ဝါရှင်တန် ဒီစီ မြန်မာသံရုံး သံဝန်ထမ်း ၅ ဦးနဲ့ ဘာလင် မြန်မာသံရုံးက ၁ ဦး CDM ထဲပါလာ

အမေရိကန်ပြည်ထောင်စု၊ ဝါရှင်တန်မြို့တော်၊ မြန်မာနိုင်ငံသံံရုံးက သံဝန်ထမ်း ၅ ဦးဟာ CDM လို့ခေါ်တဲ့ အကြမ်းမဖက် အာဏာဖီဆန်ရေး လှုပ်ရှားမှုထဲမှာ ပါဝင်လိုက်တဲ့အကြောင်း ဒီကနေ့မှာပဲ သူတို့ိကိုယ်ပိုင် ဖေ့စ်ဘုတ်စာမျက်နှာတွေကနေ အသီးသီး ကြေညာကြပါတယ်။

အဲဒီဝန်ထမ်းငါးဦးကတော့ ဦးဇင်ဖုန်းတင့်၊ ဒေါ်သက်ထားမြရည်စံ၊ ဒေါ်ကြူကြူမြင့်၊ ဦးကျော်စွာထွန်းနဲ့ ဒေါ်စုစုအောင်တို့ဖြစ်ပါတယ်။

မြန်မာနိုင်ငံတွင်း CDM လှုပ်ရှားမှုမှာ ပါဝင်နေသူတွေနဲ့အတူ ပူးပေါင်းသွားမယ်လို့ သူတို့ ၅ ယောက်လုံးရဲ့ ထပ်တူ ရေးသားချက်တွေမှာ ပြောထားပါတယ်။

မြန်မာပြည်သူတွေက ဒီမိုကရေစီနည်းလမ်းနဲ့ ရွေးကောက်တင်မြှောက်တဲ့ အရပ်သားအစိုးရကို လက်နက်အားကိုးနဲ့ အဓမ္မ စစ်အာဏာသိမ်းတာနဲ့ ငြိမ်းချမ်းစွာ ဆန္ဒပြသူတွေကို အသက်ဆုံးရှုံးစေသည်အထိ အကြမ်းဖက် နှိမ်နင်းတိုက်ခိုက်တာတွေအပေါ် များစွာ စိုးရိမ် ဝမ်းနည်းရတယ်လို့လည်း သံဝန်ထမ်း ငါးဦးက ရေးထားပါတယ်။

လွတ်လပ်ပြီး တရားမျှတတဲ့ ၂၀၂၀ ပြည့်နှစ်၊ နိုဝင်ဘာလ ရွေးကောက်ပွဲရလဒ်ကို လေးစားပြီး နိုင်ငံတော်အာဏာကို ပြည်သူတွေလက်ထဲ ပြန်လည်အပ်နှံဖို့လည်း တညီတညွတ်တည်း တောင်းဆိုထားပါတယ်။

သူတို့ရဲ့ ပါဝင်မှုဟာ မြန်မာပြည်သူတွေနဲ့အတူ ရပ်တည်ပြီး မြန်မာနိုင်ငံသားတစ်ယောက်ရဲ့ဆန္ဒကို ငြိမ်းချမ်းစွာ ထုတ်ဖော်ခြင်းပြီး ရာထူးကနုတ်ထွက်တာ လုံးဝမဟုတ်ဘူးလို့လည်း အခိုင်အမာပြောထားကြပါတယ်။

အလားတူ ဂျာမနီနိုင်ငံ၊ ဘာလင်မြို့၊ မြန်မာသံရုံးမှာ သံရုံးစာရေး (Attache) အဖြစ် တာဝန်ထမ်းဆောင်နေတဲ့ ဒေါ်မြတ်ဇာဇာခိုင်ကလည်း CDM လှုပ်ရှားမှုမှာ ပါဝင်တဲ့အကြောင်း ဝါရှင်တန်က သံဝန်ထမ်းတွေနဲ့ မရှေးမနှောင်းမှာပဲ သူ့ဖေ့စ်ဘုတ်မှာ ရေးထားပါတယ်။

ဒါဟာဖြင့် ဥရောပတိုက်ဘက်မှာ ရှိတဲ့ မြန်မာ သံဝန်ထမ်းတွေထဲက CDM လှုပ်ရှားမှုမှာ ပထမဆုံး ပါဝင်လာသူ ဖြစ်ပါတယ်။

