PDF-GanGaw မိုင်းဆွဲတိုက်ခိုက်ခဲ့ရာ အကြမ်းဖက်စစ်ကောင်စီတပ်ဖွဲ့ဝင် ၂၀ ဦး သေဆုံး

မကွေးတိုင်းဒေသကြီး ၊ ဂန့်ဂေါမြို့နယ်ပြည်သူ့ကာကွယ်ရေးတပ်များ ဒီဇင်ဘာလ ၂၆ ရက်၊ ၂၇ ရက်နှင့် ၂၈ တို့၌ မိုင်းဆွဲတိုက်ခိုက်ခဲ့ရာ အကြမ်းဖက်စစ်ကောင်စီတပ်ဖွဲ့ဝင် ၂၀ ဦးသေဆုံးခဲ့သည်။ 

ဒီဇင်ဘာလ ၂၆ ရက်၌ ကလေး-ဂန့်ဂေါကားလမ်း လမ်းပိုင်းတွင် ဂန့်ဂေါမှ ကလေးဘက်သို့ စစ်ကြောင်းထိုးလာသော အကြမ်းဖက်စစ်ကောင်စီယာဉ်တန်းကို PDF-GanGaw တပ်ခွဲ(၁၇) ကြယ်ဖြူအဖွဲ့က မိုင်းဆွဲတိုက်ခိုက်ခဲ့ရာ အကြမ်းဖက် စစ်ကောင်စီတပ်သား ၇ ဦး သေဆုံးခဲ့သည်။

ဆက်လက်၍ စစ်ကြောင်းထိုးလာသော အကြမ်းဖက် စစ်ကောင်စီယာဉ်တန်းကို ဒီဇင်ဘာလ ၂၇ ရက်တွင် PDF-GanGaw တပ်ရင်း (၁) ပြောက်ကျားတပ်ဖွဲ့မှ မိုင်းဖြင့်တိုက်ခိုက်ခဲ့ရာ စစ်ကောင်စီတပ်သား ၅ ဦးသေဆုံးသွားကြောင်း အတည်ပြုနိုင်ခဲ့သည်။

ထို့နောက် ယနေ့ ဒီဇင်ဘာလ ၂၈ ရက် နံနက်ပိုင်းတွင် အဆိုပါ အကြမ်းဖက်စစ်ကောင်စီ ယာဉ်တန်းကို PDF-GanGaw  တပ်ခွဲ (၂၁) ဗိုလ်ရွှေကျားအဖွဲ့က မိုင်းဖြင့် တိုက်ခိုက်ခဲ့ရာ အကြမ်းဖက်စစ်ကောင်စီ တပ်သား ၆ ဦး သေဆုံးခဲ့သည်။ 

နေ့လယ်ပိုင်းတွင်လည်း ဆိုင်ကယ်ငါးစီးဖြင့် တောင်ခင်ရန်းရဲစခန်းမှ ကင်းလှည့်ထွက်လာ‌သော ရဲခွေးများကို PDF-GanGaw တပ်ခွဲ (၂၅) စွန်ရဲအဖွဲ့မှ လျှပ်တပြက် ချောင်းမြောင်းတိုက်ခိုက်ခဲ့ရာ ရဲဆိုင်ကယ် နှစ်စီးမိုင်းထိပြီး ရဲ ၂ ဦး သေဆုံးခဲ့သည်။ 

​ ဒီဇင်ဘာလ ၂၆ ရက်နေ့မှစ၍ ဂန့်ဂေါ-ကလေးကားလမ်း လမ်းပိုင်းတွင် အကြမ်းဖက်စစ်ကောင်စီ တပ်များနှင့် ဒေသတွင်းပူးပေါင်းတော်လှန်ရေး အင်အားစုများအကြား ထိတွေ့ရင်ဆိုင်မှုများ ပြင်းထန်စွာ ဖြစ်ပွားနေပါသည်။

 ထိုသို့ထိတွေ့မှုဖြစ်ပွားရာ နေရာများတွင် အကြမ်းဖက်စစ်ကောင်စီဖက်မှ လက်နက်ကြီးများဖြင့် ရမ်းသမ်းပစ်ခတ်နေကြသည်။

ထို့ကြောင့် မိဘပြည်သူများအနေဖြင့် ကလေး-ဂန့်ဂေါကားလမ်း လမ်းပိုင်းအတွင်း ယခုရက်ပိုင်း အသွားအလာ ဆင်ခြင်ကြပါရန်နှင့် လုံခြုံဘေးကင်းစွာနေထိုင်ကြပါရန် လေးစားစွာ အနူးအညွတ် မေတ္တာရပ်ခံ အသိပေးအပ်ပါသည်ဟု ​​​PDF-GanGaw က ယနေ့ ဒီဇင်ဘာလ ၂၈ ရက်တွင် ထုတ်ပြန်ထားသည်။

သံလွင်ခက် - Than Lwin Khet News