ချင်း ဖလမ်းမြို့နယ်တွင်း စစ်ကောင်စီတပ်နဲ့ ဒေသခံကာကွယ်ရေးတိုက်ပွဲဖြစ်ပွား

စစ်ကိုင်းတိုင်း ကလေးမြို့နယ်နဲ့ထိစပ်နေတဲ့ ချင်းပြည်နယ်ဖလမ်းမြို့နယ်မှာ စစ်ကောင်စီတပ်ဖွဲ့တခုကို ကလေးပြည်သူ့ကာကွယ်ရေးအဖွဲ့ PDF နဲ့ ချင်းအမျိုးသား ကာကွယ်ရေး CDNF ပူးပေါင်းတပ်တွေက တနင်္လာနေ့ညက ဝင်ရောက်တိုက်ခိုက် ခဲ့တဲ့အတွက် အပြန်အလှန် ပစ်ခတ်တိုက်ပွဲဖြစ်ခဲ့ပါတယ်။ ကလေးမြို့တွင်းမှာလည်း ပစ်ခတ်ပေါက်ကွဲသံတွေကြားနေတယ်လို့ ဒေသခံတွေက ပြောပါတယ်။ ဒီအကြောင်းရန်ကုန်ကနေ ပေးပို့တဲ့သတင်းကို ကိုကျော်ကျော်သိန်းက တင်ပြပေးထားပါတယ်။

ချင်းပြည်နယ် ဖလမ်းမြို့နယ် စီးစံကျေးရွာဘက်မှာ တပ်စွဲနေတဲ့ စစ်ကောင်စီတပ်တွေကို ကလေးပြည်သူ့ကာကွယ်ရေးအဖွဲ့ PDF-Kalay နဲ့ ချင်းအမျိုးသားကာကွယ်ရေး CDNF ပူးပေါင်းတပ်တွေက ဒီဇင်ဘာ ၂၀ ရက် တနင်္လာနေ့ညပိုင်းက စတင်တိုက် ခိုက်ခဲ့တဲ့အတွက် တိုက်ပွဲဖြစ်ပွားခဲ့ပါတယ်။ ရွာထဲလာရောက်တပ်စွဲတာကို ပြည်သူ့ကာကွယ်ရေးအဖွဲ့တွေ ပူးပေါင်းတိုက်ခိုက်တာဖြစ်တယ်လို့ ဒေသခံ ရွာသားတဦးက ခုလိုပြောပြပါတယ်။

“ညအချိန် (၈) နာရီလောက်က ဝင်ပစ်တာလေ။ ထိခိုက်မှုက တပ်ဘက်က တယောက်လျောတယ်။ PDF ဘက်က တယောက်လျောတယ်။ နှစ်ယောက်ဒဏ် ရာရတယ်။ ဖြစ်ပုံက သူတို့က ရွာမှာတပ်စွဲထားတာပေါ့လေ။ CNDF’ PDF ပေါင်းပြီးတော့ပြန်ချတယ်လေ။”

ည ၈ နာရီလောက်မှာ စတင်တဲ့ တိုက်ပွဲအတွင်း ၂ ဘက်လုံး ထိခိုက်မှုရှိခဲ့တယ်လို့ ချင်းအမျိုးသားကာကွယ်ရေး CDNF ပြန်ကြားရေး တာဝန်ရှိသူတဦး ကပြောပါတယ်။

“စီးစံရွာဘက်မှာဖြစ်တယ်။ သူတို့က လက်နက်ကြီးနဲ့ အချက် (၃၀) လောက်ပစ်တယ်။ ကျနော်တို့ဘက်က PDF နဲ့ပူးပေါင်း တိုက်တာပေါ့နော။ ပူးပေါင်းတိုက်တော့ PDF ဘက်က တယောက်တော့ကျတယ်။ သူတို့ဘက်ကတယောက်တော့ ထိမယ် လို့ ကြားတယ်။”

ခုလို ဖလမ်းမြို့နယ်ဘက်က တိုက်ပွဲအခြေအနေကိုသိရဖို့ စစ်ကောင်စီပြောခွင့်ရကို ဆက်သွယ်ခဲ့ပေမဲ့ ဆက်သွယ်လို့ မရခဲ့ပါဘူး။

စီးစံကျေးရွာမှာဖြစ်တဲ့ တိုက်ပွဲကြောင့် စီးစံရွာကအပြင် အနီးကပ်ရက်မှာရှိတဲ့ ရှားတော၊ စက္ကန့်၊ မြောင်စုံ၊ ဆင်တော စတဲ့ကျေးရွာတွေက ထောင်ချီတဲ့ဒေသခံတွေ ဘေးလွတ်ရာကို စစ်ဘေး တိမ်းရှောင်ကြရတယ်လို့ ဒေသခံရွာသားတဦးက ဆက်ပြောပါတယ်။

“အဲဒီနားကရွာအကုန်လုံး ရှောင်နေရတာပေါ့။ ခန့်မှန်းဦးရေက ၁,၀၀၀ နဲ့ ၂,၀၀၀ ကြားထဲမှာ။ လောလောဆယ် တောထဲမှာ ရှောင်နေရတယ်။”

စစ်ပြေးဒုက္ခသည်တွေဟာ ဘေးလွတ်ရာနဲ့ ဆွေမျိုးရှိရာရွာဘက်ကို တိမ်းရှောင်နေကြတယ်လို့ ပြောပါတယ်။ အလားတူ ဖလမ်းမြို့နယ်နဲ့ နယ်နမိတ်ထိစပ်နေတဲ့ စစ်ကိုင်းတိုင်း ကလေးမြို့ တာဟန်းရပ်ကွက်မှာလည်း ညတုန်းက ပေါက်ကွဲသံနဲ့ ပစ်ခတ်သံကြားနေရတယ်လို့ ကလေးမြို့ခံတဦးကပြောပါတယ်။

“တာဟန်းဘက်အခြမ်းပဲဗျ ညကတော့။ တာဟန်းဘက်အခြမ်းကတော့ ညက သေနတ်သံရယ်။ ဗုံးသံတွေကြားနေရတယ်။ တိုက်ပွဲဖြစ်တဲ့ပုံစံမျိုးဗျ။”

ဘာကြောင့်ပစ်ခတ်မှုရှိတာကိုတော့ မသိရသေးသလို မနက်ပိုင်းမှာ ကလေးမြို့ တွင်း နေရာအတော်များများနဲ့ မြို့အဝင်အထွက်တွေမှာ စစ်ကောင်စီတပ်တွေကနေ လုံခြုံရေးတင်းကြပ်ပြီး စစ်ဆေးမေးမြန်းမှုတွေလုပ်နေတယ်လို့လည်း ပြောပါတယ်။

ကလေးမြို့နယ်မှာ ပြည်သူ့ကာကွယ်ရေး PDF အဖွဲ့နဲ့ စစ်တပ်အကြား တိုက်ပွဲတွေ မကြာမကြာဖြစ်နေသလို စစ်အာဏာသိမ်းမှုကို ဆန့်ကျင်ကန့်ကွက်တဲ့ ပုံစံမျိုးစုံ ဆန္ဒပြပွဲတွေလည်း ဆက်ပြီးရှိနေပါတယ်။ 

ကျော်ကျော်သိန်း  / ဗွီအိုအေ ( မြန်မာပိုင်း)