"ဖေဖော်ဝါရီ ၁ ရက်နေ့က  စစ်အာဏာရှင်များက တရားဝင်ရွေးကောက်ပွဲရလဒ်ဖြင့် အနိုင်ရရှိခဲ့တဲ့ လူထုခေါင်းဆောင်/ နိုင်ငံတော်၏အတိုင်ပင်ခံပုဂ္ဂိုလ်/ ကျမတို့နိုင်ငံခြားရေးဝန်ကြီး အမေဒေါ်အောင်ဆန်းစုကြည်နှင့် သမ္မတကြီး ဦးဝင်းမြင့်တို့အပါအဝင် အခြားသောလူထုကိုယ်စားလှယ်များအား ဥပဒေမဲ့ဖမ်းဆီးခြင်း ၊ နိုင်ငံတော်အာဏာကို လက်နက်အားကိုးဖြင့်  မတရားသိမ်းပိုက်ခဲ့ရုံမက ငြိမ်းချမ်းစွာဆန္ဒထုတ်ဖော်သည့် အပြစ်မဲ့ပြည်သူများကို မတရား သတ်ဖြတ် ဖမ်းဆီး ညှဉ်းပန်း နှိပ်စက်မှုများကို နေ့စဉ်ရက်ဆက် ရက်ရက်စက်စက် လုပ်ဆောင်နေသည်ကို မြင်ကြားရသည်မှာ ပြောပြ၍ မရအောင်ပင် စိတ်ပြိုကွဲ ခံစားရပါသည်။ သို့ပါ၍ ကျမအနေဖြင့် အကြမ်းဖက်အဖွဲ့အစည်း စစ်အာဏာရှင်အုပ်စု၏ လက်အောက်တွင်  မည်သို့သောအခြေအနေတွင်မျှ ဆက်လက်တာဝန်ထမ်းဆောင်ရန် မဖြစ်နိုင်တော့ပါ။

ယခုအချိန်မှစ၍ Civil Disobedience Movement (CDM) မှာ ပါဝင်မည်ဖြစ်ပြီး ပြည်သူနှင့်အတူ တစ်သားတည်း ရပ်တည်သွားမှာ ဖြစ်ပါတယ်။" လို့ ဒေါ်မြတ်ဇာဇာခိုင်က ရေးထားပါတယ်။

အလုပ်ကနုတ်ထွက်တာ မဟုတ်ဘဲ "စစ်အုပ်စု၏ယန္တရား ရပ်တန့်ရန်အတွက်သာ ဆောင်ရွက်ခြင်းဖြစ်ရာ ရွေးကောက်ခံတရားဝင် ပြည်သူ့အစိုးရ / ပြည်ထောင်စုလွှတ်‌တော်ကိုယ်စားပြုကော်မတီ (CRPH) ၏ ညွှန်ကြားချက်များကို လိုက်နာ၍ ပေးအပ်လာသည့် တာဝန်များကို ထမ်းဆောင်သွားမည်ဖြစ်ပါသည်။" လို့လည်း သူကရေးထားပါတယ်။

ဖေဖော်ဝါရီလ ၄ ရက်နေ့က ဝါရှင်တန် ဒီစီ သံရုံးကပဲ ပထမအတွင်းဝန် ဦးမောင်မောင်လတ်ဟာ ရာထူးကနုတ်ထွက်ပြီး အမေရိကန်ပြည်ထောင်စုမှာ နိုင်ငံရေးခိုလှုံခွင့် တောင်းခံထားပါတယ်။

အဲဒီနောက် ပြီးခဲ့တဲ့သီတင်းပတ် သောကြာ၊ ဖေဖော်ဝါရီလ ၂၆ ရက်နေ့မှာတော့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်၊ သံအမတ်ကြီး ဦးကျော်မိုးထွန်းက မြန်မာနိုင်ငံမှာ စစ်အာဏာသိမ်းတာကို အသိအမှတ်မပြုဘဲ အမျိုးသားဒီမိုကရေစီအဖွဲ့ချုပ် (NLD) ပါတီကိုပဲ ဆက်ပြီးကိုယ်စားပြုသွားမယ်လို့  ကုလသမဂ္ဂအထွေထွေညီလာခံမှာလုပ်တဲ့ မြန်မာ့အရေးစည်းဝေးပွဲအတွင်း ကြေညာခဲ့ပါတယ်။

CRPH ကို အသိအမှတ်ပြုပြီး CDM လှုပ်ရှားမှုကို ထောက်ခံကြောင်းလည်း ဦးကျော်မိုးထွန်းက ပြောခဲ့ပါတယ်။

မတ်လ ၃ ရက်နေ့ကလည်း ကာလီဖိုးနီးယားပြည်နယ်၊ လော့စ်အိန်ဂျလိစ်မြို့၊ မြန်မာကောင်စစ်ဝန်ချုပ်ရုံးက သံရုံးအုပ် ဒေါ်မြမြကြည်က အာဏာသိမ်းစစ်ကောင်စီရဲ့ မတရားတဲ့လုပ်ရပ်ကို မထောက်ခံတဲ့အတွက်ကြောင့် CDM လှုပ်ရှားမှုထဲမှာ ပါဝင်တယ်လို့ ကြေညာခဲ့ပါတယ်။

ပြည်ထောင်စုလွှတ်တော်ကိုယ်စားပြုကော်မတီ (CRPH) နဲ့ ဆက်သွယ်ပြီးတော့ CRPH လမ်းညွှန်ချက်အတိုင်း တသွေမတိမ်း လိုက်နာသွားမယ်လို့လည်း ဒေါ်မြမြကြည်က ပြောပါတယ်။

 VOA Burmese

https://www.facebook.com/VoA.Burmese.News