ဒေါ်အောင်ဆန်းစုကြည်၊ သမ္မတဦးဝင်းမြင့်၊ နေပြည်တော်ကောင်စီ ဥက္ကဋ္ဌ ဒေါက်တာမျိုးအောင်တို့အပေါ် အမှုတွဲပြီး ရာဇသတ်ကြီးပုဒ်မ ၅၀၅-ခ နဲ့တရားစွဲထားတဲ့ အများပြည်သူ တည်ငြိမ်အေးချမ်းမှု ပျက်ပြားအောင် လုပ်ဆောင်မှုအတွက် နိုဝင်ဘာ ၃၀ ရက်နေ့ မှာအပြီးသတ် အမိန့်ချမယ်လို့ စုံစမ်းသိရပါတယ်။
ဒေါ်အောင်ဆန်းစုကြည်အပေါ် စွဲဆိုထားတဲ့အမှုတွေထဲက အင်္ဂါနေ့တိုင်း ကြားနာ စစ်ဆေးနေကျ တည်ငြိမ်အေးချမ်းမှု ပျက်ပြားအောင် လုပ်ဆောင်မှုတွေနဲ့ သဘာဝဘေး အန္တရာယ်ဆိုင်ရာအမှုတို့ကို နေပြည်တော် အထူးတရားရုံးမှာ ဒီနေ့ ဆက်လက် စစ်ဆေးပါတယ်။ ဒီလိုစစ်ဆေးကြားနာအပြီးမှာ ပုဒ်မ ၅၀၅-ခ အမှုအတွက် နောက်သီတင်း ၂ ပတ်မှာ အမိန့်ချမယ်လို့ တရားသူကြီးက ဆုံးဖြတ်လိုက်တာဖြစ်ပါတယ်။
ပုဒ် မ ၅၀၅-ခ အမှု နဲ့ ပတ်သတ်လို့ ဒီနေ့ နိုဝင်ဘာ ၁၆ ရက်မှာ တရားလို တရားပြိုင် ၂ ဘက်ရှေ့နေတွေက အမှုနဲ့ပတ်သက်လို့ အပြစ်ရှိ မရှိ တရားရုံးဆုံးဖြတ်နိုင်ဖို့ အပြီးသတ် လျှောက်လဲချက်တင်သွင်းခဲ့ကြပါတယ်။ အဲဒီလျှောက်လဲချက်တွေအပြီး အမှုအတွက် နိုဝင်ဘာ ၃၀ မှာ ဆုံးဖြတ်ချက်ချမယ်လို့ သတ်မှတ်လိုက်တာပါ။
စစ်အာဏာသိမ်းမှုအပေါ် ကန့်ကွက်ကြောင်းနဲ့ အာဏာသိမ်းစစ်တပ်နဲ့ ပူးပေါင်းဆောင် ရွက်မှုမလုပ်ဖို့ အမျိုးသားဒီမိုကရေစီအဖွဲ့ချုပ် ဗဟိုအလုပ် အမှုဆောင်အဖွဲ့က ထုတ်ပြန် တဲ့ကြေညာချက် ၂ စောင်ကြောင့် ဒေါ်အောင်ဆန်းစုကြည်၊ သမ္မတဦးဝင်းမြင့်နဲ့ နေပြည်တော် မြို့တော်ဝန်ဒေါက်တာမျိုးအောင်တို့အပေါ် ရာဇသတ်ကြီးပုဒ်မ ၅၀၅ (ခ) ပုဒ်မနဲ့ စွဲချက်တင်ထားတာဖြစ်ပါတယ်။ ပြစ်မှုထင်ရှားတယ်လို့ ဆုံးဖြတ်ရင် အမြင့်ဆုံးပြစ်ဒဏ် ၂ နှစ်အပြင် ငွေဒဏ်ပါချမှတ်နိုင်ပါတယ်။
