ပျူစောထီးများနှင့် စစ်ကောင်စီတပ်ဖွဲ့အား နှစ်ကြိမ်တိုင်ခုခံတိုက်ခိုက်ရာ ငါးဦးထက်မနည်းသေဟု ဟုမ္မလင်းPDF ပြော

စစ်ကိုင်းတိုင်း၊ ဟုမ္မလင်းမြို့နယ်တွင် ပျူစောထီးများနှင့် စစ်ကောင်စီတပ်ဖွဲ့အား နှစ်ကြိမ်တိုင်ခုခံတိုက်ခိုက်ရာ အကြမ်းဖက်စစ်တပ်ဘက်မှ ငါးဦးထက်မနည်း သေဆုံးကြောင်း ဟုမ္မလင်းမြို့နယ်ပြည်သူ့ကာကွယ်ရေးတပ်ဖွဲ့ (HPDF)က သတင်းထုတ်ပြန်သည်။

ဟုမ္မလင်းမြို့နယ်နှင့် ဖောင်းပြင်မြို့နယ်အစပ်ရှိ လွင်ကြီးရွာအနီးတစ်ဝိုက်တွင် ပြီးခဲ့သည့် ဧပြီ ၈ ရက် နံနက် ၅နာရီခန့်က စစ်ကောင်စီနှင့်ပျူစောထီးအဖွဲ့များ ပူးပေါင်း စစ်ကြောင်းထိုးလာကြောင်းကြားသိရ၍ မိုင်းဆွဲတိုက်ခိုက်မှု ပြုလုပ်ခဲ့ ကြောင်း၊ ထိုတိုက်ခိုက်မှုတွင် စစ်ကောင်စီနှင့် ပျူစောထီး တပ်သားများငါးဦး သေဆုံးပြီး တပ်ဖွဲ့မှ အထိအခိုက်မရှိဘဲ အောင်မြင်စွာဆုတ်ခွာနိုင်ခဲ့ကြောင်း ဟုမ္မလင်းမြို့နယ်ပြည်သူ့ကာကွယ်ရေးတပ်ဖွဲ့က ထုတ်ပြန်သည်။

ယနေ့(ဧပြီ၁၁ ရက်)နံနက်ပိုင်းတွင် ဟုမ္မလင်းမြို့နယ်နှင့် ဖောင်းပြင်မြို့နယ် အစပ်ရှိ တောင်ကုန်းသာကျေးရွာ အနီးတစ်ဝိုက်သို့ ခြေလျင်စစ်ကြောင်းထိုး သော စစ်ကောင်စီတပ်သားများအား မိုင်းဆွဲတိုက်ခိုက်ခဲ့ရာ ရာသီဥတု အခြေအနေကြောင့် မိုင်းမအောင်မြင်၍ လက်လုပ်သေနတ်များဖြင့် ပစ်ခတ်ခဲ့ရာ ရန်သူဘက်မှ လက်နက်ကြီးများဖြင့် ပြန်လည် ပစ်ခတ်ခဲ့ကြောင်း ထပ်မံ ထုတ်ပြန်သည်။

ထို့အပြင် ပြည်သူ့ကာကွယ်ရေးတပ်ဖွဲ့မှ အထိအခိုက်မရှိဘဲအောင်မြင်စွာ ဆုတ်ခွာနိုင်ခဲ့ကြောင်း၊ အကြမ်းဖက်စစ်ကောင်စီဘက်မှ အထိအခိုက်အကျ အဆုံးကိုမူ မသိရှိရသေးကြောင်း ထုတ်ပြန်ချက်တွင် ဖော်ပြသည်။

ဟုမ္မလင်းမြို့နယ်တွင် ယနေ့အချိန်အထိ အင်တာနက်ဖြတ်တောက်ထား သော်လည်း ကျွန်ုပ်တို့ တပ်ဖွဲ့မှ စစ်အာဏာရှင်စနစ် အမြစ်ပြတ်ရေးအတွက် လက်နက်ကိုင်တော်လှန်ရေးအား ဆက်လက်လုပ်ဆောင်နေလျက်ရှိကြောင်း ဟုမ္မလင်းမြို့နယ် ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။

အဆိုပါ​ဖြစ်စဥ်များအတွက် ဟုမ္မလင်းမြို့နယ် ပြည်သူ့ကာကွယ်ရေးတပ်ဖွဲ့သို့ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပါ။

People's Spring