 |
| မေလ ၂ ရက်နေ့က ဆစ်ဒနီမြို့မှာ ကျင်းပတဲ့ ကမ္ဘာလုံးဆိုင်ရာ မြန်မာ့နွေဦးတော်လှန်ရေး ဆန္ဒပြပွဲ |
သြစတြေးလျမှာ ခေတ္တ နေထိုင်နေတဲ့ မြန်မာတွေ နေရပ် မြန်မာပြည်ကို လုံခြုံစိတ်ချစွာ မပြန်နိုင်မချင်း သြစတြေးလျမှာ နေထိုင်ခွင့် ဗီဇာ သက်တမ်းတိုးပေးမယ်လို့ သြစတြေးလျအစိုးရက ထုတ်ဖော်ကြေညာလိုက်ပါတယ်။
အဲဒီလူတွေ သြစတြေးလျနိုင်ငံမှာ ဘယ်လို တရားဝင် ဆက်နေထိုင်နိုင်မလဲ ဆိုတာကို လူဝင်မှု ကြီးကြပ်ရေး ဝန်ကြီးဌာနက စာရေးအကြံပေးသွားမယ်လို့ လူဝင်မှု ကြီးကြပ်ရေး ဝန်ကြီး အဲလက်စ် ဟော့ခ် က ပြောပါတယ်။
မြန်မာနိုင်ငံမှာ စစ်တပ်က အာဏာသိမ်းယူခဲ့ပြီးချိန်ကစလို့ သြစတြေးလျနိုင်ငံမှာ ခေတ္တရောက်ရှိနေတဲ့ မြန်မာနိုင်ငံသား ၃၃၀၀ ကျော်အတွက် အကာအကွယ် ပိုပေးဖို့ သြစတြေးလျ အစိုးရအနေနဲ့ ဖိအားပေး ပြောဆိုမှုတွေနဲ့ ရင်ဆိုင်နေရပါတယ်။
သြစတြေးလျနိုင်ငံမှာ လာရောက်ပညာသင်ကြားနေတဲ့ မြန်မာကျောင်းသားတွေ၊ ရေတိုနေထိုင်ခွင့် ဗီဇာနဲ့ ရောက်ရှိနေထိုင်နေသူ မြန်မာနိုင်ငံသားတွေအတွက်တော့ ဒီကြေညာချက်ကြောင့် အကြီးအကျယ် စိတ်သက်သာရာ ရသွားစေမှာ ဖြစ်ပါတယ်။
သူတို့ကို သြစတြေးလျနိုင်ငံထဲကနေ အတင်းနှင်ထုတ်တာမျိုး မလုပ်ပါဘူးလို့ သြစတြေးလျအစိုးရက ကတိပေးထားတာမျိုး ရှိခဲ့ပေမဲ့ စစ်အာဏာသိမ်းမှု ဆန့်ကျင်ကြောင်း အွန်လိုင်းပေါ်ကနေ ထုတ်ဖော်ခဲ့ကြတဲ့ကျောင်းသားတချို့ကတော့ သူတို့ မြန်မာပြည်ပြန်သွားခဲ့ရင် အရေးယူခံရမှာကို စိုးရိမ်နေကြတာပါ။
အခု သူတို့ကို သြစတြေးလျနိုင်ငံမှာ သူတို့ဘယ်လောက်ကြာကြာ နေထိုင်ခွင့် ပေးမလဲ။ ဘယ်အချိန် မြန်မာပြည် ပြန်ဖို့ စိတ်ချရမလဲဆိုတာကို သြစတြေးလျအစိုးရက ဘယ်လို ဆုံးဖြတ်မလဲ ဆိုတာကိုတော့ အသေအချာ မသိရပါဘူး။
မြန်မာနိုင်ငံမှာ မတည်မငြိမ် ဖြစ်နေမှုကြောင့် ဒုက္ခတွေ့နေတဲ့ သြစတြေးလျနိုင်ငံရောက် မြန်မာနိုင်ငံသားတွေကို သြစတြေးလျအစိုးရအနေနဲ့ နိုင်ငံတကာ ဝတ္တရားတွေနဲ့အညီ အားပေးကူညီသွားမှာ ဖြစ်တယ်လို့ လူဝင်မှု ကြီးကြပ်ရေး ဝန်ကြီး အဲလက်စ် ဟော့ခ် က ပြောပါတယ်။
အရပ်သားတွေအပေါ် မြန်မာ လုံခြုံရေးတပ်ဖွဲ့တွေအနေနဲ့ အကြမ်းဖက်ဖြိုခွဲတာတွေကို ရှောင်ကြဉ်ပြီး ထိန်းထိန်းသိမ်းသိမ်း လုပ်ဖို့၊ မတရားဖမ်းဆီး ထိန်းသိမ်းထားသူတွေကို ပြန်လွှတ်ပေးဖို့နဲ့ တွေ့ဆုံဆွေးနွေးတဲ့နည်းနဲ့ အဖြေရှာဖို့ အာဏာသိမ်း စစ်ကောင်စီကို သြစတြေးလျအစိုးရက အခိုင်အမာ ဆက်လက်တိုက်တွန်းသွားမှာ ဖြစ်တယ်လို့ ဆိုပါတယ်။
သြစတြေးလျအစိုးရဟာ အာဏာသိမ်း စစ်ခေါင်းဆောင်တွေနဲ့ စစ်ရေး ပူးတွဲဆောင်ရွက်မှုတွေကို ဆိုင်းငံ့ထားလိုက်ပေမဲ့ တခြား အနောက်အုပ်စု နိုင်ငံအတော်များများလိုတော့ စစ်ကောင်စီ ခေါင်းဆောင်တွေအပေါ် ဒဏ်ခတ်ပိတ်ဆို့မှုသစ်တွေ ချမှတ်တာမျိုး မရှိခဲ့ပါဘူး။
BBC Burmese
Reviewed by THITHTOOLWIN
on
07:08
Rating:
No comments:
Post a Comment