နိုင်ငံတဝန်း မြို့အသီးသီးမှာ ဆန္ဒပြပွဲတွေ ဆက်ဖြစ်၊ ပစ်ခတ်မှုတွေရှိခဲ့

မန္တလေးမြို့ စစ်အာဏာဖီဆန်ဆန္ဒပြပွဲ မြင်ကွင်း။ (မတ် ၄၊ ၂၀၂၁)

စစ်အာဏာသိမ်းမှုကို ဆန့်ကျင်ဆန္ဒပြကြသူတွေကို မနေ့က လုံခြုရေးတပ်ဖွဲ့တွေက အပြင်းအထန်ပစ်ခတ်ဖြိုခွဲခဲ့တဲ့အတွက် လူပေါင်း ဒါဇင်နဲ့ချီ သေဆုံးမှုတွေရှိခဲ့ပေမဲ့ ဒီကနေ့မှာ နိုင်ငံတစ်ဝန်း ဆန္ဒပြသူတွေက လမ်းမပေါ်ထွက် ဆက်ပြီး ဆန္ဒပြနေကြဆဲဖြစ်ပါတယ်။ ဒီအကြောင်းကို ဗွီအိုအေ မြန်မာပိုင်းသတင်းထောက် မအိမ့်သန္တာထွန်းက ပြောပြပါမယ်။

မနေ့က နိုင်ငံတစ်ဝန်း ဆန္ဒပြသူတွေကို လုံခြုံရေးတပ်ဖွဲ့က အကြမ်းဖက် ပစ်ခတ်ဖြိုခွဲတာတွေ လုပ်ခဲ့တဲ့ အတွက် လူပေါင်း ဒါဇင်နဲ့ချီ သေဆုံးခဲ့ပါတယ်။ ရန်ကုန်တိုင်းမြောက်ဥက္ကလာမြို့နယ်က ၃၅ ဦးနဲ့ အများဆုံး သေဆုံးခဲ့တာပါ။ ဒီလို အကြမ်းဖက် ပစ်ခတ်ဖြိုခွဲမှု သေဆုံးမှုတွေ ရှိခဲ့ပေမဲ့ ဒီကနေ့မှာလည်း ဆန္ဒပြသူတွေက ပုံမှန်အတိုင်း ဆက်ပြီးဆန္ဒပြနေကြပါတယ်။

မန္တလေးမှာ မနေ့က ပစ်ခတ်မှုကြောင့် သေဆုံးသူ သုံးဦး ရှိခဲ့ပါတယ်။ ဒီကနေ့မနက်ပိုင်းကလည်း မန္တလေးမြို့ ကောင်းကင်မှာ တိုက်လေယာဉ် ငါး စီး ပျံသန်းနေခဲ့ပေမဲ့ ဆန္ဒပြသူတွေကို ဆိုးဆိုးဝါးဝါး အကြမ်းဖက် ဖြိုခွင်းတာမျိုးတော့ မရှိခဲ့ဘူးလို့ မန္တလေးမြို့ ဆန္ဒပြ ခေါင်းဆောင်တစ်ဦးဖြစ်သူ ကိုတေဇာဆန်းက ပြောပါတယ်။

