လှိုင်သာယာမြို့နယ် အမှတ် ၁၂ ရပ်ကွက်၊ ပေါ်ဆန်းမွှေးလမ်းက လူနေအဆောင်တွင်း ပေါက်ကွဲမှုတွေနဲ့ပတ်သက်ပြီး လူငယ် ၃ ဦး ဖမ်းဆီးခံထားရတယ်လို့ အဲဒီရပ်ကွက်မှာနေထိုင်သူတွေကပြောပါတယ်။
ဖမ်းဆီးခံသွားရတဲ့ ၃ ဦးထဲမှာ ၁ ဦးဟာ ပေါက်ကွဲမှုကြောင့် ခြေထောက်ပြတ်တဲ့အထိ ဒဏ်ရာရရှိထားတယ်လို့ဆိုပါတယ်။
ပေါက်ကွဲမှုဟာ မနေ့ ဒီဇင်ဘာလ ၁၃ ရက် ည ၆ နာရီခန့်မှာ ဖြစ်ပွားတာဖြစ်ပြီး ပထမဆုံးပေါက်ကွဲမှုဖြစ်ပြီးနောက် မီးလောင်ခဲ့သလို နောက်ထပ်ပေါက်ကွဲမှုတွေဆက်ဖြစ်ခဲ့တာကြောင့် စုစုပေါင်းပေါက်ကွဲမှု ၇ ကြိမ်ရှိခဲ့တယ်လို့ သိရပါတယ်။
'' ပေါက်တဲ့အဆောင်က ခြေထောက်ပြတ်တဲ့အစ်ကိုကို ဆေးရုံပို့ဖို့စီစဉ်နေကြတုန်း စစ်တပ်ကရောက်လာတာ။ အဲဒီဒဏ်ရာနဲ့အစ်ကိုက ဒဏ်ရာနဲ့ပဲ ဆက်စပ်တခြားသူတွေရှိနိုင်တဲ့ နေရာတွေကို စစ်တပ်ကိုလိုက်ပြရတယ်။ သူတို့ကလိုက်ပြခိုင်းလို့လေ။ ဆေးရုံတန်းမခေါ်သွားတာသေချာတယ်။ ၁၄ ရပ်ကွက်ဘက်ကသူတွေကလှမ်းပြောတယ်။ သူတို့ဘက်ကို ရောက်လာပြီး ဒဏ်ရာတွေနဲ့ စစ်တပ်ကိုလိုက်ပြနေရတာတွေ့တာလှမ်းပြောတယ် '' လို့ ဒေသခံတစ်ဦးကပြောပြပါတယ်။
ပေါက်ကွဲမှုနဲ့ပတ်သက်ပြီး ဘာကြောင့်ဆိုတာမသိရသေးသလို အဲဒီပေါက်ကွဲမှုဖြစ်တဲ့ အဆောင်နဲ့မှာနေထိုင်သူတွေ အပါအဝင် လမ်းတစ်ခုလုံးကို ပိတ်ဆို့စစ်ဆေးတာတွေကို မနေ့က ည ၁၁ နာရီ ၄၅ မိနစ်လောက်အထိ စစ်ကောင်စီကလုပ်ခဲ့တယ်လို့ အဲဒီမှာနေထိုင်သူတစ်ဦးကပြောပြပါတယ်။
'' ပထမဆုံးပေါက်သံကြားပြီးသိပ်မကြာဘူး။ စစ်တပ်ကရောက်လာတာ။ သူတို့ ရောက်ပြီးဆက်ပေါက်နေတော့ အဆောင်ထဲကိုမဝင်ဘူး။အောက်ကနေ ကြည့်တယ်။လမ်းထဲကလူတွေ တစ်ယောက်မှမထွက်ဖို့အော်ပြောတယ်။လမ်းကိုပိတ်တယ်။ဆဲလည်းဆဲတယ်။ ပေါက်ပြီး မီးလောင်တော့ မီးသတ်ကိုပဲ ငြှိမ်းခိုင်းတယ်။ သူတို့အဆောင်ထဲမဝင်ဘူး။ လုံး၀ အသံတွေငြိမ်သွားမှသူတို့ သူတို့တက်ကြည့်တယ်။ လမ်းကို ည ၁၁ နာရီ ၄၅ လောက်မှာ လမ်းကိုပြန်ဖွင့်တယ် '' လို့ မျက်မြင်တွေ့သူတစ်ဦးက ပြောပြပါတယ်။
လက်ရှိမှာတော့ ဒဏ်ရာရရှိသူကိုဆေးရုံပို့ဆောင်ထားတယ်လို့သိရကြောင်း လမ်းတွင်းနေသူတွေကပြောပါတယ်။ ပေါက်ကွဲမှုဖြစ်တဲ့အဆောင်ဟာ အခြေခံလုပ်သားတွေ နေထိုင်ကြတဲ့အဆောင်ဖြစ်တယ်လို့သိရပါတယ်။
BBC Burmese
လှိုင်သာယာ ၁၂ ရပ်ကွက်က လူနေဆောင်အတွင်း ပေါက်ကွဲမှုကြောင့် လူငယ် ၃ ဦးဖမ်းဆီးခံထားရ
Reviewed by THITHTOOLWIN
on
17:23
Rating:
Reviewed by THITHTOOLWIN
on
17:23
Rating:
No comments:
Post a Comment