ကျောက်မဲစစ်ရှောင်တစ်ဦး စစ်ကောင်စီ ဖမ်းဆီး ရိုက်နှက် သေဆုံး

ဖေဖော်ဝါရီ ၉

သျှမ်းပြည် မြောက်ပိုင်း ကျောက်မဲမြို့နယ်အတွင်းသို့ စစ်ရှောင်လာသည့် ပြည်သူတစ်ဦးကို စစ်ကောင်စီမှ ဖမ်းဆီး နှိပ်စက်ခဲ့ကာ သေဆုံးသွားကြောင်း သတင်းသိရသည်။ 

ပြီးခဲ့သည့် ဖေဖော်ဝါရီ ၂ ရက်နေ့ ညပိုင်းတွင် ကျောက်မဲမြို့ ရပ်ကွက် ၉ တိလင်ရပ်တွင် နေထိုင်သည့် စစ်ဘေးရှောင်တစ်ဉီးကို စစ်ကောင်စီ မှ ဖမ်းဆီးသွားပြီးနောက် ရိုက်နှက်ခံထားရသည့် ဒဏ်ရာများဖြင့် သေဆုံးသွားသည်ဟု ဒေသခံများထံမှ သိရသည်။ 

“သူ့ကို လာဖမ်းတုန်းက ဖုန်း၊ လပ်တော့ပ်တွေကိုလည်း ယူသွားတယ်။ အမျိုးသမီးတစ်ဉီးရဲ့ ဆွဲကြိုးကိုလည်း ယူသွားတယ်တဲ့။ ညမှာ လာဖမ်းသွားတာ။ စစ်သားရော အရပ်ဝတ်နဲ့လူတွေလည်း ပါတယ်။ ဖမ်းပြီး နောက်တစ်ရက် ဆေးရုံမှာရောက်နေပြီ သေသွားပြီလို့ သိရတယ်။ ရိုက်နှက်ထားတဲ့ ဒဏ်ရာတွေတော့ များတယ်” ဟု ကျောက်မဲ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။ 

အဆိုပါ သေဆုံးသွားသည့် စစ်ရှောင် အမျိုးသားသည် အသက် ၄၄ နှစ်အရွယ် စိုင်းထွန်းထွန်းဝင်းဖြစ်ပြီး ပြီးခဲ့သည့် ၂၀၂၁ ခုနှစ်က တော့ဆန်ကျေးရွာအုပ်စုမှ တိုင်းရင်းသားလက်နက်ကိုင်အချင်းချင်းကြား တိုက်ပွဲဖြစ်ပွားမှုကြောင့် မြို့ပေါ်သို့ စစ်ရှောင်လာရောက်နေထိုင်နေတာဖြစ်ကြောင်း သိရသည်။ 

စစ်ကောင်စီတို့သည် ကျောက်မဲ ဒေသခံများကို မကြာခဏ ဖမ်းဆီးမှုများ ရှိနေကြောင်း ဒေသခံများက ပြောသည်။ 

“ဖမ်းတာက ဖမ်းတယ်။ ဘယ်နှယောက်ကို ဖမ်းသွားလဲ ဆိုတာတော့ သေချာ မသိရဘူး။ ကုန်းသာ ရွာဘက်ကလည်း ဖမ်းခံရတဲ့သူ ရှိတယ်။ သူတို့ ဖမ်းသွားတာက ယောက်ျားလေးတွေပဲ။ သက်ကြီး တစ်ယောက်ဆို ဖမ်းခံရလို့ သူ့သမီးမင်္ဂလာပွဲတောင် မလုပ်နိုင်တော့ဘူး” ဟု အထက်ပါ အမျိုးသားတစ်ဦးက ပြောသည်။ 

ပြီးခဲ့သည့် ဇန်နဝါရီ လကုန်ပိုင်းကတည်းက ကျောက်မဲတွင် ဒေသခံ အမျိုးသား ၄ ဦးထက်မနည်းကို စစ်ကောင်စီတို့ ဖမ်းဆီးသွားသည်ဟု ဒေသခံများက ဆိုသည်။ 

“သူတို့(စစ်ကောင်စီ)တွေ ဖမ်းဆီးနေတာက တမင်လုပ်စားနေသလိုပဲ။ ဘာလို့ဆိုရင် သူတို့ဖမ်းသွားတဲ့သူက ဘယ်အဖွဲ့နဲ့မှလည်း မချိတ်ဘူး။ ကျနော်သိရသလောက်ဆို တကယ့် ရိုးရိုးပြည်သူတွေကိုလည်း ဟိုအဖွဲ့ ဒီအဖွဲ့နဲ့ ဆက်စပ်တယ် ဆိုပြီး စွပ်စွဲဖမ်းဆီးသွားတာ။ ပြီးတော့ ပိုက်ဆံတွေ ရွှေတွေပါ ယူသွားတယ်။ ခုချိန်က အားလုံး ခက်ခက်ခဲခဲနဲ့ ရုန်းကန်နေရတာ။ စစ်ကောင်စီတွေ ဒီလို လုပ်နေတော့ ပိုပြီး ခက်ခဲတယ်။ အမြဲတမ်းသတိထားပြီး နေနေရတာ” လို့ ကျောက်မဲမှ သက်ကြီး အမျိုးသားတစ်ဦးက ပြောသည်။ 

ကျောက်မဲတွင် ပြီးခဲ့သည့် ဇန်နဝါရီလ ၂၃ ရက်နေ့တွင်လည်း ရပ်ကွက် ၇ မှ အမျိုးသားတစ်ဦးအား ဖမ်းဆီးသွားပြီး ၂၄ ရက်တွင် ပြန်လွှတ်ပေးခဲ့ကြောင်း သိရသည်။ 

ထို့အပြင် မြို့တွင်း လမ်းများပေါ်တွင်လည်း စစ်ကောင်စီတပ်သားနှင့် ရဲများက လမ်းသွားလမ်းလာ ပြည်သူများအား တားဆီးစစ်ဆေးခြင်း၊ ဖုန်းများကို စစ်ဆေးခြင်းနှင့် နေအိမ်တွင်း ဝင်ရောက်စစ်ဆေးခြင်းများလည်း ပိုမိုပြုလုပ်နေကြောင်း ဒေသခံများထံမှ သိရှိရသည်။

SHAN News (Burmese Version)