“ဒီနေ့မှာတော့ ထိပ်တိုက်တွေတော့ ကျနော်တို့ အင်အားစုတွေ ဖြိုခွင်းတာမျိုးတော့ အမရှိသေးဘူး။ ဒါပေမဲ့ ဒီအာဏာရှင်တွေရဲ့ ဒီစစ်သားတွေ၊ ရဲတွေက ကျနော်တို့ လူထုကို အချိန်မရွေး ခြိမ်းခြောက်နှောင့်ယှက်နေမယ်ဆိုတာ ကျနော်တို့က အမြဲတမ်း သတိပြုထားဖို့လိုတယ်။ နောက်ရက်တွေမှာဆိုလည်း ဒါမျိုးတွေက အချိန်မရွေးဖြစ်နိုင်တယ်။ သို့သော်ကျနော်တို့ ပြည်သူတွေကလည်း လုပ်စရာရှိတဲ့ ငြိမ်းချမ်းစွာ ဆန္ဒဖော်ထုတ်တာကို ဆက်လက်ပြီးတော့ ဖော်ထုတ်ပြသနေကြမှာပါခင်ဗျ။ ကျနော်တို့ အပေါ်မှာပျံနေတာပါပဲ။ ကျနော်တို့ ထိုင်သပိတ်လုပ်ဖို့ပြင်ဆင်နေချိန်ပေါ့နော်။ အဲ့မတိုင်ခင် ၈ ခွဲ၊ ၉ နာရီလောက်မှာပေါ့။ ကျနော်မြင်တာက သုံးခေါက်ပေါ့။ မြို့ကို ဖြတ်ပြီးတော့ ပျံတာပေါ့။ တိုက်လေယာဉ် ငါး စီးဗျ၊ မြို့ပေါ်ကိုပေ့ါနော်။ နိမ့်နိမ့်လေးပဲ တော်တော်ကိုနိမ့်တယ်။ ကျနော်တို့ မြင်နေရတယ်။ အသံတွေလည်း ကြားနေရတယ်ဗျ။ အဓိက လူထုကို ပိုပြီးတော့ အကြောက်တရား၊ ကြောက်စိတ် ပိုပြီးများလာအောင် ခြိမ်းခြောက်တဲ့ သဘော၊ အင်အားပြတဲ့သဘောလို့ပဲ ယူဆတယ်။ နောက်တစ်ခုက သူတို့ကိုယ်သူတို့လည်းပဲ သူတို့မှာ အင်အားတွေ ရှိတယ်ဆိုတာကို ပြချင်တဲ့သဘောပေါ့နော်။ အဓိကကတော့ ဆန္ဒပြနေတဲ့ မြို့လူထုကို ခြိမ်းခြောက်တဲ့သဘောလို့ပဲ ကျနော့်အနေနဲ့မြင်ပါတယ် ခင်ဗျ။”

မန္တလေးတိုင်း မြင်းခြံမြို့နယ်မှာလည်း မနေ့က သေဆုံးမှုတွေရှိခဲ့ပြီး ဒီကနေ့ ဆန္ဒပြသူတွေကိုလည်း ပစ်ခတ်ဖြိုခွဲမှုတွေ ရှိခဲ့တယ်လို့ မြင်းခြံမြို့ လူမှုကယ်ဆယ်ရေး အသင်းက တာဝန်ရှိသူတစ်ဦးက ပြောပါတယ်။

မန္တလေးမြို့ စစ်အာဏာဖီဆန်ဆန္ဒပြပွဲ မြင်ကွင်း။

“ဒီနေ့ သူတို့ လုပ်တာက မြို့လယ်ခေါင်ကြီးကိုပဲ သူတို့ဖြတ်လာတယ်။ လာတော့ လမ်းတွေ ပိတ်နေတာကို ရှင်းပြီးတော့ သူတို့တွေ လာတယ်။ လာပြီးတော့ ဘာမှမရှိတော့ ပြန်တယ်။ ပြန်ပြီးတော့ တစ်နာရီလောက်နေတော့ နာရီစင် မြို့လယ်ခေါင်နားမှာ မြဝတီဘဏ်ဆိုတာရှိတယ်။ ဗိုလ်ချုပ်ကြေးရုပ်ခန်းမနဲ့ မျက်နှာချင်းဆိုင်ပေါ့နော်။ အဲ့ဒီမှာ ပစ်ကြ၊ ခတ်ကြတာတွေရှိတယ်။ ဒို့ဘက်ကတော့ မပါဘူးပေါ့ကွာ၊ သေနတ်ဒင်နဲ့ ဝိုင်းထုတာ ပစ်ကြ၊ ခတ်ကြတာတွေ။ အဲ့ဒီမှာ နောက်နာရီဝက်လောက်မှာ တစ်ခေါက် ပြန်လာတယ်။ နေ့ခင်း တစ်ချက်ခွဲ နှစ်ချက်လောက်ကျတော့ သူတို့ ပြန်သွားကြတယ်။”

