စစ်ကိုင်းမြို့နယ်တွင် စစ်ကောင်စီတပ်သား ၄၀ခန့်လိုက်ပါလာသည့် ၁၂ဘီးကား မိုင်းဆွဲတိုက်ခိုက်ခံရပြီး ထိခိုက်သေဆုံးမှုများနိုင်

ဖေဖေါ်ဝါရီ ၈

စစ်ကိုင်းမြို့နယ်အတွင်း စစ်ကိုင်း-ရွှေဘိုကားလမ်းမပေါ်မှာ စစ်ကောင်စီတပ်သားများလိုက်ပါလာသည့် ၁၂ဘီးကားတစီးကို ပြည်သူ့ကာကွယ်ရေးတပ်ဖွဲ့မှ မိုင်းဆွဲတိုက်ခိုက်ခဲ့တယ်လို့သိရပါတယ်။

 ဆားတောင်မြို့ ညောင်ငုပ်တိုရွာအနီးကို တောနင်းခဲ့ပြီး ပြန်ထွက်လာတဲ့ စစ်ကောင်စီတပ်သား အင်အား ၄၀ခန့်က ဒိုင်နာတစီးနှင့် အိမ်စီးကား၄စီး အသုံးပြုပြီး ဆားတောင်အရောက်မှာ ၁၂ဘီးကားပြောင်းပြီး စစ်ကိုင်းဘက်ထွက်လာရာ ယနေ့ဖေဖေါ်ဝါရီလ ၈ရက်နေ့ နေ့လည် ၂:၅၅နာရီအချိန်မှာ  စစ်ကိုင်းမြို့နယ် ရုန်ပင်ကန်ရွာအလွန် ဂရိတ်ဆီဆိုင်အနီး မိုင်းဆွဲတိုက်ခိုက်ခံခဲ့ရတာပါ။

ဒီတိုက်ခိုက်မှုကိုတော့ စစ်ကိုင်းခရိုင်တပ်ရင်း(၃ )မှ ရဲဘော်များနှင့် စစ်ကိုင်းမြို့နယ် ပ.က.ဖတပ်ဖွဲ့တို့ ပူးပေါင်းတိုက်ခိုက်ခဲ့တာလို့သိရပါတယ်။

ပြည်သူ့ကာကွယ်ရေးတပ်မှ တာဝန်ရှိသူက "ကျနော်တို့ ရှေ့ထွက်မိုင်း ၄လုံးနဲ့ဆွဲလိုက်တာ၊ ဒီကောင်တွေအကျအဆုံးများနိုင်တယ်၊ အုန်းတောတပ်ထဲကနေ အမြှောက်နဲ့ရမ်းပြီးပစ်တယ်ဗျ" လို့ပြောပါတယ်။

မိုင်းဆွဲခံရတဲ့နေရာကို လူနာတင်ယာဉ် ၅စီးနဲ့ ရောက်လာပြီး သေဆုံးထိခိုက်တဲ့စကစတပ်သားတွေကို တင်ဆောင်သွားတယ်လို့သိရပါတယ်။

စစ်ကိုင်းမြို့နယ် သတင်းမှန်ပြန်ကြားရေး