မယ်လစခန်း ဒုက္ခသည်တွေ ဆူပူဆန္ဒပြ

ထိုင်း - မြန်မာ နယ်စပ် တာ့ခ်ပြည်နယ် ၊ထာ့ဆောင်ရမ်းမြို့နယ်ထဲက အကြီးဆုံးဒုက္ခသည်စခန်းတခုဖြစ်တဲ့ မယ်လဒုက္ခသည် စခန်းမှာ စခန်းအုပ်ချုပ်ရေးမှူးက စခန်းတွင်းနေထိုင်သူ၂ ဦး ဆိုင်ကယ်စီးလာချိန် နှာခေါင်းစည်းမတပ်လို့ ဆိုင်ကယ်ပေါ်က ဆွဲချပြီး ဆိုင်ကယ်သိမ်းဆည်းရာကနေ ဒုက္ခသည် ထောင်ဂဏန်းလောက် ဆန္ဒပြမူတွေ ဖြစ်ပြီး လုံခြုံရေးအာဏာပိုင်တွေက သေနတ်ဖောက် လူစုခွဲတာတွေ လုပ်ခဲ့ကြပါတယ်။ ထိုင်းအခြေစိုက် ဗွီအိုအေ သတင်းထောက် မအေးအေးမာက တင်ပြပေးပါမယ်။

ထိုင်း- မြန်မာနယ်စပ် တာ့ခ်ပြည်နယ် ထာ့ဆောင်ရမ်းမြို့နယ်ထဲက အကြီးဆုံး ဒုက္ခသည်စခန်းဖြစ်တဲ့ မယ်လဒုက္ခသည်စခန်းမှာ ဒီဇင်ဘာလ ၁၄ ရက်နေ့ ညနေပိုင်းမှာ လူဦးရေ ထောင်ဂဏန်းနဲ့ ဆန္ဒပြမှု ဖြစ်ခဲ့ပါတယ်။ ပြဿနာ စဖြစ်တာကတော့ စခန်းတွင်း နေထိုင်သူ ၂ ဦး ဆိုင်ကယ်စီးလာချိန် နှာခေါင်းစည်းမတပ်လို့ ဆိုင်ကယ်ပေါ်က ဆွဲချပြီး ဆိုင်ကယ်သိမ်းဆည်းရာကနေ အုပ်ချုပ်ရေးမှူးရဲ့လုပ်ရပ်တွေကို မကျေမနပ်ဖြစ်နေကြတဲ့ ဒုက္ခသည်တွေဟာ စခန်း အုပ်ချုပ်ရေးမှူးရုံးရှေ့ကို စုရုံးလာပြီး လူစုလူဝေးနဲ့ဆန္ဒပြပြီး ရုန်းရင်း ဆန်ခတ်မှုတွေ ဖြစ်ခဲ့တာလို့ ဒုက္ခသည်တဦးက ဗွီအိုအေ ကို ပြောပြပါတယ်။

" နောက်ဆုံး အခြေအနေကတော့ သူတို့က လမ်းမတန်းက (အော်စော်) လုံခြုံရေးကင်းတဲတွေကို ဖျက်နေတယ်။ မပြီးသေးဘူး။ ဇုံ C ကနေ ဇုံ A အထိချီတက်သွားကြတယ်။ လူအင်အားများတယ်။ ဇုံ A, ဇုံ B, ဇုံ C မှာရှိတဲ့သူတွေအားလုံးပါတယ် ဖြစ်နေတာက။ ပလာ (စခန်းအုပ်ချုပ်ရေးမှူး)နဲ့ စီးပွားလုပ်ငန်းရှင် တစုနဲ့ ပေါင်းပြီး စျေးတွေအရမ်းတင်နေတဲ့ ကိစ္စတွေပါတယ်။ အဲဒီအချက်တွေကို မကျေနပ်ပြီး ပေါက်ကွဲတာရော။ လက်ရှိ ဒီနေ့လုပ်လိုက်တဲ့ ကိစ္စကိုရော မကျေနပ်လို့ ပလာ(စခန်းအုပ်ချုပ်ရေးမှူး ) ရုံးရော စီးပွားရေးလုပ်ငန်းရှင် မိချို အိမ်ကိုကော။ စခန်း အတွင်းရေးမှူးအိမ်ကိုကောပေါ့။ အဲဒီမှာအခြေအတင်ဖြစ်ကြတာပဲ။ စစ်တပ်က မိုးပေါ်ထောင်ပစ်တယ်။ လူထုက ၂ စု ကွဲသွားတယ်။ တစုက အဲဒီအိမ်တွေရှေ့မှာ။ နောက်တစုက ကင်းတဲတွေဖျက်ပစ်နေတယ်။ "

ဒုက္ခသည်တွေ အနေနဲ့ စခန်းတွင်းက စျေးဆိုင်တွေမှာ စျေးကြီးပေးပြီး ဝယ်စားနေရတဲ့ စားဝတ်နေရေး ပြဿနာကလည်း ရှိနေတာပါ။ TBBC လို့ ခေါ်တဲ့အစိုးရမဟုတ်တဲ့အဖွဲ့အစည်းက အစားအသောက်ဝယ်ဖို့ အတွက် ဒုက္ခသည်တဦးကို တလစာ ထိုင်း ဘတ်ငွေ ၂၇၀ ပါတဲ့ ကဒ်ထောက်ပံ့ပေးထားပြီး အစားအသောက်ဝယ်ဖို့ သတ်မှတ်ထားတဲ့ ဆိုင်မှာပဲ ဝယ်ရပါတယ် ။ အဲဒီဆိုင်တွေကလည်း စားသောက်ကုန်တွေကို စခန်းအုပ်ချုပ်ရေးမှူးက ခွင့်ပြုထားတဲ့ လုပ်ငန်းရှင်ဆီကပဲ ဝယ်ယူပြီးပြန်ရောင်းချရပါတယ်။ ဒီအတွက် ဒုက္ခသည်တွေအနေနဲ့ စားသောက်ကုန်တွေကို စျေးကြီးပေးပြီ းဝယ်စားရတာတွေကို နှစ်ရှည်ကြုံ လာရတဲ့အတွက် အထွေထွေ မကျေနပ်မူတွေက ရှိနေတယ်လို့လည်း ပြောပြပါတယ်။

