ဖေဖော်ဝါရီလ ၁၈ရက်နေ့ တိုက်ပွဲ စစ်ကောင်စီတပ်မှ အရာရှိအရာခံအပါအဝင် ၂၅ဦးထက်မနည်းသေဆုံး၊ လေကြောင်းဖြင့်တိုက်ခိုက်ခဲ့

Photo - DMO- PDF

ရှမ်း-ကယားနယ်စပ် ဝီသဲကူး(မြောက်ရွာ) မှာ ဒီကနေ့ ဖေဖော်ဝါရီလ ၁၈ရက်နေ့မှာ တိုက်ပွဲဖြစ်ပွားခဲ့ပြီး စစ်ကောင်စီတပ်မှ အရာရှိအရာခံအပါအဝင် ၂၅ဦးထက်မနည်းသေဆုံးပြီး ထိခိုက်ဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်-ဒီးမော့ဆို က သတင်းထုတ်ပြန်ပါတယ်။

အထိနာတဲ့ စစ်ကောင်စီတပ်မှ သံချပ်ကာအမြှောက်ကား ၂စီး ပစ်ကူခဲ့သလို ညနေ ၄နာရီကျော်မှာ တိုက်လေယာဉ်နှစ်စီးနဲ့ လာရောက်ဗုံးကြဲတိုက်ခိုက်ခဲ့တယ်လို့ သိရပါတယ်။  

တိုက်ပွဲအတွင်း DMO-PDF ဖက်က တပ်ဖွဲ့ဝင် ၃ဦး ထိခိုက်ဒဏ်ရာရရှိခဲ့သလို မဟာမိတ်ပူးပေါင်းတပ်ကလည်း ထိခိုက်မှုရှိတယ်လို့ ထုတ်ပြန်ထားပါတယ်။

ဒီကနေ့တိုက်ပွဲမှာ ပြည်သူ့ကာကွယ်ရေးတပ်-ဒီးမော့ဆို(DMO-Local PDF)၊ မိုးဗြဲ PDF၊ လွိုင်ကော် PDF၊ ဖယ်ခုံ PDF၊ KA ၊ KNDF၊ KGZ ၊JPDF ၊GZ-21 နဲ့ အခြား မဟာမိတ်တပ်ပေါင်းစုများ ပူးပေါင်းပြီး စစ်ကောင်စီနဲ့ ထိတွေ့တိုက်ပွဲဖြစ်ပွားခဲ့တာဖြစ်ပါတယ်။

ရှမ်း-ကယားနယ်စပ်မှာ စစ်ကောင်စီတပ်ဖက်က အထိနာနေတဲ့အတွက် အင်အားအလုံးအရင်းနဲ့ ထပ်မံဖြည့်တင်းနေတယ်လို့ သိရပါတယ်။

ဖေဖော်ဝါရီလ ၁၆ရက်နေ့မှ ဒီကနေ့အထိ ၃ရက်ဆက်တိုက် ရှမ်း-ကယားနယ်စပ်မှာ တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီဖက်က ထိခိုက်သေဆုံးမှုရှိသလို ကရင်နီပူးပေါင်းတပ်ဖွဲ့ဖက်ကလည်း အကျအဆုံးရှိနေပါတယ်။ ဒါ့အပြင် ဒေသခံနေအိမ်အများအပြားကိုလည်း စစ်ကောင်စီက မီးရှို့ဖျက်ဆီးခဲ့တယ်လို့ သိရပါတယ်။

Kantarawaddy Times