ပြည်သူသုံးဦးဒဏ်ရာရ​သော မြစ်ကြီးနားမြို့ပေါ် ဗုံးပေါက်ကွဲမှု စစ်​ကောင်စီတပ်က PDF အ​ယောင်​ဆောင်​ ဖောက်ခွဲခဲ့ခြင်းဖြစ်​ကြောင်း ​ဒေသခံများ​ပြော

ပြည်သူသုံးဦး ဒဏ်ရာရရှိခဲ့​သော မြစ်ကြီးနားမြို့ ယနေ့ညဦးပိုင်းက ဗုံးပေါက်ကွဲမှုမှာ စစ်​ကောင်စီတပ်ကပြုလုပ်ပြီး ​ဒေသခံ PDFက ပြုဘုပ်သည့်ပုံစံဖြင့် ပြည်သူများအထင်မှား​​အောင် ပြုလုပ်ခဲ့ခြင်းဖြစ်ကြောင်း ဒေသခံများက ပြောသည်။

ယနေ့(ဖေဖော်ဝါရီ ၁၄)ညနေ ၇ နာရီခန့်က မြစ်ကြီးနားမြို့ တပ်ကုန်းစံပြလမ်း ဒူကထောင်လမ်းဆုံအနီးပေါက်ကွဲခဲ့ခြင်းဖြစ်ပြီး ပြည်သူသုံးဦး ထိခိုက်ဒဏ်ရာရရာရှိခဲ့သည်။ဒဏ်ရာရသူများတွင် ဆွတ်အောင်ဆိုင်ပိုင်ရှင် အမျိုးသားတစ်ဦးနှင့် အခြားအမျိုးသားတစ်ဦးအပြင် အမျိုးသမီးတစ်ဦးတို့ဖြစ်​ကြောင်း ​ဒေသခံများက ​ပြောသည်။

"ပေါက်ကွဲမှုမဖြစ်ခင်ကတည်းက စစ်ကားတွေ ကြိုရောက်နေပြီ"ဟု မြစ်ကြီးနားဒေသခံတစ်ဦးကပြောသည်။

အခြား​ဒေသခံတစ်ဦးကလည်း အလုံပိတ်စစ်ကားတစ်စီးမှာ ဗုံးမကွဲခင်ကတည်းက ဗုံးကွဲ​သော​နေရာနှင့် မလှမ်းမကမ်းရှိ​နေရာတစ်ခုတွင် ကြိုတင်​ရောက်​နေ​ကြောင်း​ပြောသည်။

"ဒီ​ကောင်​တွေက ကြိုတင် Plan  ချထားတာ။ဗုံးကွဲမယ့်​နေရာမနီးမ​ဝေးမှာ ဒီ​ကောင်​တွေကြို​ရောက်​နေတာ။ဗုံးကမကွဲ​သေးဘူး ။ဇာတ်တိုက်ထားကြတာ။ကျွန်​တော့မျက်စီနဲ့ တပ်အပ်မြင်တာ" ဟု စစ်​ကောင်စီတပ်သားများကို ဗုံးကွဲ​သော​နေရာနှင့်မလှမ်းမကမ်းတွင် မြင်​တွေ့ခဲ့​သော​ဒေသခံတစ်ဦးကလည်း​ပြောသည်။ ကြို​ရောက်​နေ​သောစစ်ကားမှာအလုံပိတ်ဖြစ်ပြီး ကား​ပေါ်တွင် စစ်သားမည်မျှပါသည်ကို အလုံပိတ်ဖြစ်၍မမြင်ရ​ကြောင်း၎င်းက ဆက်​ပြောသည်။

ထို့အပြင် ဗုံးကွဲပြီး​နောက် ဗုံး​​ပေါက်ကွဲ​သောရုပ်သံဖိုင်ကို ​ဖေ့စ်ဘွတ်ခ်လူကွန်ရက်​ပေါ်တွင်  Myitkyina Special PDF-Force ဆို​သော​ စာမျက်နှာမှာ ည ၉ နာရီ​ကျော်ကတည်းက ပထမဆုံး တင်ထားကာPDF အဖွဲ့က လုပ်သ​ယောင်ပြုလုပ်ထားသည်။ အဆိုပါ​ ပေ့ချ်သည် ဇန်နဝါရီ ၂၆ ရက်မှ စတင်ပြုလုပ်ထားပြီး PDF အ​ယောင်​ဆောင်ထား​သော စစ်​ကောင်စီတပ်၏​ပေ့ချ်ဖြစ်​ကြောင်း​ဒေသခံများက​ ပြောသည်။ ယခုဗုံးကွဲ​သောပိုစ်​အောက်တွင် ပြည်သူအချို့က ဗုံးခွဲမှုမှာစစ်​ကောင်စီကျူးလွန်ပြီး ​ပေချ်မှာလည်းအတူဖြစ်နိုင်​ကြောင်းမှတ်ချက်ပြု​ ပြောကြား​နေကြသည်။

ထို့အပြင် ကချင်ပြည်နယ်တွင် ပြည်သူ့ကာကွယ်ရေးတပ်ဖွဲ့များအား ကချင်လွတ်လပ်​ရေးတပ်မ​တော်(KIA) ကြီးကြပ်မှုအောက်တွင်ထားရှိပြီး မြို့များပေါ်တွင် လှုပ်ရှားမှုမပြုရန် ညွန်ကြားထား ကြောင်းသိရသည်ဟု ကချင်‌ ဒေသခံတစ်ဦးက ပြောသည်။ ကချင်ပြည်နယ်တွင် စစ်​ဆင်​ရေးပြုလုပ်တိုင်တွင်လည်း PDF သီးသန့်လှုပ်ရှားခြင်းမရှိဘဲ KIAနှင့်ပူးတွဲ စစ်​ရေးပြုလုပ်ကြသည်။ အထက်ပါ​ PDF ပေ့ချ်အတုတွင် KIA မ​ကောင်း​ကြောင်းလည်း တစ်ကြိမ်ပို့စ်တင်ထားသည်ကို​တွေ့ရသည်။

ထို့အပြင် ကချင်ပြည်နယ်တွင် Myitkyina Special PDF Force အမည်ဖြင့် PDF အဖွဲ့မရှိ​ပေ။

ဖေဖော်ဝါရီ ၁၁ ရက်နေ့ညပိုင်းကလည်း မြစ်ကြီးနားမြို့ စီပူတာရပ်ကွက် မနောကွင်းအဝိုင်းပတ်အနီး စစ်ကောင်စီတပ်များ ရမ်းကားပစ်ခတ်၍ (၂၄) နှစ်အရွယ် အမျိုးသမီးတစ်ဦး ပွဲချင်းပြီး သေဆုံးခဲ့သေးသည်။

People's Spring