အမေရိကန် အခြေစိုက် ကချင်မဟာမိတ်အဖွဲ့ CRPH နှင့် ပူးပေါင်းဆောင်ရွက်မည်

CRPH ပြည်ထောင်စုလွှတ်တော်ကိုယ်စားပြုကော်မတီက ကြေညာလိုက်တဲ့ နိုင်ငံရေးရည်မှန်းချက်ဟာတိုင်းရင်းသားတွေလိုလားတဲ့ ဖယ်ဒရယ်ပြည်ထောင်စု စနစ် ပေါ်ပေါက်ရေး အခင်းအကျင်းဖြစ်တဲ့အတွက် CRPH နဲ့အပြည့်အဝပူးပေါင်းဆောင်ရွက်သွားဖို့ရှိတယ်လို့ အမေရိကန်အခြေစိုက် ကချင်မဟာမိတ်အဖွဲ့ က ပြောကြားလိုက်ပါတယ်။

CRPH ကဖွဲ့မယ့် ယာယီအစိုးရ အားကောင်းအောင် ကချင်အဖွဲ့တွေဘက်က ဘယ်လိုပါဝင်ဆောင်ရွက်ဖို့ရှိမလဲ။ စစ်အာဏာသိမ်းမှု ဆန့်ကျင်ရေးလှုပ်ရှားမှုကြောင့် အကြမ်းဖက်ဖြိုခွဲခံရတဲ့ ကချင်ပြည်သူတွေအတွက်KIO/KIA ကချင်လွတ်မြောက်ရေးအဖွဲ့က ဘယ်လို အကာအကွယ်ပေးမှာလဲ။ ကချင်မဟာမိတ်အဖွဲ့ ဥက္ကဌ Gum San NSang ကို မအင်ကြင်းနိုင်က Skype ကနေ ဆက်သွယ်မေးမြန်းထားပါတယ်။

မအင်ကြင်းနိုင်။ ။ ကချင်မဟာမိတ်အဖွဲ့ကနေပြီးတော့ ပြည်တွင်းမှာရှိတဲ့ ပြည်ထောင်စု လွှတ်တော် ကိုယ်စားပြုကော်မတီ CRPH ကို အိတ်ဖွင့်ပေးစာပို့တယ်ပေါ့နော်။ နောက်ဆုံးဒီ အိတ်ဖွင့်ပေးစာမှာ CRPH ရပ်တည်ချက်ကို ကချင်မဟာမိတ်အဖွဲ့အနေနဲ့ ထောက်ခံကြောင်း ကြေညာချက်ထဲမှာ တွေ့ရပါတယ်။ အဲဒီတော့ ကချင်မဟာမိတ်အဖွဲ့အနေနဲ့ CRPH နဲ့က ဘယ်လို ပူးပေါင်းဆောင်ရွက်နိုင်ဖို့ ရှိသလဲရှင့်။

Gum San NSang။ ။ ကျနော်တို့က နည်းလမ်းပေါင်းစုံနဲ့ ပါဝင်ဆောင်ရွက်လို့ရပါတယ်ခင်ဗျ။ ကျနော်တို့ ကချင်အနေဖြင့် တပေါင်းတည်း CRPH နဲ့ လုပ်ဆောင်လာဖို့ အစီအစဉ်တွေရော ကျနော်တို့အခု ဆက်သွယ်မှု လမ်းကြောင်းတွေ ဖွင့်ထားတာပေါ့။ ဒါပေမယ့် အဓိက ဒီ Kachin Alliance အနေဖြင့်ကတော့ ပြည်ပမှာ အင်အားစုအနေဖြင့် ရပ်တည်နေတယ်ဆိုတော့ CRPH ရဲ့ ပြည်ပရေးရာနဲ့ ပတ်သက်ပြီးတော့မှ အကြံပြုမှု ပါဝင်ပြီးတော့ ကျနော်တို့ ကူညီထောက်ပံ့လို့ ရတဲ့အခြေအနေတွေမှာ ပါဝင်ဖို့ ကျနေ်ာတို့ ဆက်သွယ်မှု ရှိပါတယ်ခင်ဗျ။

