PPDFက ပခုက္ကူအင်းဝဘဏ်အ​စောင့်စစ်​ကောင်စီတပ်သားများကို တိုက်ခိုက်စစ်ကောင်စီတပ်သား ၂ဦး​သေ၊၃ ဦးဒဏ်ရာရ

ပခုက္ကူမြို့ရှိ အင်းဝဘဏ်စောင့် စစ်ကောင်စီတပ်ဖွဲ့ကို ပြည်သူ့ကာကွယ်ရေးအဖွဲ့များက ယနေ့ည တိုက်ခိုက်ရာ စစ်ကောင်စီတပ်သား နှစ်ဦး သေဆုံးပြီး သုံးဦး ဒဏ်ရာရရှိခဲ့​ကြောင်း ပခုက္ကူပြည်သူ့ကာကွယ်​ရေးအဖွဲ့ (PPDF)က သတင်းထုတ်ပြန်သည်။

အင်းဝဘဏ် လုံခြုံရေးအဖွဲ့ကိုယနေ့(ဖေဖော်ဝါရီ ၄ရက်) ည ​နေ ၆ နာရီခွဲ​ကျော်တွင် တိုက်ခိုက်ခဲ့ခြင်းဟု ပြည်သူ့ကာကွယ်ရေးအဖွဲ့ဘက်က အဖွဲ့ဝင်တစ်ဦးကပြောသည်။

"အခုတိုက်ခဲ့တဲ့နေရာမှာဝတ်စုံအပြည့်နဲ့ငါးယောက်ရယ်။အရပ်ဝတ်နဲ့ လေးယောက်လောက် စုစုပေါင်းကိုးဦး လောက်ရှိတယ်။ဗုံးနဲ့ပစ်ဖို့ သွားခဲ့ပေမယ့် အခြေအနေမပေးတဲ့အတွက်သေနတ်အတိုနှစ်လက်ကို အသုံးပြုတိုက်ခိုက်ခဲ့တာ"ဟု PPDF ရဲဘော်တစ်ဦးက လူထုနွေဦးသို့ပြောသည်။

စစ်ကောင်စီတပ်သားများက ပြန်လည်ပစ်ခတ်သော်လည်း  ပြည်သူ့ကာကွယ်ရေးအဖွဲ့ဘက်တွင် ထိခိုက်သူမရှိခဲ့ဟု၎င်းကဆက်​ပြောသည်။

"မိမိတို့၀င်ရောက်ပစ်ခတ်တိုက်ခိုက်မှုကြောင့် အာဏာမတရားသိမ်းပိုက်ပြီးချိန်မှစ၍ ပြည်သူလူထု၏ စိတ်နှလုံးအား ညှိုးငယ်စေရန်အစဉ်တစိုက်နှိပ်စက်ညှင်းဆဲလျက်ရှိသော အာဏာလုစစ်တပ်၏ လက်ပါးစေ အသိဉာဏ်မဲ့ အကြမ်းဖက်စစ်သား (၂)ဦး ယင်းနေရာတွင် ပွဲချင်းပြီးသေဆုံးကာ  (၃)ဦးထက်မနည်း ဒဏ်ရာရရှိခဲ့ကြောင်း ကနဦးသိရှိရပြီး၊ မိမိတို့ရဲဘော်များ အောင်မြင်စွာ ဆုတ်ခွာနိုင်ခဲ့ပါသည်" ဟု PPDF ကထုတ်ပြန်သည်။

တိုက်ခိုက်ခံရပြီး​နောက် စစ်​ကောင်စီတပ်သည် မြို့ပေါ်ရှိ နေရာအချို့၌ အကြောင်းမဲ့ရမ်းသမ်းပစ်ခတ်ခြင်း၊ အပြစ်မဲ့ပြည်သူအားနည်းအမျိုးမျိုးဖြင့် နှိပ်စက်ညှင်းပန်းခြင်းများ ဆောင်ရွက်နိုင်ဖွယ်ရှိသဖြင့် ပြည်သူများအနေဖြင့် လုံခြုံရေး အထူးဂရုပြုဆောင်ရွက်ကြရန် မေတ္တာရပ်ခံ အပ်ပါသည်ဟု PPDF အဖွဲ့ခေါင်းဆောင်ကိုယ်စားသတင်းပြန်ကြားရေးနှင့် ပြင်ပဆက်ဆံရေးတာဝန်ခံကသတင်းထုတ်ပြန်သည်။

“အပြန်အလှန်ပစ်တယ်ပေါ့။ မြို့ခံတွေထိခိုက်တာတော့ဘာမှမကြားဘူး” ဟု ပခုက္ကူမြို့ခံတစ်ဦးကလည်း ပြောသည်။

စစ်ကောင်စီအား တိုက်စစ်ဖွင့်မည်ဟု ကြေငြာထားသည့် ပခုက္ကူ နှင့်​ပေါက် အခြေစိုက် ပြည်သူ့ကာကွယ်ရေးအဖွဲ့များက ပခုက္ကူ-‌ပေါက် ကားလမ်းမဘေးရှိသစ်တောရဲကင်းစခန်းအား ယနေ့နံနက်ပိုင်းက မီးရှို့ဖျက်ဆီခဲ့သေးသည်။

ပြည်သူလူထုအနေဖြင့် စစ်ကောင်စီတပ်ဖွဲ့များ၊ ရဲများ၊ ပျူစောထီးများနှင့် အနီးကပ်နေထိုင်ခြင်းမပြုလုပ်ကြရန်လည်း  ပြည်သူ့ကာကွယ်ရေးအဖွဲ့များက မေတ္တာရပ်ခံထားသည်။

People's Spring