"စခတ(၁၀)တပ်ကို ပုံမှန်ဈေးဝယ်ပေးသည့် ရိက္ခာတာဝန်ခံတစ်ဦး တပ်ကပေးလိုက်သော သံတိုသံစထုတ်ကို ပြန်ရောင်းရန် ယူလာစဉ် အထုတ်ထဲမှ ပေါက်ကွဲမှုဖြစ်ပွား"
26.2.2022(SAT)
ယနေ့ ဖေဖော်ဝါရီ(၂၆)ရက်၊ နေ့လည် ၂ နာရီ ၁၅ ခန့်တွင် အရာတော်မြို့၊ အမှတ်(၃)ရပ်ကွက်ရှိ သံတိုသံစရောင်းဝယ်သောဆိုင်တစ်ဆိုင်ရှေ့၌ ပေါက်ကွဲမှုဖြစ်ပွားခဲ့သည်။
အရာတော်အရှေ့တပ်(စခတ-၁၀) ဈေးဝယ်တာဝန်ခံ ကိုမိုးဆိုသူသည် ယနေ့ နေ့လည် ၂ နာရီခန့်တွင် အမှတ်(၃)ရပ်ကွက်ရှိ သံတိုသံစဝယ်ယူသောဆိုင်သို့ သုံးဘီးဆိုက်တွဲဖြင့်ရောက်ရှိလာပြီး တပ်ထဲမှ ၎င်းကို ပေးလိုက်သော သံတိုသံစအထုတ်ကို ပြန်လည်ရောင်းချရန် ဆိုင်ရှေ့သို့ အချတွင် အဆိုပါအထုတ်က ရုတ်တရက်ပေါက်ကွဲခဲ့ခြင်းဖြစ်သည်ဟု သိရသည်။
"အသံက အကျယ်ကြီးပဲ။ မြေကြီးပါ တုန်သွားတာ။ ခါတိုင်းတော့ မြို့ထဲ အသံကြားတာနဲ့ စစ်သားတွေ ရောက်ရောက်လာတာပဲ။ ဒီတခါကျ ခဏနေတော့ ရဲသား ၄၊ ၅ ယောက်လောက်ပဲ လာကြည့်တယ်။ လူကတော့ သွေးတွေရဲနေတာပဲ။ ခြေထောက်ထိသွားတယ်လို့ ပြောတယ်။"ဟု မျက်မြင်မြို့ခံတစ်ဦးက သတင်းမှန်ကို အတည်ပြုပေးထားသည်။
ထိခိုက်ဒဏ်ရာရသွားသူ ကိုမိုးသည် ယခင်ကတည်းက စခတ(၁၀)တပ်အတွက် ၃ ဘီးဆိုက်တွဲဖြင့် ရိက္ခာပုံမှန်ဝယ်ယူပို့ဆောင်ပေးသူဖြစ်ကာ စစ်အာဏာသိမ်းပြီးနောက် အရှေ့တပ်မှ ဈေးကားလည်း အရာတော်မြို့တွင်းသို့ မလာရဲတော့သဖြင့် ၎င်းက အရှေ့တပ်အတွက် ရိက္ခာစိုကို တာဝန်ယူပို့ဆောင်ပေးနေခဲ့သည်ဟု နီးစပ်အသိုင်းအဝိုင်းထံမှ သိရှိရသည်။
အရာတော်မြို့နယ် သတင်းမှန်ပြန်ကြားရေး
Reviewed by THITHTOOLWIN
on
01:06
Rating:
No comments:
Post a Comment