ဂျပန်အ​ဖျော်ယမကာကုမ္ပဏီKirin စစ်​ကောင်စီနှင့်လမ်းခွဲပြီး မြန်မာနိုင်ငံမှထွက်ခွာ​တော့မည်

အာဏာသိမ်းစစ်​ကောင်စီနှင့်လက်တွဲပြီး မြန်မာဘီယာထုတ်လုပ်နေသည့် ဂျပန်အဖျော်ယမကာကုမ္ပဏီ Kirin ကမြန်မာနိုင်ငံမှ ထွက်ခွာတော့မည်ဖြစ်ကြောင်း ယနေ့ထုတ်ပြန်ကြေညာလိုက်သည်။ 

အကြမ်းဖက်စစ်တပ်ပိုင် မြန်မာစီးပွားရေးဦးပိုင်လီမိတက်နှင့် တနှစ်ကြာညှိနှိုင်းခဲ့သော်လည်း ဖြေရှင်းနိုင်သည့် အလားအလာမရှိသောကြောင့် မြန်မာနိုင်ငံတွင်လည်ပတ်နေသည့်လုပ်ငန်းများ ရပ်ဆိုင်းရန် ဆုံးဖြတ် ချက်ချခဲ့ခြင်းဖြစ်သည်ဟု ဂျပန်သတင်းဌာနတစ်ခုဖြစ်​သော Nikkei Asiaတွင် ဖော်ပြထားသည်။ 

စစ်တပ်နှင့်လက်တွဲလုပ်ကိုင်ထားသည့် ၎င်းတို့၏ လုပ်ငန်းများကို တတိယကုမ္ပဏီတစ်ခုကို ရောင်းချသွားရန်လည်း စီစဉ်နေသည်ဟုလည်း ဂျပန်ကုမ္ပဏီကဆိုသည်။ ထိုရောင်းချမှုကို ဇွန်လတွင် အပြီးသတ်ဆောင်ရွက်မည်ဟုသတင်း​တွင်​ ဖော်ပြထားသည်။ 

ဂျပန်ကုမ္ပဏီသည် ဖေဖော်ဝါရီ ၁ ရက် စစ်တပ်အာဏာသိမ်းပြီးကတည်းကပင် အကြမ်းဖက်စစ်တပ်ပိုင် မြန်မာစီးပွားရေးဦးပိုင်လီမိတက်(MEHL)နှင့် လက်တွဲဆောင်ရွက်​နေမှုကို ရပ်တန့်ခဲ့သည်။ ဂျပန်ကုမ္ပဏီက စစ်တပ်နှင့် လမ်းခွဲပြီးနောက် မြန်မာနိုင်ငံ၏ဘီယာဈေးကွက်တွင် ဆက်လက်ထုတ်လုပ်ရန်မျှော်လင့်ခဲ့သော်လည်း လက်တွေ့တွင် အလုပ်မဖြစ်ခဲ့ကြောင်း ဂျပန်ကုမ္ပဏီက ဆိုသည်။

ဂျပန် Kirinသည် အကြမ်းဖက်စစ်တပ်ပိုင် MEHL နှင့် လုပ်ငန်းရပ်ဆိုင်းရန် ခွဲဝေညှိနှိုင်းမှု မအောင်မြင်ပြီးနောက် ဒီဇင်ဘာလအစောပိုင်းတွင် စင်ကာပူနိုင်ငံတကာ အနုညာတဗဟိုဌာနသို့ ဖြေရှင်းပေးရန် တင်ပြခဲ့သည်။  သို့သော်လည်း တိုးတက်မှုမမျှော်လင့်နိုင်သောကြောင့်မြန်မာနိုင်ငံမှ နှုတ်ထွက်ရန် ဆုံးဖြတ်ခဲ့ခြင်းဖြစ်သည်။

ဂျပန်ကုမ္ပဏီက ထုတ်လုပ်မှုရပ်ဆိုင်းသည့် ထုတ်ကုန်များထဲတွင် မြန်မာဘီယာ၊ မန္တလေးဘီယာတို့လည်းပါဝင်သည်ဟုသိ့ရသည်။ ထိုဘီယာထုတ်လုပ်မှုများတွင် Kirin ကရှယ်ယာ ၅၁ ရာခိုင်နှုန်းအထိ ၂၀၁၇တွင်ဝယ်ယူပိုင်ဆိုင်ခဲ့သည်။ 

Kirin သည် စစ်တပ်အာဏာမသိမ်းမီ ကပင် စစ်တပ်နှင့်လက်တွဲထားသည့် မြန်မာ့ဘရူဝါရီကုမ္ပဏီကို ဖျက်သိမ်းပြီး မိတ်ဖက်အသစ်ရှာဖွေလုပ်ကိုင်ရန် စီစဥ်ခဲ့​သေးသည်။

စစ်တပ်အာဏာသိမ်းမူကြောင့် ဂျပန်နိုင်ငံ မစ်ဆူဘစ်ရှီ ကော်ပိုရေးရှင်း၏ကားအပိုပစ္စည်းထုတ်လုပ်​သော Bridgestoneကုမ္ပဏီသည် မြန်မာနိုင်ငံက ၂၀၂၁ခုနှစ်ဇွန်လတွင် ထွက်ခွာခဲ့သည်။ ထိုအပြင် ဂျပန် ကားထုတ်လုပ်​ရေးကုမ္ပဏီ Toyota ၊ ဂျပန် ငွေကြေးနှင့်လက်လီဝန်​ဆောင်မှုလုပ်ငန်း AEON စသည့် ဂျပန်ကုမ္ပဏီများလည်း မြန်မာနိုင်ငံကအသီးသီးထွက်ခွာခဲ့ ပြီး​နောက် Kirin ကုမ္ပဏီပါထွက်ခွာ​တော့မည် ဖြစ်သည်။

စစ်တပ်က ထုတ်​နေ​သောမြန်မာဘီယာအပါအဝင်ထုတ်ကုန်များမှာလည်း ပြည်သူများ ကစစ်တပ်ထုတ်ကုန်များအ​ပေါ်သပိတ်​မှောက်​​နေသဖြင့် ​ဈေးကွက်ပျက်​နေပြီဖြစ်သည်။

People's Spring