ပြည်သူများ တနေ့ စက်သုံးဆီ တလီတာ ချွေတာရန် စစ်ကောင်စီ ညွှန်ကြား

ပြည်သူများကို တနေ့လျှင် စက်သုံးဆီ တလီတာချွေတာရန် စစ်ကောင်စီထုတ် သတင်းစာ ယမန်နေ့ (ဖေဖော်ဝါရီ ၂)ရက်တွင် ထည့်သွင်းဖော်ပြထားသည်။

စက်သုံးဆီဈေးနှုန်းများသည် စစ်တပ်အာဏာမသိမ်းခင်က တစ်လီတာကျပ် ၆၀၀ ဝန်းကျင်သာ ရှိခဲ့ရာမှ လက်ရှိတွင် တစ်လီတာကို ကျပ် ၁၈၀၀ နီးပါးအထိ ဈေးနှုန်း မြင့်တက်လာကြောင်း လားရှိုးမြို့နယ်မှ စက်သုံးဆီရောင်းဝယ်ရေး လုပ်ငန်းရှင်တစ်ဦးက သျှမ်းသံတော်ဆင့်ကို ပြောသည်။

“ယာဥ်သွားဖို့လာဖို့ရှိလာရင် ဆီကတော့ မရှိမဖြစ်သုံးနေရမှာပဲလေ၊ ဘယ်လိုပဲ ချွေတာနေပါစေ သွားသလောက် ကုန်နေမှာပဲ၊ အခု စက်သုံးဆီဈေးနှုန်းက စစ်တပ်အာဏာမသိမ်းခင်ထက် ၃ ဆနီးနီး တက်လာတော့ တခြားပြည်သူတွေ မပြောနဲ့ ကျနော်တို့လို ပန့်ဆီဆိုင်ပိုင်ရှင်အနေနဲ့လည်း သွားဖို့လာဖို့ တော်တော် စဥ်းစားလိုက်ရတယ်” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။ 

လက်ရှိတွင် တစ်နေ့ထက်တစ်နေ့ မြင့်တက်လာသည့် စက်သုံးဆီဈေးနှုန်းများကြောင့် တချို့သော စက်သုံးဆီရောင်းဝယ်ရေးဆိုင်တချို့ ပိတ်သိမ်းရပ်နားထားရကြောင်း သိရသည်။

“သူများတော့ မသိဘူး၊ ကျမတို့ကတော့ စက်သုံးဆီမရောင်းနိုင်တော့ဘူး၊ ဆိုင်ထဲကျန်နေတဲ့ စက်သုံးဆီတွေကို ကျမတို့ သုံးဖို့အတွက် ထားထားလိုက်ရတယ်၊ အခုဝယ်ဈေးနဲ့ ပြန်ရောင်းရမယ့်ဈေးက မငြိမ်တော့ ကျမတို့လည်း မရောင်းရဲဘူး “ ဟု သီပေါမြို့မှ စက်သုံးဆီအရောင်းဆိုင် ပိတ်ထားလိုက်ရသည့် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

စစ်အာဏာသိမ်းပြီးနောက်ပိုင်း နိုင်ငံတကာမှ မြန်မာနိုင်ငံသို့ စက်သုံးဆီတင်ပို့မှု ရပ်တန့်ကာ စက်သုံးဆီ ဈေးနှုန်းတက်လာသည့်အပြင် တခြားသော ကုန်စည်ဈေးနှုန်းများလည်း တက်လာသည့်အတွက် ပြည်သူများအနေဖြင့် ခရီးသွားလာရေးနှင့် စားဖို့သောက်ဖို့ရုန်းကန်လှုပ်ရှားမှုများလည်း ခက်ခဲလာကြောင်း တောင်ကြီးမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။ 

“ဆီဈေးတွေက တစ်ရက်နဲ့တစ်ရက်တက်နေတာ နည်းတာ မဟုတ်ဘူးလေ၊ အဲ့လိုပဲ တခြားကုန်စျေးနှုန်းတွေလည်း တက်လာမှာပဲ၊ ဒီဆီဈေးနှုန်းတက်လို့ ကုန်တင်ကုန်ချတွေ သယ်ယူပို့ဆောင်ရေးတွေ စားသောက်ကုန်တွေလည်း တက်မှာပဲ၊ အဲ့တော့ ကျနော်တို့ ပြည်သူကပဲ စက်ဆီရှားပါး၊ ကုန်စည်ရှားပါးမှုနဲ့ ကြုံနေရတာ” ဟု တောင်ကြီးမြို့မှ အမျိုးသားတစ်ဦးက ပြောသည်။

စစ်အာဏာသိမ်းပြီးကာလမှ စတင်ပြီး လက်ရှိစက်သုံးဆီ ဈေးနှုန်းများသည် တစ်လီတာလျှင် ပျှမ်းမျ ကျပ် ၁၈၀၀ ဝန်းကျင်ခန့် ရှိနေပြီး စက်သုံးဆီဈေးနှုန်းတက်လာမှုကို ဖြေရှင်းမှုမပေး၊ ပြည်သူ့အခက်အခဲကို မငဲ့ဘဲ စက်ချွေတာရန်သာ ပြောဆိုနေသည့် စစ်ခေါင်းဆောင်ကို ပြည်သူများက ဝိုင်းဝန်းပြစ်တင် ဝေဖန်နေကြသည်။ 

ပြီးခဲ့သည့် ၂၀၂၁ ခုနှစ် နိုဝင်ဘာလတုန်းကလည်း စစ်ကောင်စီခေါင်းဆောင်က ပြည်သူများ ဆန် စားသုံးမှုကို ပုံမှန်ထက် ၁၀ ရာခိုင်နှုန်း လျော့ချပြီး စားသောက်ရန် ပြောဆိုထားတာ တွေ့ရသည်။

သျှမ်းသံတော်ဆင့် / SHAN News (Burmese Version)