AA စစ်ဦးစီးချုပ် ဗိုလ်ချုပ်ထွန်းမြတ်နိုင်က စစ်ကောင်စီတိုင်းမှူး ထင်လတ်ဦးကို သတိပေး

မေ ၆ ရက်

ရက္ခိုင့်တပ်တော်AA စစ်ဦးစီးချုပ် ဗိုလ်ချုပ်ထွန်းမြတ်နိုင်က အနောက်ပိုင်းတိုင်းစစ်ဌာနချုပ်တိုင်းမှူး ထင်လတ်ဦးကို လူမှုကွန်ရက် Twitter မှတစ်ဆင့် သတိပေးလိုက်ပြီး ငြိမ်းချမ်းရေး ဂရုစိုက်မည်မဟုတ်ဘဲ တိုင်းမှူးနေရာအထိ တိုက်ခိုက်မည်ဟု ပြောဆိုလိုက်သည်။ 

"ကိုထင်လတ်ဦးသိပ်လျှောက်မလုပ်နဲ့အာရုံနောက်နေပြီ ငြိမ်းချမ်းရေးဘာညာသောက်ဂရုစိုက်နေမှာမဟုတ်ဘူး။ မင်းနေတဲ့နေရာထိတက်ကြိတ်ပလိုက်မှာနော်" ဟု AA စစ်ဦးစီးချုပ် ဗိုလ်ချုပ်ထွန်းမြတ်နိုင်က လူမှုကွန်ရက် Twitter တွင် ရေးသားထားသည်။ 

အနောက်ပိုင်းတိုင်းစစ်ဌာနချုပ်သည် ရခိုင်ပြည်နယ်၊ အမ်းမြို့နယ်တွင် တည်ရှိပြီး လက်ရှိတွင် စစ်တပ်က ရခိုင်ပြည်နယ် တစ်ပြည်နယ်လုံးတွင် စစ်အင်အားတိုးချဲ့မှုများ၊ နယ်မြေချဲ့ထွင်မှုများလုပ်ဆောင်နေသည်။

တိုင်းရင်းသားပြည်သူများအားလုံး ငြိမ်ချမ်းရေးနှင့် ဖွံ့ဖြိုးတိုးတက်မှု၏ အရသာကို ခံစားနိုင်ရေးအတွက် EAOs များနှင့် ရိုးသားပွင့်လင်းစွာ ဆွေးနွေးသွားမည်ဟု စစ်တပ်ပိုင် မြဝတီသတင်းဌာနက ဧပြီ ၂၂ ရက်တွင် ထုတ်လွှင့်သည့် ရုပ်သံမိန့်ခွန်းတွင် စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောဆိုခဲ့သည်။

အဆိုပါဆွေးနွေးပွဲသို့ တိုင်းရင်းသားလက်နက်ကိုင်အဖွဲ့အသီးသီးမှ ခေါင်းဆောင်နှင့် အဖွဲ့ဝင်နှစ်ဦးစီ တက်ရောက်ပေးကြရန်နှင့် တက်ရောက်လိုသူများ၏ အမည်များကို ယခုနှစ် မေလ ၉ ရက်နေ့ကို နောက်ဆုံးထား၍ ပေးပို့စေလိုကြောင်း ၄င်းက ပြောဆိုခဲ့သည်။

စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၏ ဖိတ်ကြားချက် အား ULA ဗဟိုဌာနချုပ်နှင့် ညီနောင်မဟာမိတ်အဖွဲ့အစည်းများကြားတွင်လည်း ဆွေးနွေးရမည်ဟု ရက္ခိုင့်တပ်တော် AA က ပြီးခဲ့သည် ဧပြီ ၂၂ ရက်နေ့တွင် Western News ကို ပြောဆိုထားသည်။ 

သို့သော်လည်း ငြိမ်းချမ်းရေးနှင့်ပတ်သက်၍ ဆွေးနွေးမှုများ ပြုလုပ်နိုင်ရေး ဖိတ်ခေါ်ထားသည့်ကာလနှင့် တွေ့ဆုံဆွေးနွေးနေစဉ်ကာလအတွင်း နှောင့်ယှက်တိုက်ခိုက်ခြင်းများ ပြုလုပ်ပါက တုန့်ပြန်သွားမည်ဟု စစ်ကောင်စီ ကြေညာထားသည်။

မြန်မာတစ်နိုင်ငံလုံးတွင် လက်နက်ကိုင်ပဋိပက္ခငြိမ်းချမ်းရေးကို ဆောင်ရွက်ရန် တိုင်းရင်းသားလက်နက်ကိုင်အဖွဲ့အစည်းများ၏ ခေါင်းဆောင်များနှင့် တွေ့ဆုံလိုကြောင်း စစ်တပ်ပိုင် မြဝတီသတင်းဌာနက ဧပြီ ၂၂ ရက်တွင် ထုတ်လွှင့်သည့် ရုပ်သံမိန့်ခွန်းတွင် စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားပြီးနောက် ယခုကဲ့သို့ ကြေညာလာခဲခြင်းဖြစ်သည်။

Western News-WN