ဘားအံ၊ နိုဝင်ဘာ ၁၆
ကရင်ပြည်နယ်၊ ဘားအံမြို့နယ်၊ ကေအဲန်ယူ သထုံခရိုင် ဟတ္တလိုက်ကျေးရအုပ်စု၊ ဖလံတောင်ကျေးရွာနဲ့နိုအော့လာကျေးရွာကြီးရှိ မဲသနချောင်းအနီးမှာ KNLA နဲ့BGF တို့ တိုက်ပွဲဖြစ် BGF ဘက်မှ ၂ ဦးသေဆုံးပြီး ၃ ဦးဒဏ်ရာရခဲ့တယ်လို့ KNLA တပ်မဟာ(၁)ထံက သိရပါတယ်။
နိုဝင်ဘာလ ၁၅ ရက်နေ့မှာ BGF-၁၀၁၄ တပ်ရင်းနဲ့KNLA တပ်မဟာ(၁) တပ်ရင်း(၂)တို့ နှစ်ဖက်အပြန်အလှန် ပစ်ခတ်မှု ဖြစ်ပွားခဲ့တာဖြစ်ပါတယ်။
တိုက်ပွဲဖြစ်ပွားပြီးနောက် KNLA ဘက်မှ ထိခိုက်မှုမရှိဘဲ BGF ဘက်မှ ၂ ဦးသေဆုံးပြီး ၃ ဦးဒဏ်ရာရရှိခဲ့တာဖြစ်ပါတယ်။
"မနေ့က တိုက်ပွဲဖြစ်တယ်။ စကစ ဘက်က သေတာ ဒဏ်ရာရတာရှိတယ်။ ဒို့ဘက်ကတော့ သေဆုံးထိခိုက်တာမရှိဘူး။ တိုက်ပွဲပြီးတော့ ဒေသခံတွေကို သူတို့ဘက်က ခေါ်ဆောင်သွားတာတွေရှိတယ်''လို့ KNLA တပ်မဟာ(၁)က တာဝန်ရှိသူတစ်ဦးက သံလွင်တိုင်းမ်ကိုပြောပါတယ်။
တိုက်ပွဲဖြစ်ပွားပြီးနောက် BGF ဘက်မှ ရေအေးကျေးရွာမှ အမျိုးသား ၅ ဦး၊ ဖလံတောင်ကျေးရွာမှ ၈ ဦး၊ နို့အောလာကျေးရွာမှ ဒေသခံ ၁၀ ဦး စုစုပေါင်း ၂၃ ဦးကို အဓမ္မခေါ်ဆောင်သွားသလို ဒေသခံတစ်ဦးရဲ့ ကားကိုလည်း အသုံးပြုဖို့ ယူဆောင်သွားတယ်လို့ သိရပါတယ်။
လက်ရှိမှာ BGF တပ်ဖွဲ့တွေက ဖလံတောင်ကျေးရွာနဲ့ရေအေးကျေးရွာတို့မှာ တပ်စွဲစခန်းချထားတယ်လို့ သိရပါတယ်။
သတင်း - သံလွင်တိုင်းမ် - Than Lwin Times
Reviewed by THITHTOOLWIN
on
00:43
Rating:
No comments:
Post a Comment