မြောင်နယ်က အသက်(၅၀)ကျော်အရွယ် CDM ကျောင်းဆရာကို စကစ ဖမ်းဆီးပြီး မီးရှို့သတ်ဖြတ်

စစ်ကိုင်းတိုင်း မြောင်မြို့နယ်က အသက်(၅၀)ကျော်အရွယ် CDM ကျောင်းဆရာတစ်ဦးကို စစ်ကောင်စီ လက်နက်ကိုင်တွေက ဖမ်းဆီးပြီး မီးရှို့သတ်ဖြတ်သွားတယ်လို့ ကျန်ရစ်သူ မိသားစုဝင်တွေက MFP ကို ပြောပါတယ်။

ပြီးခဲ့တဲ့ ဒီဇင်ဘာ ဒုတိယအပတ်က မြောင်မြို့နယ်အတွင်းက ကျေးရွာတွေကို စစ်ကောင်စီ လက်နက်ကိုင်တွေ ရွာစဉ်ပတ်မွှေပြီး ဒေသခံ အရပ်သားနဲ့ ကာကွယ်ရေး တပ်ဖွဲ့ဝင်တွေကို ဖမ်းဆီးသတ်ဖြတ်ရာမှာ CDM အလယ်တန်းပြ ကျောင်းဆရာ ဦးညီညီစိန်ကိုပါ ဖမ်းဆီးပြီး မီးရှို့သတ်ဖြတ်သွားတာလို့ မိသားစုဝင်တွေက ဆိုပါတယ်။

ဆရာ ဦးညီညီစိန်ဟာ  မြောင်မြို့နယ် ပေါက်တောရွာက ဖြစ်ပြီး ဒီဇင်ဘာ(၁၇) ရက်မှာ စစ်ကောင်စီတပ်တွေရဲ့ ဖမ်းဆီး မီးရှို့သတ်ဖြတ်တာကို ခံခဲ့ရသူပါ။

စစ်ကောင်စီ လက်နက်ကိုင်တွေ ပေါက်တောရွာကို စီးနင်းထားလို ရွာလုံးကျွတ် ထွက်ပြေးနေရချိန် ဒီဇင်ဘာ(၁၇)ရက်မှာ ဆရာဦးညီညီစိန်က ရွာသူရွာသားတွေ အိမ်ပြန်နိုင်ဖို့ ရွာထဲမှာ စကစတွေ ရှိ၊မရှိ သွားကြည့်ခဲ့ပါတယ်။ အဲ့ဒီလို သွားရောက် စနည်းနာချိန်မှာ စစ်အုပ်စုရဲ့ ဖမ်းဆီးတာ ခံလိုက်ရပြီး မီးရှို့သတ်ဖြတ်ခံခဲ့ရတာလို့ မိသားစုဝင်တွေက ပြောပါတယ်။

''ရွာသူရွာသားတွေ အဲချိန်က ရှောင်ရတာ တော်တော်ခက်ခဲတယ်။ ကျည်ဆံတွေ လာတော့ကျ ရေတွေထဲ ခုန်ချပြီး ခေါင်းလေးပဲ ဖော်နေရတယ်။ ချုံထဲမှာ ပုန်းနေရတဲ့သူတွေပေါ့။ အဲလို လူတွေ ခက်ခဲနေတဲ့အတွက် သူက ရွာထဲကို စစ်သားတွေ ရှိမရှိ ဝင်ကြည့်တာပေါ့။ ဝင်ကြည့်ရင်းနဲ့မှ မိသွားတာဖြစ်ပါတယ်'' ဟု မိသားစုဝင် တစ်ဦးက ဆိုပါတယ်။

CDM ကျောင်းဆရာ ဦးညီညီစိန်ဟာ ရပ်ရွာကာကွယ်ရေး အဖွဲ့မှာလည်း ရပ်မိရပ်ဖ ခေါင်းဆောင်တစ်ဦးအနေနဲ့ ပါဝင်ကြောင်း၊ ဒါ့အပြင် ရွာမှာ မော်တာပျက်တာ၊ ထော်လာဂျီပျက်တာကစ သူ့ကိုပဲ အားကိုးကြပြီး ရပ်ရေးရွာရေးကိုလည်း ဦးဆောင်လုပ်ကိုင်သူဖြစ်တယ်လို့ တပည့်ဖြစ်သူက ဆိုပါတယ်။ 

