မတူပီက ကုန်ကားတွေကို လမ်းရှင်းရေးအတွက် စစ်ကောင်စီတပ်တွေက အသုံးချနေ

ချင်းပြည်နယ်ထဲမှာ စစ်ကောင်စီတပ်တွေနဲ့ ချင်းဒေသပြည်သူ့ကာကွယ်ရေးတပ် CDF တို့ရဲ့ တိုက်ပွဲတွေအတွင်း မတူပီမြို့နယ်မှာ ကုန်ကားတွေကို စစ်ကောင်စီတပ်တွေက လမ်းရှင်းရာမှာ အသုံးချနေကြတယ်လို့ မတူပီ CDF  တာဝန်ရှိသူတစ်ယောက် ပြောပါတယ်။

နိုဝင်ဘာ ၂၇ ရက် မနေ့က မတူပီမြို့ကို ရောက်လာတဲ့ ကုန်ကားတွေကို စစ်ကောင်စီတပ်တွေက ပြန်မထွက်ခိုင်းသေးဘဲ မင်းတပ်ကနေတစ်ဆင့် ပခုက္ကူကို ပြန်ခိုင်းဖို့ လုပ်နေတယ်လို့ သူက ပြောပါတယ်။

"မင်းတပ်မှာက ဒီဘက်ကိုလာမယ့် တပ်မ ၇၇၊ တပ်မ ၅၅ က စစ်သားတွေ ရှိတယ်။ ဒီကို မလာနိုင်ဘူး၊ လုံခြုံရေးအရ မလာရဲဘူး။ မလာရဲတော့ ဘယ်လိုလုပ်လဲဆိုတော့ ဒီကကုန်ကားတွေကို ဒီလမ်းက သွားခိုင်းတာ။ လမ်းရှင်းတဲ့ သဘောမျိုးပေါ့"

CDF တပ်ဖွဲ့ဝင်တွေဖက်က ကားလမ်းတွေမှာ စစ်ကောင်စီတပ်ဖွဲ့ယာဉ်တန်းတွေကို မိုင်းထောင်ဖောက်ခွဲနေတာ၊ ပြောက်ကျားနည်းနဲ့ ပစ်ခတ် တိုက်ခိုက်နေတာတွေကြောင့် စစ်ကောင်စီတပ်တွေဟာ သူတို့ ယာဉ်တန်းသွားဖို့ ရှေ့ကနေ လမ်းရှင်းတဲ့အနေနဲ့ ကုန်ကားတွေကို အသုံးပြုနေကြတာဖြစ်ပါတယ်။

လက်ရှိမှာ ဆယ့်နှစ်ဘီးကား ကုန်ကားသုံးစီးကို စစ်ကောင်စီတပ်တွေက မတူပီကနေ မင်းတပ်၊ ပခုက္ကူ လမ်းကြောင်းအတိုင်း ကုန်စည်မပါဘဲ စေလွှတ်ဖို့ လုပ်နေတယ်လို့ ဆိုပါတယ်။

ဒီအခြေအနေနဲ့ပတ်သက်ပြီး စစ်ကောင်စီဘက်က တုံ့ပြန်ချက်ရဖို့ RFA အနေနဲ့ ကြိုးစားနေဆဲ ဖြစ်ပါတယ်။

ချင်းပြည်နယ်ထဲမှာ CDF  တပ်တွေနဲ့ စစ်ကောင်စီတပ်ပ်တို့ဟာ ကားလမ်းတွေမှာ အပြန်အလှန် စစ်ဆေးနေကြပြီး စစ်တပ်ကိုပို့မယ့် ကုန်စည် ကျပ် သိန်း ၆၀ ဖိုးဝန်းကျင်ကို မတူပီ CDF က လက်ရှိအချိန်အထိ ဖမ်းဆီးရထားတယ်လို့ ဆိုပါတယ်။

ပြီးခဲ့တဲ့ နိုဝင်ဘာ ၂၆ ရက်နေ့ကလည်း မတူပီမြို့နယ်၊ ငလိုင်ရွာနဲ့ ဖလိုင်ရွာကြားက စစ်တပ်က တပ်စွဲထားတဲ့ အထွေထွေအုပ်ချုပ်ရေးရုံးကို မတူပီ CDF က တိုက်ခိုက်ခဲ့ပြီး စစ်‌သား သုံးယောက် သေဆုံးခဲ့သလို သုံးယောက် ဒဏ်ရာရခဲ့ပါတယ်။

RFA Burmese