အင်းတော်မြို့နယ် စစ်ကောင်စီ သတင်းပေးဆိုသူ အသတ်ခံရ

April 13.2022

စစ်ကိုင်း အင်းတော်မြို့နယ် နဘားကျေးရွာအုပ်စု ပင့်တင် ကျေးရွာမှ စစ်ကောင်စီ သတင်းပေး အမျိုးသားတစ်ဦး ယမန်နေ့ညနေပိုင်း အသတ်ခံရကြောင်း သိရသည်။

အသတ်ခံရသူမှာ အသက် ၄၉ အရွယ် ဦးဝင်းဗိုလ် ဆိုသူဖြစ်ကာ ဧပြီ ၁၂ ရက်နေ့ည ၅ နာရီခန့်တွင် Tiger Army တပ်ဖွဲ့က သုတ်သင်ရှင်းလင်းခဲ့ကြောင်း ယင်းအဖွဲ့ တာဝန်ရှိသူတစ်ဦးက KNG သတင်းဌာနသို့ ပြောသည်။

''သူကပင့်တင်ရွာမှာ စစ်တပ်လာထိုင်ဖို့ စစ်တပ်ကိုဖုန်းဆက်ခေါ်တယ်။ တော်လှန် ရေးလုပ်နေတဲ့ ပြည်သူတွေကိုလည်း တိုင်တာတွေလုပ်ပါတယ်။ PDF ရှိတဲ့နေရာတွေကိုလမ်းပြတယ်။ ဒါကြောင့်မနေ့ညက သူ့အိမ်မှာဝင်ပြီး သေနတ်နဲ့သုံးချက်ပစ်သတ်ခဲ့ပါတယ်'' ဟု Tiger Army တပ်ဖွဲ့မှတာဝန်ရှိသူတစ်ဦးကပြောသည်။

ထိုသူ၏ သတင်းပေးမှုကြောင့် PDF များနောက်လိုက်ခံရသည့်ဖြစ်စဉ်များ ရှိခဲ့သည်ဟု Tiger Army တပ်ဖွဲ့ဝင်တစ်ဦးက ပြောသည်။

ဦးဝင်းဗိုလ်တွင် စစ်ကောင်စီတပ်မှ ဗိုလ်အဆင့်ရှိသည့် သားတစ်ယောက်လည်း ရှိကြောင်းသိရသည်။

ဒေသခံ ကာကွယ်တပ်ဖြစ်သော Tiger Army အဖွဲ့သည် အင်းတော်မြို့နယ်အတွင်း စစ်ကောင်စီသတင်းပေး ၃ ဦးကို ရှင်းလင်းမှုများ ပြုလုပ်ခဲ့သည်ဟု ပြောပါသည်။

Kachin News Group