က​လေးမြို့တွင်တိုက်ပွဲဖြစ်​နေ၊ လက်နက်ကြီး၊လက်နက်ငယ်ပစ်ခတ်သံများတစ်မြို့လုံးကြား​နေရ

(က​လေးမြို့တွင် ​ဖော်​ဖော်ဝါရီ ၁ ရက်က အသံတိတ်သပိတ်ကို တစ်မြို့လုံးပါဝင်ဆင်နွှဲခဲ့သည်။ ဓါတ်ပုံ-CJ)

ကလေးမြို့တွင် ယနေ့ညတိုက်ပွဲဖြစ်ပွား​နေပြီး လက်နက်ကြီး၊ လက်နက်ငယ်များ ပစ်ခတ်သံများနှင့် ပေါက်ကွဲသံများကျယ်​​လောင်စွာကြား​နေရ​ကြောင်း​ဒေသခံများက​​ပြောသည်။ 

ထို့အပြင်အကြမ်းဖက်စစ်ကောင်စီတပ်မှ တပ်အရွှေ့အပြောင်း အမြောက်အများပြုလုပ်နေ​ကြောင်းလည်း ကလေးမြို့ခံများကပြောသည်။ 

ယနေ့ည ၇ နာရီခန့်မှစတင်ပြီး ကလေးမြို့အတွင်း တိုက်ပွဲကြီးဖြစ်​နေသကဲ့သို့ ပေါက်ကွဲသံများနှင့်ပစ်ခတ်သံများ တစ်မြို့လုံးဆူညံ​နေပြီး ည ၉နာရီအထိ အကြမ်းဖက်စစ်​ကောင်စီတပ်ဘက်မှ တပ်အပြောင်းအရွှေ့ ပြုလုပ်နေသည်ဟု ​ဒေသခံများကပြောသည်။ 

“အခုညတော့ စစ်တပ်ဘက်က လက်နက်ကြီးတွေက စက္ကန့်မလပ်ပစ်ခတ်နေတယ်။ သူတို့က အထိနာနေလို့ လက်နက်ကြီးတွေပစ်နေတာ။ တမြို့လုံးလဲကြောက်လန့်နေတယ်” ဟု ကလေးမြို့ခံတစ်ဦးကပြောသည်။ 

လက်ရှိပစ်ခတ်မူများသည် အကြမ်းဖက်စစ်ကောင်စီတပ်စခန်းများကို ဒေသခံကာကွယ်ရေးတပ်များက ဝင်ရောက်တိုက်ခိုက်ခြင်းကြောင့် စစ်ကောင်စီတပ်မှ ရမ်းသန်းပစ်ခတ်နေခြင်းဖြစ်နိုင်သည်ဟု အထက်ပါမြို့ခံက​ပြောသည်။ 

“လက်နက်ကြီးတွေ ပစ်နေတဲ့ အကြိမ်အရေအတွက်အရဆိုရင် စစ်တပ်ကလူတွေ အထိနာနေပြီဆိုတာတွက်လို့ရပါတယ်။တမြို့လုံးကတော့ စစ်ပွဲထဲကို ရောက်နေတဲ့အတိုင်းဘဲ”ဟု အခြားကလေးမြို့ခံတစ်ဦးကလည်းပြောသည်။ 

လက်ရှိတွင် ကလေးမြို့တောင်ပိုင်းသို့ စစ်ကားများမောင်းနှင်သွားပြီး မြို့တွင်းတွင်လည်း ကင်းပုန်းများ ချထားသည်ဟု ကလေးမြို့ခံများကပြောသည်။ 

“ဒီညတော့ စစ်တပ်လက်အောက်ခံ ပျူစောထီးတွေ အကျအဆုံးများတယ်”ဟု ဒေသခံကာကွယ်ရေးတပ်နှင့်နီးစပ်သူတစ်ဦးပြောသည်။ လက်ရှိတွင်လည်း နှစ်ဖက်ထိပ်တိုက်တွေ့သည့် အနေအထားဖြစ်နေ၍ အသေးစိပ်ကို မသိရသေးဟု ၎င်းကဆက်​ပြောသည်။

က​လေးPDF ၊ CDF(က​လေး၊ က​ဘော်၊ဂန့်​ဂေါ် ) စ​သော​ဒေသခံ ပြည်သူ့ကာကွယ်​ရေးတပ်ဖွဲ့များက ယ​နေ့ည တိုက်ပွဲနှင့်ပါတ်သပ်၍ ည ၁၁ နာရီအထိ့ ထုတ်ပြန်ထားခြင်းမရှိ​သေး​ပေ။

ကလေးမြို့တွင်း စစ်ရေးတင်းမာလျက်ရှိပြီး ယမန့်နေ့ မနက် ၆ နာရီခန့်က ဒေသခံကာကွယ်ရေးတပ်များက ကလေးမြို့တောင်ပိုင်း ကြံသာရွာတွင်တပ်စွဲထားသည့် အကြမ်းဖက်စစ်တပ်ကို သွားရောက်တိုက်ခိုက်ရာတွင် အကြမ်းဖက်စစ်သား ၂ ဦးသေဆုံးခဲ့သည်။ ဒေသခံကာကွယ်ရေးတပ်မှ နှစ်ဦး မစိုးရိမ်ရဒဏ်ရာရရှိခဲ့သည်။ 

ထိုအပြင် ယမန်​နေ့ည ၁၀ နာရီခန့်တွင်လည်း ကလေးမြို့တောင်ပိုင်းကိုမောင်းနှင်လာသည့် အကြမ်းဖက်စစ်ကောင်စီ ကားတစ်စီးကို မိုင်းခွဲတိုက်ခိုက်ရာအကြမ်းဖက်စစ်ကောင်စီ တပ်သား ၃ ဦးသေဆုံးခဲ့သည်ဟုသည် PDF(ကလေး)ကထုတ်ပြန်ထားသည်။

People's Spring