ရွာငံမြို့နယ် ပြည်သူ နေအိမ်တစ်လုံး မီးထပ်မံရှို့ခံရ

မေလ ၁၇ 

သျှမ်းပြည်တောင်ပိုင်း ရွာငံမြို့နယ် လယ်ကိုင်းကျေးရွာရှိ အရပ်သားပြည်သူတစ်ဦး၏ နေအိမ်ကို စစ်ကောင်စီ တပ်သားများက မီးရှို့ဖျက်ဆီးသွားကြောင်း သတင်းသိရသည်။

ယမန်နေ့ (မေလ ၁၆ ) ရက် ည ၁၀ နာရီဝန်းကျင်တွင် ရွာငံမြို့မှ လယ်ကိုင်းကျေးရွာတွင် ရှိသည့်  ဦးမောင်ဌေး ၏ နှစ်ထပ်တိုက်နေအိမ်ကို စစ်ကောင်စီတပ်သားတို့မှ လာရောက်မီးရှို့ဖျက်ဆီးသွားကြောင်း ဒေသခံ အမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။ 

“ဦးမောင်ဌေး အိမ်ကို မီးရှို့ဖျက်ဆီးသွားခဲ့ပါတယ်၊ အိမ်ရှင်မိသားစုတွေတော့ အချိန်မှီရှောင်တိမ်းနိုင်ခဲ့လို့ ထိခိုက် မှုမရှိပါဘူး၊ ဒါပေမဲ့ အိမ်တွင်းပစ္စည်းနဲ့ နေအိမ်တော့ ဆုံးရှုံးရတာပေါ့” ဟု အထက်ပါ ဒေသခံအမျိုးသား လူငယ်က သျှမ်းသံတော်ဆင့်ကို ပြောသည်။ 

ဦးမောင်ဌေးသည် ရိုးရိုးအရပ်သား ပြည်သူတစ်ဦးသာဖြစ်ပြီး မည်သည့် လက်နက်ကိုင် တော်လှန်ရေးတပ်ဖွဲ့များ နှင့် ဆက်စပ်မှု မရှိသော်လည်း စစ်ကောင်စီတပ်ဖွဲ့များ၏ လာရောက်ရှာဖွေခြင်း မကြာခဏ ခံရသူဖြစ်ကြောင်း ဒေသခံများက ပြောသည် ။ 

ထိုကဲ့သို့ နေအိမ်မီးရှို့ခံရမှု မဖြစ်ပွားခင် တစ်လခန့် အကြာတွင်လည်း လယ်ကိုင်းကျေးရွာတွင်းသို့ စစ်ကြောင်း ထိုးလာသည့် စစ်ကောင်စီတပ်ဖွဲ့က ဒလန်လမ်းပြမှုဖြင့် ဦးမောင်ဌေးနေအိမ်သို့ စစ်ဆေးမှုပြုလုပ်ခဲ့ကြောင်း ၎င်းက ဆက်ပြောသည်။ 

“အရင်က အဲ့အိမ်ကိုလာပြီး PDF တွေနဲ့ ဆက်စပ်မှုမရှိ မေးမြန်းတာတွေ လုပ်ဖူးတယ်၊ ပြီးတော့ အိမ်ကိုလည်းရှာ ဖွေမှုတွေ လုပ်ခဲ့တယ်၊ အဲ့နောက်ပိုင်း ရွာထဲကို စစ်ကောင်စီစစ်ကြောင်းဝင်တာနဲ့ သူတို့မိသားစုလည်း ရှောင်နေရ တော့တာပဲ၊ မနေ့ညကနေ သူတို့ အချိန်မှီရှောင်နိုင်ခဲ့တယ်” ဟု ၎င်းလူငယ်က ပြောသည်။

လက်ရှိတွင် ရွာငံမြို့နယ်အတွင်း စစ်ကောင်စီတပ်သားတို့  မီးရှို့ဖျက်ဆီးခဲ့သည့် အရပ်သား ပြည်သူနေအိမ်ပေါင်း ၈ လုံးထက် မနည်းရှိနေပြီး ချိတ်ပိတ်ခံရသည့် ပြည်သူ့နေအိမ် နှင့် အမျိုးသားဒီမိုကရေစီအဖွဲ့ချုပ် (NLD) အဖွဲ့ဝင်နေအိမ်များ စုစုပေါင်း ၁၀ လုံးကျော် ရှိနေကြောင်းလည်း ဒေသခံများပြောပြချက်အရ သိရသည်။

၂၀၂၁ခုနစ် ဖေဖော်ဝါရီ ၁ ရက်မှ ၂၀၂၂ ခုနစ် ဧပြီလ ၃၀ရက်ထိ စစ်အာဏာသိမ်းပြီးနောက် စစ်ကောင်စီတပ်နှင့် လက်အောက်ခံ အဖွဲ့အစည်းများမှ မီးရှို့ဖျက်ဆီးခဲ့သည့် အိမ်ခြေ ၁၁,၄၁၇ လုံးအနက် သျှမ်းတောင်တွင် အိမ်ခြေ ၉၈ လုံးရှိကြောင်း အမျိုးသားညီညွတ်ရေး အစိုးရ ကာကွယ်ရေး ဝန်ကြီးဌာန မှ ဧပြီ ၇ ရက်တွင် ထုတ်ပြန်ခဲ့ သည်။

SHAN News (Burmese Version)