မန္တလေးတွင် နေရာတချို့ ဝင်ရောက်စီးနင်းခံရ၊ လူငယ်များအား ပစ်ခတ်ဖမ်းဆီး

မန္တလေး၊ ဧပြီ ၉

မန္တလေးမြို့ပြ ပြောက်ကျားအဖွဲ့ဝင်တချို့ ဖမ်းဆီးခံရပြီးနောက် မန္တလေးမြို့မှ နေရာတချို့ဝင်ရောက် စီးနင်းခံနေရပြီး လမ်းပေါ်သွားလာနေသည့် လူငယ် တချို့လည်း ပစ်ခတ်ဖမ်းဆီးခံနေရကြောင်း မြို့ခံများထံမှ သိရသည်။

မန္တလေးတော်လှန်ရေးအဖွဲ့များထံမှ ရရှိထားသည့် သတင်းအရ ယမန်နေ့ (ဧပြီလ ၈ရက် ) ညက မန္တလေးမြို့ပြ ပြောက်ကျားအဖွဲ့မှ ကိုဂျပန်ကြီး (ခ) ကိုစည်သူကို နေအိမ်၌ပင် စစ်တပ်က ဝင်ရောက်စီးနင်းခဲ့ပြီးနောက် ဆက် စပ်၍ နောက်ထပ်နှစ်ဦးကိုပါ ညတွင်းချင်းဖမ်းဆီးခဲ့ကြောင်း သိရသည်။

ယနေ့ နံနက်ပိုင်းတွင်လည်း လမ်းပေါ်သွားလာနေသည့် အမျိုးသားတစ်ဦးကို ပစ်ခတ်ကာ Mark  ii ကားပေါ်တင် ကာဖမ်းဆီးသွားပြီး ကားပေါ်တွင် ဖမ်းဆီးခံထားရသူအမျိုးသမီးတစ်ဦးပါကြောင်း သိရသည်။

ထို့ပြင် မန္တလေးမြို့ ၇၁ လမ်း၊ လမ်း ၄၀ အနီးရှိ အမျိုးသားအဆောင်ကို သေနတ်ပစ်ဖောက်ဝင်စီးခဲ့ပြီး အမျိုးသား ၄ ဦး ကိုလည်း ဖမ်းဆီးသွားကြောင်း မျက်မြင်တွေ့ရှိသူများက လူငယ့်ခေတ်သို့ပြောသည်။

"အရပ်ဝတ် အိမ်စီးကားနဲ့ပဲလာတာ။ လူငယ်တွေ အကုန်စုတဲ့နေရာဆိုတော့ သေနတ်အရင်ပစ်တာ။ ကောင်လေး တစ်ယောက်ကတော့ သေနတ်ဒဏ်ရာနဲ့ပါသွားတယ်"ဟု မျက်မြင်တွေ့ရှိသူတစ်ဦးက ပြောသည်။

ထို့အပြင် ၆၈ လမ်း၊ လမ်း ၄၀ အနီးတွင်လည်း ဆိုင်ကယ်နှင့်သွားလာနေသည့် လူငယ် ၂ ဦးကို ပစ်ခတ်ဖမ်းဆီးခဲ့ ရာ တစ်ဦးသေနတ်ထိမှန် ဒဏ်ရာရခဲ့ပြီး Mark ii ကားပေါ်ဆွဲတင်ကာ ဖမ်းဆီးခံလိုက်ရကြောင်းလည်း မန္တလေး တော်လှန်ရေးအင်အားစုများထံမှ သိရသည်။

ယခုရက်ပိုင်းအတွင်း ဖမ်းဆီးမှုများအားလုံးကိုစစ်ကောင်စီက အရပ်ဝတ်၊ အိမ်စီးကားများဖြင့်သာ ဝင်ဖမ်းနေပြီး အရပ်ဝတ် လက်နက်ကိုင်ကင်းပုန်းများလည်း မြို့အနှံ့ချထားကြောင်း မြို့ခံများက ပြောသည်။

မန္တလေးမြို့၊ ပုသိမ်ကြီးမြို့နယ် ရန်ကင်းသာရပ်ကွက်ကိုလည်း စစ်ကားအစီး ၃၀ ခန့်ဖြင့် ဝင်ရောက်စီးနင်းနေ ကြောင်းသိရပြီး နောက်ဆက်တွဲအခြေအနေကိုစုံစမ်းနေဆဲဖြစ်သည်။

Lu Nge Khit