စဉ့်ကူးမြို့နယ်ရှိ ပင်လယ်ကြီးစစ်ဆေးရေးဂိတ်ကို PDF အဖွဲ့ ဝင်ရောက်ပစ်ခတ်ခဲ့ရာ ဒုရဲအုပ်တစ်ဦးအပါအဝင် ၂ ဦးသေဆုံး

ဓာတ်ပုံ- စဉ့်ကူး PDF 

စဉ့်ကူး၊ ဖေဖော်ဝါရီ ၁၄

စဥ့်ကူးမြို့နယ် လက်ပန်လှကျေးရွာအနီး မန္တလေး-မိုးကုတ်ကားလမ်းမပေါ်ရှိ ပင်လယ်ကြီးစစ်ဆေးရေးဂိတ်ကို စဥ့်ကူး PDF က ဝင်ရောက်ပစ်ခတ်ခဲ့ရာ ဒုရဲအုပ်တစ်ဦးအပါအဝင် နှစ်ဦးသေဆုံးခဲ့ကြောင်း ဒေသခံများထံက သိရသည်။

ပင်လယ်ကြီးစစ်ဆေးရေးဂိတ်ကို ယနေ့ နံနက် ၄ နာရီခန့်၌  ဝင်ရောက်ပစ်ခဲ့ခြင်းဖြစ်ပြီး ဒုရဲအုပ်မိုးဝင်းနှင့် တပ်သားတစ်ဦးသေဆုံးခဲ့ကြောင်း သတင်းရင်းမြစ်များထံမှ သိရသည်။

"မနက် ၄ နာရီလောက်က ပစ်ခတ်သံတွေ ကြားနေရတယ်။ နည်းနည်းကြာမှ တစ်ဖက်က ပြန်ပစ်သံကြားရတာ။ အချိန်ကတော်တော်လေးကြာတယ်"ဟု ဒေသခံတစ်ဦးကပြောသည်။

" ပြည်သူ့ကာကွယ်ရေးတပ် (စဉ့်ကူး) ၏ မိုးကြိုးစစ်ဆင်ရေး အောင်မြင်စွာပြီးဆုံးပါပြီ။ ရဲဘော်တွေလည်း လုံခြုံသောနေရာများသို့ ရောက်ရှိသွားပါပြီ။ ချစ်သူများနေ့မှာ ကျွေးတဲ့ ချောကလက်တောင့်လေးတွေ တော်တော် စားကောင်းကြပါရဲ့လားခင်ဗျာ"ဟု ထုတ်ပြန်ထားသည်။

မန္တလေး-မိုးကုတ်လမ်းပေါ်တွင် စစ်ကောင်စီတပ်များ မကြာခဏတိုက်ခိုက်ခံနေရပြီး  စစ်တပ်၏ ရမ်းသမ်း ပစ်ခတ်မှုကြောင့် အသက် ၁၀ နှစ်အောက် ကလေးငယ်နှစ်ဦးသေဆုံးထားသည်။

Lu Nge Khit