အကျအဆုံးများခဲ့ပေမဲ့ ရန်ကုန်ဆန္ဒပြပွဲတွေ ဆက်ဖြစ်

မတ်လ ၄ ရက်နေ့ ရန်ကုန်ဆန္ဒပြပွဲ မြင်ကွင်း။ (မတ် ၄၊ ၂၀၂၁)

စစ်အာဏာသိမ်းမှုကို ဆန့်ကျင်ကန့်ကွက်ပြီးတော့ ဒီမိုကရေစီရရှိရေး ငြိမ်းချမ်းစွာ တောင်းဆိုတဲ့ ဆန္ဒပြပွဲတွေကို စစ်တပ်နဲ့ရဲက အကြမ်းဖက် နှိမ်နင်းပေမဲ့လည်း အရှိန်လျော့မသွားဘဲ ဆက်ဖြစ်နေတုန်းပါ။ မနေ့က အကြမ်းဖက်ဖြိုခွဲမှုအတွင်း လူအများအပြား သေဆုံးခဲ့ရပြီး နောက်တနေ့ ဒီကနေ့မှာလည်း နှိမ်နင်းဖြိုခွဲတာကို အံတုပြီး ဆက်လက်ဆန္ဒပြခဲ့ကြပါတယ်။ ရန်ကုန်မြို့တဝန်း ဒီကနေ့ ဆန္ဒပြပွဲအခြေအနေတွေကို ဗွီအိုအေသတင်းထောက်မမေခက စုစည်းတင်ပြထားပါတယ်။

ဖေဖော်ဝါရီ ၁ ရက်နေ့ထဲက အာဏာသိမ်း စစ်အုပ်ချုပ်ရေးကောင်စီက အာဏာသိမ်းအပြီး စစ်ဆန့်ကျင်ဆန္ဒပြမှုတွေဟာ နေရာအနှံ့ပေါ်ထွက်လာတာ တလ ကျော်နေပြီဖြစ်ပေမဲ့ ခုအချိန်ထိ အရှိန်လျော့သွားတာ မရှိသေးပါဘူး။ မနေ့ကတော့ ရန်ကုန်မြို့တွင်း မြောက်ဥက္ကလာပမှာ စစ်အုပ်ချုပ်ရေးကောင်စီဘက်က အကြမ်းဖက်ဖြိုခွင်းတာကြောင့် ၁၀ ဦးထက် မနည်း သေဆုံးခဲ့ကြရပါတယ်။

ဒီကနေ့ နေ့လယ်လောက်က စလို့ ရန်ကုန်၊ စမ်းချောင်းမြို့နယ်အပါအဝင် မြောက်ဒဂုံ၊ အလုံနဲ့ တာမွေမှာ ငြိမ်းချမ်းစွာ ဆန္ဒပြနေသူတွေကို အကြမ်းဖက် ဖြိုခွင်းမှုတွေ ရှိနေပါတယ်။ အောက်ကြည့်မြင်တိုင်လမ်းနဲ့ အလုံလမ်း မီးပွိုင့်မှာ စစ်ကား ရှစ် စီးနဲ့ အချုပ်ကားတွေ ရှိနေပြီး အသံဗုံး သုံး ချက်ထက်မနည်း ဖောက်တာ၊ မျက်ရည်ယိုဗုံး ပစ်သွင်းတာတွေနဲ့ လူစုခွဲခံရတာရှိပါတယ်။ ဆန္ဒပြလူထုကို မီးခိုးဗုံးတွေနဲ့ အသံဗုံးတွေနဲ့ ပစ်ခတ်ဖြိုခွင်းတာမှာ ငုဝါလမ်းအထိ ဝင်ရောက်ဖြိုခွဲတာတွေလည်း ရှိခဲ့တယ်လို့ ဒေသခံတွေက ဆိုပါတယ်။ အဲဒီနားတစ်ဝိုက်ဟာ ဆန္ဒပြသူ ခန့်မှန်းခြေ ရာချီ စုဝေးခဲ့ကြတဲ့နေရာဖြစ်ပြီး အဲဒီ လူစုလူဝေးဆန္ဒပြချိန်မှာ အခုလိုဖြိုခွင်းခဲ့တာ ဖြစ်ပါတယ်။

ဖြိုခွင်းမှုတွေ ရှိခဲ့ပေမဲ့ ပြင်းထန်ထိခိုက်တာမျိုးတွေ မရှိခဲ့ပါဘူး။ ဘယ်လိုအခြေအနေပဲ ကြုံကြုံ အာဏာရှင်မကျဆုံးသ၍ ငြိမ်းချမ်းစွာဆန္ဒဖော်ထုတ်ဖို့ ရည်ရွယ်ထားတယ်လို့ ဆန္ဒဖော်ထုတ်နေတဲ့ လူငယ်တဦးက ဗွီအိုအေကိုပြောပါတယ်။