''ရှင်းရှင်းပြောမယ်ဆိုရင် စစ်ကောင်စီရဲ့ အုပ်ချုပ်မှုလည်းမရှိ စစ်ကောင်စီအုပ်ချုပ်မှုလည်း ပြည်သူက လက်မခံ၊ နောက်ပြီးတော့ NUG အစိုးရရဲ့ အုပ်ချုပ်မှုကလည်း မရှိတဲ့အခါမှာ သူ့ရွာမှာ ကျောင်းဆရာတစ်ယောက်ရဲ့ ဂုဏ်သိက္ခာနဲ့အညီ ဆရာ့ကျင့်ဝတ်တွေနဲ့ ရပ်ရွာကို ခိုးဆိုး လုနှိုက်တွေရန်က ဖြေရှင်ပေးတဲ့သူ တစ်ယောက်လည်း ဖြစ်တယ်။ ဒါကြောင့် တစ်ရွာလုံးက အားကိုးယုံကြည်တယ်။ ချစ်ခင်တယ်။ သူ့ရဲ့စကားကိုလည်း နားထောင်ကြတယ်။ သူကိုယ်တိုင်ကလည်း အဂတိ ကင်းကင်းနဲ့ သမာသမတ်ကျကျ နေထိုင်တဲ့ ကျောင်းဆရာတစ်ယောက်လည်း ဖြစ်တယ်'' 

စစ်ကောင်စီဟာ ပြီးခဲ့တဲ့ ဒီဇင်ဘာ ဒုတိယအပတ်အတွင်းက မြောင်မြို့နယ်အတွင်းက ကျေးရွာတွေကို ရွာစဉ်ပတ်မွှေ သောင်းကျန်းပြီး ဒေသခံ အရပ်သားပြည်သူနဲ့ ဒေသကာကွယ်ရေးအဖွဲ့ဝင် (၁၁)ဦးထက်မနည်းကို သတ်ဖြတ်ခဲ့ပါတယ်။

အဲ့ဒီလို ဒေသခံတွေကို သတ်ဖြတ်ရာမှာ တိုက်ပွဲဖြစ်ပွားတာကြောင့် မဟုတ်ဘဲ စစ်ကောင်စီက ကျေးရွာတွေကို စီးနင်းဝင်ရောက်ပြီး သူတို့ ဖမ်းမိတဲ့ ဒေသခံ ရွာသားတွေကို အနီးကပ် ပစ်သတ်တာ၊ မီးရှို့သတ်ဖြတ်တာတွေ လုပ်ဆောင်ခဲ့တာလို့ မြောင်ဒေသခံတွေက ပြောပါတယ်။

စစ်ကောင်စီက အရပ်သားတွေကို ဖမ်းဆီးသတ်ဖြတ်ခဲ့တာနဲ့ ပတ်သက်ပြီး မြောင် PDF တပ်ဖွဲ့ဝင်တစ်ဦးက အခုလို ပြောပါတယ်။

''သနပ်ကုန်းကျေးရွာက ၉ ရက်နေ့က နှစ်ယောက်၊ ၁၀ ရက်နေ့မှာ သုခဒီပက နှစ်ယောက်၊ ၁၁ ရက်နေ့မှာကျတော့ မြစ်ဆုံကျေးရွာက သုံးယောက် ရွှေလှံရွာထဲမှာ ပစ်သတ်သွားတာ။ အဲနောက်ရက် မနက်ခင်းမှာ ခေါင်းခွဲကျေးရွာက လေးယောက်။ စုစုပေါင်း ၁၀ ယောက်။ အဲနောက်ပိုင်း ထပ်ပြီးတော့ ခေါင်းခွဲကျေးရွာကနေပြီးတော့ကျတော့ စိတ်မနှံ့တဲ့ အရူးတစ်ယောက်ကိုလည်း ဒီတိုင်းပဲ ပစ်သတ်သွားတယ်။ ၁၁ ယောက် စုစုပေါင်း။ ရွာစဉ်ရွာငယ်လှည့်ပတ်ပြီးတော့ကျ မိသမျှလူ အကုန်ပစ်သတ်နေတဲ့ အနေအထားမျိုး''

လက်ရှိမှာလည်း စစ်ကောင်စီတပ်ဖွဲ့တွေဟာ မြောင်မြို့နယ်အပါအဝင် စစ်ကိုင်းတိုင်းအတွင်း ကျေးရွာတွေက ဒေသခံတွေကို သတ်ဖြတ်တာ၊ နေအိမ်တွေကို မီးရှို့တာ၊ ရွာတွေကို ဝင်ရောက်မွှေနှောက်ဖျက်ဆီးတာတွေကို လုပ်ဆောင်လျက်ရှိပါတယ်။

Mandalay Free Press - MFP