 |
| ပုံစာ- စစ်ကောင်စီ စစ်ဆေးမှုကို ရှောင်ထွက်သည့် အမျိုးသမီး သေနတ်ပစ်ခံရသည့် ဒဏ်ရာ |
မေ ၁၄ရက် ၂၀၂၁
သျှမ်းပြည်တောင်ပိုင်း တောင်ကြီးမြို့တွင် အာဏာသိမ်းစစ်ကောင်စီ မှစစ်ဆေးမှုကိုလက်မခံသဖြင့် အမျိုးသမီး တစ်ဦး သေနတ်ပစ်ခံရကြောင်းသိရသည်။
တောင်ကြီးမြို့ အနောက်မြို့ပတ်လမ်းတွင် မေ (၁၂)ရက် ညနေ (၃)နာရီတွင် စစ်ကောင်စီမှ ကား၊ဆိုင်ကယ်များကို ရပ်တန့်စစ်ဆေးနေစဉ် အမျိုးသမီးသမီး က ဆိုင်ကယ်လှည့်ထွက်သွားသဖြင့် စစ်ကောင်စီမှ သေနတ်ဖြင့် ပစ်လိုက်ကြောင်း၊ အမျိုးသမီး လက်တွင် ထိခိုက်ဒဏ်ရာရရှိခဲ့ကြောင်း တောင်ကြီး ဒေသခံများပြောပြချက်အရသိရသည်။
“ ဟုတ်ပါတယ်။အဲနေ့က အနောက်မြို့ပတ်လမ်းမှာ ၃ နာရီလောက် လာသမျှဆိုင်ကယ်တွေ၊ကားတွေကို တားပြီးစစ်တယ်။ ထွက်ပြေးတဲ့သူတွေကို အကုန်ပစ်တာ။ အဲမှာအမျိုးသမီးတစ်ယောက်က ပြန်ကွေ့ပြေးတော့ သူတို့ပစ်တာ လက်ထိ သွားတယ်” ဟု မျက်မြင်တွေ့ရှိသူ တဦးက ပြောသည်။
တောင်ကြီးမြို့တွင် ယခုရက်ပိုင်း စစ်ကောင်စီ အုပ်စုသည် နေရာအနှံ့ စောင့်ဆိုင်းပြီး စစ်ဆေးမှု ပြုလုပ်နေကြောင်း၊ တချို့ လူများသည် စစ်ကောင်စီ ဖမ်းဆီးမှုကို ကြောက်ရွံ့သဖြင့် ဆိုင်ကယ်ထားပြီး ထွက်ပြေးသွားသည့် ဖြစ်စဉ်လည်း ရှိကြောင်း သိရသည်။
“ လူငယ်ယောင်္ကျားလေးတွေဆိုရင် သူတို့ ရိုက်နှက်တာတွေ လုပ်မှာ ဆိုးလို့ လိုင်စင်မဲ့ဆိုင်ကယ်ဖြစ်ရင် ထားပြီး ထွက်ပြေးလိုက်တာပဲ။ ဒီလူတွေ က စစ်ရင်လည်းကောင်းကောင်းမစစ်ဘူး။ ရိုက်နှက်တယ်။ ခြေထောက်နဲ့ ကန်တာကို” ဟု တောင်ကြီးတွင် နေထိုင်သည့် အမျိုးသားတဦး ကပြောသည်။
ယခုရက်ပိုင်းတွင် စစ်ကောင်စီ မှ လမ်းသွားလမ်းလာ ကားများကို တားပြီး စစ်ဆေးမှုပြုလုပ်ရာ စိတ်အလိုမကျဖြစ်ပါက လူငယ်များ ရိုက်နှက်မှု ၊ခြေထောက်ဖြင့် ကန်မှု နှင့် ထိုးနှက်မှုတို့ကို မကြာခဏ ကြုံနေရကြောင်း၊ ပြည်သူများအနေဖြင့် စစ်ကောင်စီ ၏ ပြုမူမှုကို ကြောက်နေရကြောင်း လည်း တောင်ကြီး ပြည်သူက ပြောသည်။
“ ငွေပေးရရင်တော်သေးတယ်။ အခုက ရိုက်နှက် စစ်ဆေးတယ်။ မထင်ရင် ကန်တော့ လူတွေလည်း သူတို့နဲ့ တိုးမှာ ကြောက်တာပေါ့။ ရှောင်ထွက်တော့လည်း သေနတ်ပစ်ခံရတယ်” ဟု တောင်ကြီး ဒေသခံလူငယ်တဦး က ဆိုသည်။
အလားတူ ယမန့်နေ့တွင်လည်း သျှမ်းပြည်နယ်တောင်ပိုင်း ပင်လုံမြို့ တွင် လမ်းသွားလမ်းလာ လိုင်စင်မဲ့ ဆိုင်ကယ်၊ကားများကို စစ်ဆေးပြီး တစ်ဦးလျှင် ငွေ ၃ သိန်းကျပ်တောင်းနေကြောင်းသိရသည်။
SHAN News (Burmese Version)
Reviewed by THITHTOOLWIN
on
20:53
Rating:
No comments:
Post a Comment