စစ်ကောင်စီယာဉ်တန်းကို မတူပီ CDFက လက်လုပ် လက်နက်ကြီးများဖြင့် ပစ်ခတ်တိုက်ခိုက်

(မ​ကွေးတိုင်း ​ကျောက်ထုမှ မတူပီမြို့သို့ သွား​ရောက်​သော စစ်​ကောင်စီယာဥ်တန်းအား ​တွေ့ရစဥ်)

မတူပီမှ မင်းတပ်မြို့သို့ ပြန်လာသည့် စစ်ကောင်စီယာဉ်တန်းကို မတူပီ ချင်းကာကွယ်ရေးတပ်ဖွဲ့(CDF) ယနေ့ ထပ်မံတိုက်ခိုက်ခဲ့သည်ဟု သတင်းရကြောင်း မင်းတပ် CDF ပြောရေးဆိုခွင့်ရှိသူ ဆလိုင်းဟာအွမ်က အသိပေးသည်။

ယမန်နေ့ (ဧပြီ ၂၇ရက်)တွင် မတူပီမြို့မှ ထွက်လာသည့် စစ်ကောင်စီယာဉ်တန်းသည် ယနေ့တွင် ဆက်လက်ခရီးနှင်ရာ မိုင်တိုင် (၈၇)အရောက်တွင် မတူပီ CDF က လက်လုပ် လက်နက်ကြီးများ၊ လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း မင်းတပ် CDF ပြောရေး ဆိုခွင့်ရှိသူ ဆလိုင်းဟာအွမ်၏ Ha Om အမည်ရှိ လူမှုကွန်ရက်အသုံးပြုသူက ရေးသားဖော်ပြထားသည်။

ထိုသို့ တိုက်ခိုက်မှုကြောင့် စစ်ကောင်စီတပ်မှ ထိခိုက်သေဆုံးမှု အခြေအနေကို မဖော်ပြထားပေ။ ယမန်နေ့ကလည်း စစ်ကောင်စီယာဉ်တန်းကို မတူပီ CDF က မိုင်တိုင် (၉၁) နှင့် (၉၀) ကြား၌ ပဒေသာမိုင်းဖြင့် တိုက်ခိုက်ခြင်း၊ လက်နက်ငယ်များဖြင့် ပစ်ခတ်ခြင်း ပြုလုပ်ရာ စစ်ကောင်စီတပ်မှ ရှစ်ဦးသေ၊ အများအပြား ဒဏ်ရာရသည်ဟု မတူပီ CDF ပြောရေးဆိုခွင့်ရှိသူက ပြောကြားထားသည်။

ယနေ့ တိုက်ခိုက်မှုဖြစ်စဉ်နှင့်ပတ်သက်၍ မတူပီ CDF ပြောရေးဆိုခွင့်ရှိသူသို့ ဆက်သွယ်ရာ အဆက်အသွယ်မရသေးပေ။

စစ်ကောင်စီယာဉ်တန်းသည် ယနေ့ ညနေ ၄နာရီတွင်  မိုင်တိုင် (၈၄)သို့ ရောက်ရှိနေပြီဖြစ်သည်ဟု မတူပီ CDFထံမှ သတင်းရရှိထားကြောင်း ဆလိုင်းဟာအွမ်က ဆိုသည်။

အဆိုပါ စစ်ကောင်စီယာဉ်တန်း မင်းတပ် CDF တပ်များရှိရာဒေသသို့ ရောက်ရှိပါကလည်း တိုက်ခိုက်သွားမည်ဖြစ်ကြောင်း ဆလိုင်းဟာအွမ်က ပြောသည်။ ယခင်ကလည်း မင်းတပ် CDFက ပြင်းထန်စွာ တိုက်ခိုက်ခဲ့၍ မိုင် ၁၀၀ ကျော်သာဝေးသည့် မင်းတပ် -မတူပီလမ်းကို စစ်ကောင်စီယာဉ်တန်းသည် နှစ်ပတ်နီးပါးကြာ ခရီးနှင်ခဲ့ရသည်ဟု ၎င်းက ဆိုသည်။

“ဒီတစ်ကြိမ်ကလည်း ရှေးယခင်ကထက် ပိုပြီး ပြင်းပြင်း ထန်ထန်တိုက်ခိုက်ဖို့ရှိပါတယ်” ဟု ဆလိုင်းဟာအွမ်က ပြောသည်။

People's Spring