တောင်ကိုရီးယား ဂွမ်မြောင်မြို့တော်ဝန်နဲ့ မြို့သူမြို့သားများ မြန်မာ့အရေး ရန်ပုံငွေထည့်ဝင်

တောင်ကိုရီးယားနိုင်ငံ ဂွမ်မြောင်မြို့တော်ဝန်က မြန်မာ့ဒီမိုကရေစီရေးအတွက် ရန်ပုံငွေလှူဒါန်းပြီး ထောက်ခံကြောင်း ပြသတဲ့မြင်ကွင်း။

တောင်ကိုရီးယားနိုင်ငံ၊ ဂွမ်မြောင်မြို့တော်ဝန် ဦးဆောင်တဲ့ မြို့သူမြို့သားတွေနဲ့ ကျောင်းသားတွေဟာ မြန်မာ့ဒီမိုကရေစီရေး ထောက်ခံအားပေးတဲ့အနေနဲ့ ကိုရီးယားရောက် မြန်မာ့အရေး လှုပ်ရှားသူတွေကို ဖိတ်ခေါ်ပြီး တော်လှန်ရေးရန်ပုံငွေ လှူဒါန်းခဲ့ပါတယ်။ အပြည့်အစုံကို မခွါညို တင်ပြပေးထားပါတယ်။

ဒီနေ့ ဧပြီလ ၃ ရက်မှာ ဂွမ်မြောင်မြို့တော်ဝန် ဖတ်ဆုန်ဝမ်က ကိုရီးယားဝမ်ငွေ သိန်း ၂၀ ကို မြန်မာ့အရေး တက်ကြွလှုပ်ရှားသူတွေဆီကို အလှူငွေ ထည့်ဝင်ပါတယ်။ သတင်းစာရှင်းလင်းပွဲလည်းပါတဲ့ ဒီအခမ်းအနားမှာ မြို့တော်ဝန်က သူတို့အနေနဲ့ မြန်မာပြည်သူတွေနဲ့ တသားတည်းရှိနေကြောင်း ပြောပြခဲ့တယ်လို့ အခမ်းအနား တက်ရောက်ခဲ့သူ တောင်ကိုရီးယားနိုင်ငံရောက် မြန်မာ့အရေး ဦးဆောင်လှုပ်ရှားနေတဲ့ အမျိုးသားဒီမိုကရေစီအဖွဲ့ချုပ်၊ နိုင်ငံတကာ စည်းရုံးရေးကော်မတီ (ကိုရီးယား) ရဲ့ ဥက္ကဋ္ဌ ဦးရန်နိုင်ထွန်းက အခုလို ပြောပြပါတယ်။

“ဒီနေ့ သူတို့ ဂွမ်မြောင်မြို့တော်သူ မြို့တော်သားတွေကနေပြီးတော့ မြန်မာနိုင်ငံမှာ စစ်အာဏာသိမ်းတဲ့ကိစ္စနဲ့ ပတ်သက်ပြီးတော့ မြန်မာနိုင်ငံ ဒီမိုကရေစီရေးအတွက် လှုပ်ရှားနေကြတဲ့ မြန်မာနိုင်ငံသူ နိုင်ငံသားတွေ ကျနော်တို့ကို တတ်နိုင်သလောက် သူတို့ လှူဒါန်းချင်တယ်၊ လှူဒါန်းရတဲ့ အကြောင်းရင်းကိုလည်း သူတို့အနေနဲ့ အခမ်းအနားကြီးတခုနဲ့ လုပ်ချင်ပါတယ်ဆိုပြီးတော့ ကျနော်တို့ကို လှမ်းအကြောင်းကြားလာပါတယ်။ လှမ်းအကြောင်းကြားတဲ့အတွက် ကျနော်တို့ ဒီနေ့မနက် ၁၀ နာရီတိတိမှာ အခမ်းအနားလေး ကျင်းပပြီးတော့ ကျနော်တို့နဲ့ တွေ့ဆုံတယ်၊ အားပေးစကားပြောတယ်၊ ကိုရီးယားနိုင်ငံက အရင်တုန်းက စစ်အာဏာရှင် လက်အောက်မှာ နေခဲ့ဖူးတယ်၊ စစ်အာဏာရှင်တွေကို ပြန်တွန်းလှန်ခဲ့ဖူးတယ်၊ အသေအပျောက်တွေလည်း ဖြစ်ခဲ့တယ်၊ ထိခိုက်ဒဏ်ရာရ နာကျင်မှုတွေလည်း ခံစားခဲ့ရတယ်၊ အဖမ်းအဆီးတွေ နှိပ်စက်တာတွေဆိုတာလည်း မပြောပြလောက်အောင် တွေ့ကြုံခဲ့ရတဲ့အတွက် သူတို့ ရင်ထဲအသည်းထဲက ထပ်တူ ကိုယ်ချင်းစာစိတ် ရှိပါတယ်ဆိုတဲ့အကြောင်း ပြောပြီးတော့ ကျနော်တို့ဆီကို တော်လှန်ရေးအတွက် ရန်ပုံငွေဆိုပြီး လှူဒါန်းခဲ့တဲ့ အခမ်းအနားလေးပဲ ဖြစ်ပါတယ်။”

