း၊ ယာဉ်တန်းများသည် မကြာခန မိုင်းဆွဲတိုက်ခိုက်ခံနေရဆဲ ဖြစ်သည်။

ထို့ပြင် အင်းတော်မြို့နယ်သည် အခြားမြို့နယ်များနည်းတူ အင်တာနက်ဖြတ်တောက်ခံထားရသည်မှာ ၂ လကျော် ကြာမြင့်လာပြီဖြစ်သည်အပြင် ယခုရက်ပိုင်း ဖုန်းလိုင်းများပါ မကြာခန ဖြတ်တောက်နေသည်ဟု သိရသည်။

မန္တလေး-မြစ်ကြီးနား ကားလမ်းပိုင်းဖြစ်သော အင်းတော် နှင့် မိုးညှင်းမြို့နယ်တွင် စစ်ကောင်စီယာဉ်တန်းကို ကချင်လွတ်လပ်ရေးတပ်မတော် KIA ဦးဆောင်သော PDF အဖွဲ့မှ တိုက်ခိုက်မှုများလည်း ယခင်က ရှိခဲ့သည်။

Kachin News Group