အရှေ့အာရှနဲ့ ပစိဖိတ်ဒေသဆိုင်ရာ အမေရိကန် လက်ထောက်နိုင်ငံခြားရေးဝန်ကြီး Daniel Kritenbrink ရဲ့ အရှေ့တောင်အာရှ လေးနိုင်ငံခရီးစဉ်အတွင်း မြန်မာနိုင်ငံမှာ အကြမ်းဖက်လုပ်ရပ်တွေ ရပ်ဖို့၊ လူသားစာနာမှု အကူအညီ အကန့်အသတ်မရှိ ပေးခွင့်ပြုဖို့နဲ့ မြန်မာ့ဒီမိုကရေစီလမ်းကြောင်း ပြန်လည်တည်ဆောက်ဖို့ မြန်မာစစ်အစိုးရကို ဖိအားပေးရေး နည်းလမ်းတွေကို ဆွေးနွေးဖို့လည်း ပါဝင်တယ်လို့ အမေရိကန် နိုင်ငံခြားရေးဌာနရဲ့ သောကြာနေ့ ထုတ်ပြန်ချက်တခုမှာ ဖော်ပြထားပါတယ်။
လက်ထောက်ဝန်ကြီး Kritenbrink ဟာ အင်ဒိုနီးရှား၊ မလေးရှား၊ စင်ကာပူနဲ့ ထိုင်းနိုင်ငံတွေကို နိုဝင်ဘာလ ၂၇ ရက် ဒီကနေ့ကနေ ဒီဇင်ဘာလ ၄ ရက်နေ့အထိ သွားရောက်မှာ ဖြစ်ပါတယ်။ ဒီခရီးစဉ်ထဲမှာ လက်ရှိ အာဆီယံအလှည့်ကျဥက္ကဋ္ဌ ကမ္ဘောဒီးယားနိုင်ငံကို သွားဖို့တော့ မပါပါဘူး။ ကမ္ဘောဒီးယားနိုင်ငံဟာ တရုတ်နိုင်ငံနဲ့ ပိုပြီးနီးစပ်တဲ့ ဆက်ဆံရေး ရှိထားတဲ့နိုင်ငံပါ။
ခရီးစဉ်အတွင်း သက်ဆိုင်ရာနိုင်ငံတွေက အကြီးတန်း တာဝန်ရှိသူတွေနဲ့ တွေ့ဆုံပြီး ဒေသတွင်း ဒီမိုကရေစီရေးနဲ့ လူ့အခွင့်အရေးဆိုင်ရာ ရင်ဆိုင်နေရတဲ့ အခြေအနေတွေ၊ ဥတုရာသီပြောင်းလဲမှု တိုက်ဖျက်ရေးမှာ ပူးပေါင်းဆောင်ရွက်မှု မြှင့်တင်ရေးတို့ကို ဆွေးနွေးဖို့ရှိတာနဲ့အတူ မြန်မာနိုင်ငံမှာ စစ်အာဏာသိမ်းပြီးနောက်ပိုင်း လက်ရှိအခြေအနေနဲ့ ပတ်သက်ပြီးတော့လည်း ထည့်သွင်းဆွေးနွေးဖို့ စီစဉ်ထားတာပါ။
ပြီးခဲ့တဲ့လက ကျင်းပတဲ့ အမေရိကန်-အာဆီယံ ထိပ်သီးအစည်းအဝေးမှာ သမ္မတ Joe Biden ပါဝင်တက်ရောက်ခဲ့ပြီး အရှေ့တောင်အာရှနိုင်ငံတွေနဲ့ ထိတွေ့ဆက်ဆံတာကို အရှိန်မြှင့် လုပ်ဆောင်သွားမယ်လို့ ကတိပြုခဲ့ပြီးတဲ့နောက် အခု လက်ထောက်ဝန်ကြီး Kritenbrink ရဲ့ခရီးစဉ် ဖြစ်လာတာပါ။
အမေရိကန်နဲ့ မဟာမိတ်နိုင်ငံ ၆ နိုင်ငံက မြန်မာနိုင်ငံမှာ စစ်တပ်က အကြမ်းဖက်မှုတွေ ကျူးလွန်နေတာနဲ့ လူ့အခွင့်အရေး ချိုးဖောက်မှု ကျူးလွန်နေတာတွေ ရပ်ပစ်ဖို့ တောင်းဆိုခဲ့တဲ့ တနေ့တည်းမှာပဲ ကန် လက်ထောက်နိုင်ငံခြားရေးဝန်ကြီးရဲ့ ခရီးစဉ် ဖြစ်လာတာပါ။ ဒီထုတ်ပြန်ချက်ဟာ မြန်မာ့ပြည်တွင်းရေး ဝင်ရောက်စွက်ဖက်တဲ့၊ ဘက်လိုက်တဲ့၊ နိုင်ငံရေးရည်ရွယ်ချက်ရှိတဲ့ ထုတ်ပြန်ချက် ဖြစ်တယ်ဆိုပြီး ပြင်းထန်စွာ ကန့်ကွက်တယ်ဆိုပြီး မြန်မာစစ်ကောင်စီကလည်း တုံ့ပြန်လိုက်ပါတယ်။
ဗွီအိုအေ (မြန်မာပိုင်း)
Reviewed by THITHTOOLWIN
on
22:56
Rating:
No comments:
Post a Comment