ပြီးခဲ့တဲ့လတည်းကပဲ ကိုရီးယားလွှတ်တော်အမတ် ၁၇ ဦးက ပြည်ထောင်စုလွှတ်တော် ကိုယ်စားပြုကော်မတီ ဦးဆောင်သူတယောက်ဖြစ်တဲ့ နိုင်ငံခြားရေးဝန်ကြီး ဒေါ်ဇင်မာအောင်နဲ့ ဖုန်းကတဆင့် စကားပြောဆိုခဲ့တာ၊ တောင်ကိုရီးယား ဝန်ကြီးချုပ်က မြန်မာသံအမတ်ကို ခေါ်ယူသတိပေးတာတွေရဲ့ နောက်မှာ ဒါဟာ တတိယမြောက် ကိုရီးယား နိုင်ငံရေးအသိုင်းအဝိုင်းက သြဇာတိက္ကမရှိသူတဦးက မြန်မာ့ဒီမိုကရေစီရေးနဲ့ အကြမ်းမဖက် အာဏာဖီဆန်ရေးအပေါ်မှာ အလေးထားကြောင်း ပြသလာတာ ဖြစ်ပါတယ်။

ဒါ့အပြင် မြန်မာပြည်မှာဖွင့်ထားတဲ့ ကိုရီးယားဘဏ်တွေအနက် ရှင်းဟန်ဘဏ်က ဌာနေ မြန်မာဝန်ထမ်း မစုစုကြည် သေဆုံးမှုနဲ့ ပတ်သက်လို့လည်း မြန်မာပြည်ကလာတဲ့ သတင်းတွေကို တောင်ကိုရီးယား သတင်းတွေမှာ ချက်ချင်း ရေးသားထုတ်လွှင့်ခဲ့ကြတယ်လို့လည်း သူက ပြောပါတယ်။

“ကိုရီးယားနိုင်ငံကပိုင်တဲ့ ကုမ္ပဏီဖြစ်တဲ့အတွက် CDM တွေဘာတွေ သူတို့မသိဘူး၊ သူတို့လည်း မဖြစ်မနေဆင်းရမယ်၊ အကယ်၍ မဆင်းဘူးဆိုရင် လစာမပေးတာတို့ နောက်ဆုံး အလုပ်ကနေ ဖြုတ်ပစ်မှာတို့ အဲလိုသဘောမျိုးအထိတောင် စာထဲမှာ ရေးထားတာ ရှိထားတဲ့အတွက်ကြောင့်မို့ အခုလို စစ်အုပ်စုကနေ ရှင်းလိုက်တဲ့အခါမှာ သူ့ကို ထိသွားတယ်။ ထိသွားပြီး တန်းသေဆုံးသွားတဲ့အထိ ဖြစ်တယ်ပေါ့ဗျာ။ အဲဒီတော့ ပြန်ပြီးတော့ သတ္တုချကြည့်မယ်ဆိုရင် အဓိကတာဝန်ရှိတဲ့သူက ရှင်းဟန်ဘဏ်ကုမ္ပဏီက အရာရှိ အရာခံတွေအပေါ်ကို သွားပြီးတော့ ယူတာပေါ့ဗျာ။”

အခုလို နိုင်ငံရေးအသိုင်းအဝိုင်းကသာမက ကိုရီးယားနိုင်ငံသားတွေဟာ မြန်မာနိုင်ငံက အကြမ်းမဖက် အာဏာဖီဆန်မှုကို ထောက်ခံကြပုံကိုလည်း သူက အခုလို ပြောပါတယ်။

“ဘာကြောင့်လဲဆို ကလေးလေးတွေ ဆိုရင်လည်း သူတို့ကိုယ်တိုင် သူတို့လက်ရေးနဲ့ မြန်မာဘာသာကို သူတို့ ရအောင်ရေးပြီးတော့ မြန်မာ အားတင်းထားပါ၊ မြန်မာ ကေျနာ်တို့ အတူတကွ ရှိပါသည်၊ အဲလိုမျိုး စာတန်းတွေ ရေးပြီးတော့ ကလေးတွေက မြန်မာနိုင်ငံကို အားပေးနေတာလည်း ရှိတယ်။ ပြီးတော့ အနုပညာရှင်အလွှာဘက်က လူတွေကလည်း ကျနော်တို့ မြန်မာ့ဒီမိုကရေစီရေးအတွက် အားပေးတာရှိတယ်။ နောက် နိုင်ငံရေးအသိုင်းအဝိုင်း အဆင့်ဆင့်ကလည်း ကျနော်တို့ မြန်မာ့ဒီမိုကရေစီရေးကို အားပေးတာ ရှိပါတယ်။ ဝန်ထမ်းတွေ အဆင့်အမျိုးမျိုးကလည်း ကျနော်တို့ မြန်မာ့အရေးကို အားပေးသူရှိသလို ကိုရီးယား မဟာယာန ဘုန်းတော်ကြီးတွေ အပါအဝင် ကိုရီးယား ခရစ်ယာန်ဘုန်းတော်ကြီးတွေအဆုံး ကျနော်တို့ မြန်မာ့ဒီမိုကရေစီရေးကို တက်ကြွစွာနဲ့ အားပေးနေတာ တွေ့ရပါတယ်ခင်ဗျ။”

ကိုရီးယားနိုင်ငံဟာ မြန်မာ့အရေးကို ထောက်ခံရာမှာ နိုင်ငံရေးအသိုင်းအဝိုင်းက သြဇာကြီးမားသူတွေသာမက အနုပညာရှင်တွေ အပါအဝင် ဘာသာစုံ အသိုင်းအဝိုင်းပါမကျန် အလွှာစုံက ပါဝင်နေတာဖြစ်ကြောင်းလည်း ကိုရန်နိုင်ထွန်းက ပြောပါတယ်။

မခြါညိဳ/ VOA Burmese

https://burmese.voanews.com/a/south-korea-mayor-funds-myanma-democracy/5839476.html