မအင်ကြင်းနိုင်။ ။ CRPH က လွှတ်တော် ကိုယ်စားလှယ်ကိုယ်တိုင်ကလည်း ၂၀၀၈ ဖွဲ့စည်းပုံအရ ရွေးကောက်ပွဲနဲ့ သူတို့ လွှတ်တော် ကိုယ်စားလှယ်တွေဖြစ်လာတယ်။ တဖက်မှာလည်း ၂၀၀၈ အခြေခံ ဥပဒေကိုလည်း ဖျက်သိမ်းမယ်ဆိုတဲ့အနေအထားမျိုး ရှိနေတဲ့အခါကျတော့ သူတို့ရပ်တည်ရတဲ့ အခြေအနေ အခက်အခဲကိုရော ဘယ်လိုမြင်သလဲရှင့်။

Gum San NSang။ ။ ၂၀၀၈ ဖွဲ့စည်းပုံနဲ့ ပတ်သက်ပြီးတော့မှ CRPH ရဲ့ Legitimacy ပေါ့နော် ၂၀၂၀ ရွေးကောက်ပွဲကနေ ဆင်းသက်လာတယ်ဆိုတာ ကျနော်တို့အနေနဲ့ ယေဘုယျအားဖြင့်လက်ခံတယ်။ ဒါပေမယ့် လက်ရှိ ပကတိအခြေအနေက ၂၀၀၈ ဖွဲ့စည်းပုံအခြေခံ ဥပဒေကို လက်နဲ့ ရေးပြီးတော့ ခြေနဲ့ ဖျက်လိုက်ပြီဆိုတော့ အခု ကျနော်တို့ တိုင်းရင်းသားတွေ အကုန်လုံးလိုလားတဲ့ ဖယ်ဒရယ်နဲ့ ကိုက်ညီတဲ့ ဖွဲ့စည်းပုံအခြေခံ ဥပဒေ အခင်းအကျင်းရလာတဲ့အချိန်လို့ ကျနော်တို့ ယူဆတယ်။ ဒါကြောင့် CRPH ကနေပြီးတော့ Constitution အသစ်ရေးဆွဲလာတဲ့အချိန်မှာရော စစ်မှန်တဲ့ ဖယ်ဒရယ် ပင်လုံကတိကဝတ်နဲ့ ဆက်စပ်ပြီးမှ ပင်လုံကတိကဝတ် စိတ်ဓါတ်ကို အခြေခံတဲ့ ဖယ်ဒရယ် ပြည်ထောင်စု ဖြစ်ပေါ်လာရေးပေါ့နော် အဲဒီ ၂ ခုကနေ CRPH က လည်း ဖွင့်ဟလာတယ်ဆိုတော့ ဖျက်သိမ်းရေးနဲ့ ဖယ်ဒရယ် Constitution အသစ်ရေးဆွဲရေးအတွက် ဖွင့်ဟလာတယ်ဆိုတော့ ကျနော်တို့က ကြိုဆိုရမှာ ဖြစ်ပါတယ်။

မအင်ကြင်းနိုင်။ ။ CRPH ကို ကချင်အဖွဲ့အစည်းတွေပေါ့နော် အထူးသဖြင့် KIO လို ကချင်လက်နက်ကိုင်အဖွဲ့အစည်းတွေ ၊ အခြားတိုင်းရင်းသားလက်နက်ကိုင် အဖွဲ့အစည်းတွေရဲ့ ထောက်ခံမှုအပိုင်းကိုရော ဘယ်လိုတွေ့ရသလဲရှင့်။

Gum San NSang ။ ။ ယေဘုယျအားဖြင့်ကတော့ Federal principle နဲ့ ပတ်သက်ပြီးတော့ ဖယ်ဒရယ်မူနဲ့ အခု CRPH ရဲ့ ရပ်တည်ချက်ကိုထောက်ခံမှုကတော့ ကျနော်တို့ ကြားနေရပါတယ်ခင်ဗျ အများပိုင်းပေါ့နော်။ KIO ပဲ မဟုတ်ဘူး ကချင်အမျိုးသားအသိုက်အဝန်းကနေပြီးတော့မှ လက်ခံကြပါတယ်ခင်ဗျ။