သဘာဝဘေး အန္တရာယ်ဆိုင်ရာအမှုအတွက်ကိုတော့ ဒေါ်အောင်ဆန်းစုကြည်ကိုယ်တိုင် ဒီနေ့ သက်သေထွက်ဆိုခဲ့တယ်လို့ နေပြည်တော်ကလာတဲ့ သတင်းတွေအရ သိရပါတယ်။ ဒေါ်အောင်ဆန်းစုကြည်ရဲ့ ရှေ့နေတွေကို မီဒီယာကိုမဖြေကြားဖို့ စစ်အုပ်ချုပ်ရေးကောင်စီဘက်က တားမြစ်ထားတာကြောင့် ထွက်ဆိုချက် အသေးစိတ်ကိုတော့ မသိရပါဘူး။
၂၀၂၀ ရွေးကောက်ပွဲအတွက် စည်းရုံးရေးဆင်းသူတွေကို ထွက်ပြီးနှုတ်ဆက်ခဲ့တာကို ကိုဗစ်ကပ်ရောဂါဆိုင်ရာ ထုတ်ပြန်ထားတဲ့ သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေချိုးဖောက်တယ်ဆိုပြီး တရားရုံးက ဒေါ်အောင်ဆန်းစုကြည်အပေါ် အောက်တိုဘာလမှာ စွဲချက်တင်ခဲ့တာဖြစ်ပါတယ်။
သဘာဝဘေးအမှုအတွက် လာမယ့်ရုံးချိန်းမှာတော့ တရားပြိုင်ဘက်က မန္တလေးတိုင်းဝန်ကြီးချုပ် ဒေါက်တာဇော်မြင့်မောင် သက်သေ လိုက်ဖို့ရှိပါတယ်။ လာမယ့် ရုံးချိန်းကို နိုဝင်ဘာ ၂၃ ရက်နေ့ကိုချိန်းဆိုထားပြီးအဲဒီနေ့မှာတော့ သဘာဝဘေး အမှု တခုထဲကိုဘဲ စစ်ဆေးသွားမှာဖြစ်ပါတယ်။
လက်ရှိမှာ ဒေါ်အောင်ဆန်းစုကြည်ဟာ အဂတိလိုက်စားမှု၊ နိုင်ငံတော်လျှို့ဝှက်ချက်ဥပဒေချိုးဖောက်မှု စတဲ့အမှုတွေအပါအဝင် အမှုပေါင်း ၁၁ မှုထက်မနည်းနဲ့ လက်ရှိမှာ ရင်ဆိုင်နေပြီး အမှု ၅ မှုအတွက် စွဲချက်တင်ခံထားရပါတယ်။ ရွေးကောက်ပွဲဆိုင်ရာ စည်းမျဉ်း စည်းကမ်းတွေ ချိုးဖောက်တယ်ဆိုတဲ့ စွပ်စွဲချက်တွေနဲ့ ဒေါ်အောင်ဆန်းစုကြည်အပါအဝင် NLD အစိုးရလက်ထက်က ပြည်နယ်ဝန်ကြီးချုပ်တချို့ နဲ့ တာဝန်ရှိသူ စုစုပေါင်း ၁၆ ယောက်ကို တရားစွဲတယ်လို့ စစ်ကောင်စီက နိုဝင်ဘာ ၁၅ ရက်က သတင်းထုတ်ပြန်ခဲ့ပေမဲ့ ဘယ်ပုဒ်မတွေနဲ့ တရားစွဲသလဲဆိုတာ အတိအကျ ပြောဆိုခြင်း မရှိပါဘူး။ သက်ဆိုင်ရာ အမှုလိုက်ရှေ့နေတွေဘက်ကလည်း တရားရုံးက အကြောင်းကြားစာ မရသေးတဲ့အတွက် ဘယ်အမှုတွေနဲ့ တရားစွဲသလဲဆိုတာ လောလောဆယ် မသိရသေးဘူးလို့ ပြောကြပါတယ်။
ဗွီအိုအေ (မြန်မာဌာန)
Reviewed by THITHTOOLWIN
on
23:26
Rating:
No comments:
Post a Comment