" ဒီထဲမှာရှိနေတဲ့ လူထုတွေကို သူတို့က ကုန်စျေးနှုံးတွေ စျေးကြီးအောင် လုပ်ငန်းရှင်နဲ့ပေါင်းပြီး အပြင်လူ aစျးဆိုင်မရောင်းရဘူး။ ဥပမာဆိုရင် ကျနော်တို့ဆီ ဝယ်ချင်တယ်ဆိုရင် ရိုးရိုးစျေးဆိုင်တွေက ဆီတင်ခွင့်မရှိဘူး ။ food card ဆိုင်တွေတင်ရမယ်။ အဲဒီ food card ဆိုင်တွေကလည်း သူတို့လုပ်ငန်းရှင် တွေဆီကပဲ ဆီတပုလင်းကို ၅၃ ဘတ်နဲ့ ဝယ်ရတယ်။ စခန်းထဲမှာ ၅၄ ဘတ်နဲ့ပြန်ရောင်းရတယ် ။ အဲဒီဆိုင်တွေကလည်း ကြက်သွန် ၁၀ကီလိုဆို မဲဆောက်မှာ ဘတ် ၁၃၀ လောက်ပဲရှိတယ်။ ကျနော်တို့က ဝယ်ရတာက တကီလိုကို ၃၅ ဘတ်နဲ့ ဝယ်ရတယ်။

ဒုက္ခသည်တွေအနေနဲ့ တလလုံး စားသောက်ဖို့ ဘတ်ငွေ ၂၇၀ ဟာ မလောက်င တဲ့အတွက် အပြင်မှာထွက်ပြီး ရရာအလုပ်ကို လုပ်ကိုင်နေကြရပါတယ်။ ကိုဗစ်ကာလဖြစ်တာကြောင့် စခန်းအတွင်းကနေ အပြင်မထွက်ရတဲ့ အခါမှာ ဒုက္ခသည်တွေရဲ့စားဝတ်နေရေး ပြသနာဟာ ပိုပြီးကြီးထွားလာပါတယ်။ စခန်းတွင်းကို ဝင်တာထွက်တာလုပ်ရင် အခကြေးငွေပေးရတာရှိပြီး မပေးနိုင်ရင်ဖမ်းဆီးခံရတယ်လို့လည်း သူကပြောပြပါတယ်။

" လူထုက အပြင်ကလာခေါ်ရင် တောင်ယာခုတ်ကြတယ်။ တောတက်ပြီး ဝါးခုတ် မျှစ်ချိုး လုပ်ရတယ်။ အခုချိန်ဆို ပြောင်းချိုးတာတွေလုပ်ရတယ်။ ခိုးပြီးလုပ်ရတာပေါ့လေ။ ထွက်တာမိရင်လည်း အဖမ်းခံရတယ်။ နောက်ဆုံး အပြင်ရောက်နေလို့ အထဲပြန်ဝင်ချင်ရင် ဘတ် ၁,၀၀၀ ပေးရတယ်။ "

ဒုက္ခသည် စခန်းတွေမှ ာစားဝတ်နေရေး ပြဿနာက အကြီးဆုံးဖြစ်နေပြီး အစိုးရမဟုတ်တဲ့ အဖွဲ့အစည်းတွေက ပေးတဲ့ တလလုံး စားသောက်စရိတ်ဟာ အမေရိကန် ဒေါ်လာနဲ့ဆိုရင် ၉ ဒေါ်လာလောက်သာ ရှိပါတယ်။ ဒုက္ခသည် အများစုကတော့ တတိယနိုင်ငံ ထွက်ခွါဖို့ကလည်း ဆယ်စုနှစ် ၂ခုနီးပါးလောက် စောင့်ဆိုင်းနေရပြီ းသွားလာခွင့်တွေလည်း မရကြပါဘူး။ နေရပ်ပြန်ဖို့လည်းမဖြစ်နိုင်တဲ့အတွက် စခန်းအပြင်ထွက်ပြီး ရရာအလုပ်တွေ လုပ်နေကြရတာပါ။

ကိုဗစ်ကပ်ဘေးကာလ ၂နှစ်နီးပါးအတွင်းမှာအပြင်ထွက် အလုပ်လုပ်ခွင့် မရတဲ့ အခက်အခဲတွေ ကြောင့် စားဝတ်နေရေး ကြပ်တည်းမှုက ပိုပြီးကြီးထွားလာကြပါတယ် ။ ဒုက္ခသည်တွေ အနေနဲ့ စားဝတ်နေရေးပြသနာကစလို့ မွန်းကြပ်မူတွေ ထွက်ပေါက်မရှိတာတွေ ဖြစ်နေနေရတယ်လို့လည်းဒုက္ခသည်တွေကဆိုပါတယ်။ ထိုင်းမြန်မာနယ်စပ်မှာ ဒုက္ခသည်စခန်း ၉ ခုရှိပြီး မယ်လစခန်းမှာ ဒုက္ခသည် ၄ သောင်းလောက် ခိုလှုံနေထိုင် နေတာဖြစ်ပါတယ်။

အေးအေးမာ  / ဗွီအိုအေ ( မြန်မာပိုင်း)