မအင်ကြင်းနိုင်။ ။ အဲဒီတော့ CRPH က အခု ယာယီအစိုးရလည်းဖွဲ့မယ်၊ ယာယီအစိုးရ အားကောင်းလာဖို့က ဥပမာ ကချင်မဟာမိတ်အဖွဲ့လို ပြည်ပမှာ ရှိတဲ့ အဖွဲ့တွေ ၊ နောက်ပြီးတော့ အထူးသဖြင့် တိုင်းရင်းသားလက်နက်ကိုင် အဖွဲ့အစည်းတွေအနေနဲ့ ဘယ်လိုအားကောင်းအောင် ပံ့ပိုးပေးနိုင်တဲ့ အနေအထားရှိသလဲရှင့်။

Gum San NSang။ ။ ကျနော်တို့ ဒီ နိုင်ငံတကာ ဆက်ဆံရေးနဲ့ ပတ်သက်ပြီးတော့မှ ကျနော်တို့ကနေပြီးတော့ သီးသန့်ကတော့ အမေရိကန် ပြည်ထောင်စုအစိုးရနဲ့ရော ပုံမှန်ဆက်ဆံရေးရှိတယ်။ ရှိတော့ သူတို့ကလည်းလိုလားတာ တကယ့်ညွန့်ပေါင်းအစိုးရဆိုတာမှာ အကုန်လုံး ပါဝင်ရေးမူက အလေးထားကြပါတယ်။ ပါဝင်ရေးမူမှာ ကျနော်တို့ ပါဝင်လာပြီဆိုရင် CRPH အတွက်ပဲဖြစ်ဖြစ် Coalition government ပေါ့နော် အခု အသစ်ပေါ်ပေါက်လာမယ့်အစိုးရအတွက်ရော အင်အားစုတခုဖြစ်ပါလိမ့်မယ်။ နိုင်ငံတကာကလ်ညး လှိုက်လဲကြိုဆိုတဲ့ အင်အားစု အစိုးရတခုဖြစ်လာနိုင်တယ်လို့ ကျနေ်ာတို့ မြင်ရတယ်။ ဒါပေမယ့် ကျနော်တို့ ကချင်အမျိုးသားတွေအတွက်ကတော့ အရေးကြီးတာကတော့ တကယ့် ဖယ်ဒရယ် Guarantee ပေါ့နော် ၊ ကျနော်တို့အတွက် စစ်မှန်တဲ့ ဖယ်ဒရယ်ကို အာမခံနိုင်တဲ့ အဆင့်ကတော့ CRPH ကနေပြီးတော့ ပြသရမှာ ဖြစ်ပါတယ်။

မအင်ကြင်းနိုင်။ ။ အခုဆိုရင် မြန်မာနိုင်ငံမှာ စစ်တပ်ဖွဲ့စည်းထားတဲ့ အုပ်ချုပ်ရေးကောင်စီကနေပြီးတော့ ဆန္ဒပြသူတွေကို အကြမ်းဖက် ပစ်ခတ်နှိမ်နင်းနေတဲ့နေရာမှာ တနင်္လာနေ့ကဆိုရင် မြစ်ကြီးနားမှာ ပစ်ခတ်တဲ့အတွက် သေဆုံးမှုတွေ ရှိပါတယ်။ ဆိုတော့ အဲဒါနဲ့ ပတ်သက်ပြီးတော့ KIO ၊ KIA အဖွဲ့ကနေပြီးတော့ သူတို့အနေနဲ့ ဒီလို ပြည်သူတွေကို သတ်ဖြတ်မယ်ဆိုရင် နည်းလမ်းတခုနဲ့ ပါဝင်လာနိုင်မယ့် အခြေအနေရှိတယ်ဆိုပြီးတော့ ထုတ်ပြန်ကြေညာတာတွေလည်းရှိပါတယ် ဆိုတော့ KIO ဘက်က ဘယ်လိုတုံ့ပြန်ဆောင်ရွက်နိုင်မယ့် အနေအထားရှိသလဲ။

