ချင်းပြည်နယ် ထန်တလန် မြို့ပေါ်က AG ခရစ်ယာန် ဘုရားကျောင်းအနီး ဒီဇင်ဘာ ၈ ရက်နေ့က တိုက်ပွဲ အတွင်း CDF တပ်ဖွဲ့၀င် ၃ယောက် ကျဆုံးခဲ့ပြီး အလောင်းတွေကို နောက်တနေ့မှာ သွားကောက်တဲ့ အခါ ခေါင်းဖြတ်ထားတာ တွေ့ရတယ်လို့ CDF ထန်တလန် ပြောခွင့်ရသူက ပြောပါတယ်။
ကျဆုံးသူသွားသူတွေကတော့ ဆလိုင်းရမ်လျန်ပဲန်၊ ဆလိုင်းဗန်ထာကျဲအိုနှင့် ဆလိုင်းဘွေဇာအုပ် တို့ဖြစ်တယ်လို့ ပြောပါတယ်။
အခြား CDF တပ်ဖွဲ့၀င် ၃ ဦးနဲ့ CNA တပ်ဖွဲ့၀င် ၁ ဦးလည်း ဒဏ်ရာရခဲ့ ကြတယ်လို့ သူက ပြောပါတယ်။
ပြီးခဲ့တဲ့ မေလကစလို့ စစ်ကောင်စီ တပ်တွေနဲ့ ချင်းပြည်နယ်က ဒေသကာကွယ်ရေး တပ်တွေ တိုက်ပွဲ ဖြစ်ပွားလျက် ရှိရာမှာ အခု ၃ယောက် ကျဆုံးတာဟာ CDFထန်တလန် အတွက် ပထမဆုံး ဖြစ်ပြီး အလောင်းတွေကို ခေါင်းဖြတ်ထားတဲ့ အပေါ် အကြီးအကျယ် တုန်လှုပ်မိတယ်လို့ CDF ထန်တလန်က ပြော ပါတယ်။
ပြီးခဲ့တဲ့ ဗုဒ္ဓဟူးနေ့က ထန်တလန်မြို့မှာ နေ့လယ် ၂နာရီ ၂၀မိနစ် ၀န်းကျင်မှာ လုံမွှန်းရပ်ကွက်မှာ မီးလောင်နေတာကို CDF တပ်ဖွဲ့၀င် တယောက်ကတွေ့တော့ မီးငြှိမ်းသတ်ဖို့ သွားရောက်တဲ့အခါ စစ်ကောင်စီတပ်တွေဘက်က စနိုက်ပါလို အရာနဲ့ ခြုံခို ပစ်ခတ်တဲ့ အတွက် CDF တပ်ဖွဲ့၀င် ၃ယောက် ကျဆုံးခဲ့ရတာလို့ သူက ရှင်းပြပါတယ်။
အဲဒီပစ်ခတ်မှု အတွင်း စစ်ကောင်စီဘက်က တယောက်ကျဆုံးတယ်လို့ သူက ပြောပါတယ်။
ထန်တလန် တိုက်ပွဲ ၊ မီးလောင်မှုတွေနဲ့ ပတ်သက်လို့ ထန်တလန်ရဲစခန်းကို လူအင်အား ၃၀ လောက် ချဥ်းကပ်လာလို့ ဒီဇင်ဘာ ၈ရက် ညနေ ၄နာရီ ၀န်းကျင်မှာ တိုက်ပွဲ ဖြစ်ပွားခဲ့ပြီး အဲဒီလူတွေက အမှတ် ၂ ရပ်ကွက်က အိမ်တွေကို မီးရှို့လို့ နေအိမ် ၁၃လုံး ကာလတန်ဖိုး ကျပ် သိန်း၂၀၀ ဖိုး မီးလောင် ဆုံးရှုံးခဲ့တယ်လို့ ဒီဇင်ဘာ ၉ရက်က စစ်ကောင်စီဘက်ကလည်း ထုတ်ပြန်ထားပါတယ်။
စနိုက်ပါနဲ့ ပစ်ခတ်ခံရလို့ သေဆုံးသွားတဲ့ CDF တပ်ဖွဲ့၀င် အလောင်းတွေကို ခေါင်းဖြတ်ထားတာဟာ စစ်မြေပြင်မှာ လိုက်နာရမယ့် လုပ်ထုံးလုပ်နည်းတွေနဲ့ ကိုက်ညီမှု မရှိဘဲ စစ်ကောင်စီ တပ်တွေဟာ ဂျီနီဗာ ကွန်ဗင်းရှင်း အရ လူထုအိုးအိမ်ကို ကာကွယ်စောင့်ရှောက်ရမယ့် အစား အရပ်သား အိမ်တွေကို မီးရှို့နေတာ စက်တင်ဘာလလယ် ကတည်းက အခုထိ အိမ်ခြေ ၅၅၀လောက် ရှိတဲ့အပြင် ဘာသာရေး ဆရာတယောက်ကိုလည်း သတ်ဖြတ် သူ့လက်ကိုဖြတ်ကာ လက်ထပ် လက်စွပ်ရယူခဲ့တာဟာ လူမဆန်တဲ့ လုပ်ရပ်တွေ ဖြစ်တယ်လို့ သူက ပြောပါတယ်။
စစ်ကောင်စီ တပ်ဖွဲ့၀င်တွေ ထန်တလန်မြို့မှာ လူနေအိမ်တွေ မီးရှို့နေတာနဲ့ ပတ်သက်လို့ သူတို့မှာ ဒရုန်းရိုက်ချက် အထောက်အထားတွေရှိပြီး ၊ CDF တပ်ဖွဲ့၀င် ၃ယောက် ခေါင်းဖြတ်ခံထားရတဲ့ ဓာတ်ပုံ အထောက်အထားတွေလည်း သူတို့လက်၀ယ်မှာ ရှိတယ်လို့ ဆိုပါတယ်။
CDF ထန်တလန် ရဲ့ ပထမဆုံး ကျဆုံး တပ်ဖွဲ့၀င် ရုပ်အလောင်းတွေကို ခေါင်းဖြတ်ခံထားရတာနဲ့ ပတ်သက်လို့ ကြောက်ရွံ့နောက်ဆုတ်သွားမှာ မဟုတ်ဘဲ ၊ စစ်ကောင်စီ ကို နာကျည်းစိတ်နဲ့ အရင်ထက် ပိုတိုး တိုက်ခိုက်သွားဖို့ ရှိတယ်လို့ CDF ထန်တလန် ပြောခွင့်ရသူက ပြောပါတယ်။
ထန်တလန် မြို့တွင်း တိုက်ပွဲမှာ ကျဆုံးခဲ့တဲ့ CDF တပ်ဖွဲ့၀င်တွေရဲ့ ရုပ်အလောင်းကို ဒီဇင်ဘာ ၁၀ ရက်နေ့က ခရစ်ယာန် အစဥ်အလာအတိုင်း သင်္ဂြိုဟ်ခဲ့ကြပါတယ်။
BBC Burmese
ထန်တလန် CDF တပ်ဖွဲဝင် ၃ ယောက် အလောင်း ခေါင်းဖြတ်ထားတာ တွေ့ရတယ်လို့ဆို
Reviewed by THITHTOOLWIN
on
05:31
Rating:
Reviewed by THITHTOOLWIN
on
05:31
Rating:
No comments:
Post a Comment