ရှမ်းပြည်နယ် တောင်ကြီးမှာလည်း ဆန္ဒပြသူတွေကို ရာဘာကျည် မျက်ရည်ယိုဗုံး အသံဗုံးတွေနဲ့ ပစ်ခတ် လူစုခွဲခဲ့တယ်လို့ တောင်ကြီးမြို့ ဆန္ဒပြပွဲမှာ ပါဝင်သူတစ်ဦး က ပြောပါတယ်။

“ကျနော်တို့က ကုန်းအမြင့်ကနေမှ နေရာယူတယ်။ ဒီကောင်တွေကို ကုန်းနိမ့်ဘက်ကို ပေးလိုက်တယ်ပေါ့နော်။ နောက်ပြီးတော့ လမ်းပိတ်တာတွေကလည်း တော်တော်လေး စနစ်ကျသွားတဲ့ အခါကျတော့ ဒီကောင်တွေ အခြေအနေ မကောင်းဘူး... ထင်လို့ ပြန်ဆုတ်ပေးတယ်လို့ ထင်တယ်ပေါ့နှော်။ ဒီနေ့က ကျနော်တို့ ထိပ်တိုက်သွားတွေ့တာမျိုး မဟုတ်ဘူး။ ကျနော်တို့က အထိုင်ချတယ်၊ အထိုင်ချတာကို ဒီကောင်တွေလာတယ်။ လာပြီးတော့ နည်းနည်းခြောက်တယ်ပေါ့နော်။ ရာဘာကျဉ်နည်းနည်းပစ်တယ်။ နောက်ပြီးတော့ အသံဗုံး နည်းနည်းပစ်တယ်။ နောက်ပြီးတော့ မျက်ရည်ယိုဗုံး နည်းနည်း ပစ်တယ်ပေါ့နော်။ အဲ့ဒီလိုအခြေအနေဖြစ်သွားတော့ ကျနော်တို့နဲ့ ညှိနှိုင်းတယ်။ သူတို့ဘက်က ကတိမတည်တာတွေ ကျနော်တို့ ပြောတော့ သူတို့ဘက်က ဆုတ်ပေးတယ်။ သူတို့ ဆုတ်ပေးတဲ့အတွက်ကြောင့် ကျနော်တို့ ထပ်ဆုတ်တယ်။ မျက်ရည်ယိုဗုံးလောက်ပဲ ကျနော်တို့ ဒီ ဆန္ဒပြတဲ့ ညီအကိုတွေ နည်းနည်းထိတယ်။ ကျနော်တို့က Plan B အနေနဲ့ ချမ်းမြရွှေတောင်ထဲကို လူစုလူဝေးနဲ့ ဆန္ဒပြန်ပြတယ်ပေါ့နော်။ အဓိကက ကျနော်တို့ ရည်ရွယ်ချက်က ဆန္ဒပြပွဲတွေဟာ တောင်ကြီးမှာရှိနေတယ်ဆိုတာကို ဒီကောင်တွေ ပိုပြီး နားလည်စေချင်တဲ့ သဘောပါဗျ။"

မြန်မာနိုင်ငံအနှံ့မှာ ဒီကနေ့ ဆန္ဒပြပွဲတွေက ဆက်ရှိနေသလို မနေ့က ကျဆုံးသွားကြသူတွေရဲ့ စျာပန အခမ်းအနားတွေလည်း ပြုလုပ်နေကြပါတယ်။ အရပ်သားအစိုးရကို ဖယ်ရှားပြီး စစ်တပ်က အာဏာသိမ်းလိုက်တဲ့ နောက်ပိုင်းကစလို့ ဒီကနေ့အထိ နိုင်ငံအနှံ့အာဏာရှင် ဆန့်ကျင်လှုပ်ရှားမှုတွေဟာ တဖြည်းဖြည်း အရှိန်မြင့်လာနေပါတယ်။

 အိမ့်သန္တာထွန်း/ VOA Burmese

https://burmese.voanews.com/a/myanamr-military-coup-protest/5801497.html