Gum San NSang။ ။ KIA အဖွဲ့အစည်းကနေ တာဝန်ခံ ကျနော်ပြောဆိုမှု လုပ်လို့မရဘူးပေါ့နော် ဒါပေမယ့် ကျနော်တို့က သို့လော သို့လော ကြားရတာကတော့ စစ်ရေးလှုပ်ရှားမှုကတော့ ရှိနေမြဲပါပဲ။ ဒီရှမ်းပြည်မြောက်ပိုင်း ကချင်ပြည်နယ်အရှေ့တောင်ပိုင်းဘက်မှာတော့ စစ်ရေးတင်းမာမှုနဲ့ လှုပ်ရှားမှု ရှိနေတယ်။ နောက် KIO ကနေပြီးတော့ လက်နက်ကိုင်တယ်ဆိုတော့ တကယ့်တုံ့ပြန်မှုကိုယ်က စဉ်းစားလို့ရတာပေါ့၊ အဓိက ဘယ်လိုမျိုး တုံ့ပြန်လာမလဲဆိုတာ နည်းလမ်းပေါင်းစုံ စဉ်းစားလို့ရတဲ့အထဲမှာ လက်နက်ကိုင်တဲ့ နည်းလမ်းကရော မပါဘူးလို့တော့ ပြောရမှာ ခက်မယ်လို့ ထင်ပါတယ်။

မအင်ကြင်းနိုင်။ ။ အဲဒါဆိုရင် တဖက်မှာ ကရင်ပြည်နယ်မှာဆိုရင် DKBA ဆိုရင် သူတို့ ကရင်ပြည်သူတွေ စစ်အာဏာသိမ်းမှု ဆန့်ကျင်ဆန္ဒပြတာ၊ လမ်းမတွေပေါ်မှာထွက်ပြီးဆန္ဒပြတာတွေကို သူတို့ လက်ပြီးတော့ပေါ့နော် ကာကွယ်စောင့်ရှောက်ပေးတယ်ပေါေ့နာ် သူတို့တပ်တွေနဲ့ ဆိုတာကို တွေ့ရတယ်ပေါေ့နာ်။ ဆိုတော့ ကချင်ပြည်နယ်မှာရော ကချင်တိုင်းရင်းသားတွေ သူတို့ စစ်အာဏာသိမ်းတာကို ဆန့်ကျင်တာကို KIA လို တပ်တွေကနေပြီးတော့ ကရင်ပြည်နယ်မှာလို အဲလို ထွက်ပြီးတော့ ဝန်းရံပေးနိုင်တဲ့ အနေအထားရော ဘယ်လိုရှိပါသလဲ။

Gum San NSang။ ။ မရှိပါဘူးခင်ဗျ NCA မထိုးထားဘူး ၊ NCA သို့မဟုတ် အရင်တုန်းက ငြိမ်းချမ်းရေးကာလမှာဆိုရင် KIA တို့ မြစ်ကြီးနားမနောကွင်းမှာ လက်နက်ကိုင်ပြီးတော့မှ ဝင်လို့ရတယ်။ ဒါပေမယ့် ငြိမ်းချမ်းရေးစာချုပ် NCA မထိုးထားဘူးဆိုတော့ မြို့ဘက်ကို လက်နက်ကိုင်ပြီးမှ ရောက်လာတာနဲ့ကို စစ်ပွဲဖြစ်လာမှာပဲ။ စိုးရိမ်ရတာကတော့ တချို့ပြောတာပေါ့ KIA ကနေပြီးတော့ ဘာဖြစ်လို့ မြို့မဝင်လာသလဲဆိုတာ။ မြို့ဝင်လာတဲ့အချိန်မှာ ကျနော်တို့ရဲ့ နိုင်ငံရေးအခင်းအကျင်း၊ ဆန္ဒပြမှု အခင်းအကျင်းတွေက အကုန်လုံး ပြောင်းလဲလာလိမ့်မယ် ။ အဲဒီပြောင်းလဲမှုအထိကတော့ ခေါင်းဆောင်တွေကလည်း စိုးရိမ်မှုတွေ ရှိမှာပေါေ့နာ်။ အဲလို အလွန်အကျွံမဖြစ်အောင် ထိခိုက်နစ်နာမှုတွေကို စဉ်းစားပြီးမှပဲ ပါဝင်သင့် မပါဝင်သင့်တွေ အခု ဆုံးဖြတ်ချက်တွေ လုပ်နေကြတာပေါ့ခင်ဗျ။ 

အင်ကြင်းနိုင်/ VOA Burmese

https://burmese.voanews.com/a/kachin-alliance-crph-/5808136.html