"ကျနော်တို့နဲ့ ရွယ်တူတွေရော၊ ကျနော်တို့ထက် အများကြီးငယ်တဲ့သူတွေရော၊ ၂ နှစ်၊ ၃ နှစ်လောက်ငယ်တဲ့သူတွေရော၊ အခုမှ ၁၈ နှစ်ပြည့်ပြီးခါစ၊ ကျော်တဲ့သူတွေ အဲ့ဒီလိုလူတွေ သေသွားတယ်ဆိုပေမဲ့ ကျနော်တို့ မကြောက်ဘူးဗျ။ ကျနော်တို့ စိတ်ထဲမှာ ပိုခံပြင်းတယ်။ ဘာမှလည်း မလုပ်နိုင်ဘူး။ သူတို့လည်း လက်နက်မရှိဘူး။ ကျနော်တို့က ပြန်လုပ်ရင်လည်း နိုင်ငံတကာက ကျနော်တို့က အကြမ်းပြန်ဖက်လို့ပါ.... ချုပ်ကိုင်တာ ခံရမယ်ဗျာ။ ခုချိန်က ကျနော်တို့ဘက်ကပဲ အရှုံးဖြစ်နေဦးမှာပဲ။ သူတို့ဘက်က ကျနော်တို့ကိုသေနတ်နဲ့တိုက်တဲ့အတွက် ကျနော်တို့ဘက်က စိတ်ဓါတ်နဲ့ တိုက်ရမှာပဲလေ။ အဲဒီတော့ကျနော်တင်မဟုတ်ဘူး... တခြားလူငယ်တွေအကုန်လုံး မကြောက်ပါဘူး။ ကျဆုံးသွားသူတွေကို အလကားမဖြစ်စေချင်ဘူး။ သူတို့ မြင်သည်ဖြစ်စေ၊ မမြင်သည်ဖြစ်စေ ကျနော်တို့ကတော့ဆက်ပြီးတိုက်သွားမယ်။ ကျနော်တို့ လမ်းပိုထွက်တယ်။ မကြောက်ဘူး။"

နောက်ထပ်လူစုခွဲခံရတဲ့ နေရာကတော့ မြောက်ဒဂုံဘက်ပါ။ ကြွေးကြော်သံတွေနဲ့ ငြိမ်းချမ်းစွာ ဆန္ဒပြနေသူတွေဟာ ၃၅ ရပ်ကွက်၊ ၃၄ ရပ်ကွက်၊ အသင်းဝင်နဲ့ ကျောင်းလမ်းတဝိုက်မှာ စုရုံး ဆန္ဒဖော်ထုတ်နေတာပါ။ အာဏာပိုင် လက်နက်ကိုင်တွေက အဲဒီနေရာအနီးတဝိုက်ကို နေ့လယ်ပိုင်းလောက်က မျက်ရည်ယိုဗုံး၊ အသံဗုံးတွေနဲ့ ပြည်သူတွေ ကာရံထားတာကိုလည်း ဖျက်ဆီးရှင်းလင်းတာတွေ လုပ်ခဲ့ပါတယ်။ အဲဒီလိုလုပ်ခဲ့တဲ့အပြင် ရပ်ကွက်လမ်းတွေထဲထိ ဝင်ပြီး ဝင်ရောက်ရှာဖွေတာတွေလုပ်တယ်လို့ အဲဒီနေရာမှာ ကိုယ်တိုင်တွေ့သူတဦးကပြောပါတယ်။

"ကျနော်တို့ကို ဘယ်လောက်ပဲ အကြောက်တရားတွေ ရိုက်သွင်းသွင်း၊ ဘယ်လိုပဲ လုပ်လုပ် ကျနော်တို့နိုင်ငံအတွက် ကျနော်တို့လုပ်သင့်လုပ်ထိုက်တာတွေ ဆက်လုပ်သွားမှာပဲ။ ထပ်ပြီးတော့ လမ်းထွက်သွားမယ်၊ ထပ်ပြီးတော့ ကျနော်တို့ ငြိမ်းချမ်းစွာဆန္ဒပြနေမှာပဲ။ ဒါကိုမှာ သူတို့ အကြမ်းဖက် ဖြိုခွင်းချင်တော့လည်း မတတ်နိုင်ဘူး။ ကျနော်တို့ အရေးတော်ပုံအောင်တဲ့အထိ ဆက်လက်တိုက်ပွဲဝင်သွားမှာပါ။"

မြောက်ဥက္ကလာဘက်မှာတော့ မနေ့က သွေးမြေခခဲ့ရပေမဲ့ ဒီကနေ့မှာလည်း အင်အားလျော့သွားတာမရှိဘဲ ဆက်လက်ဆန္ဒဖော်ထုတ်နေဆဲဖြစ်တယ်လို့ သပိတ်စစ်ကြောင်းထဲပါဝင်နေသူတွေကပြောပါတယ်။ ပြည်သူတွေဘက်က ကာကွယ်ထားတဲ့ အကာအရံကိုလည်း အာဏာပိုင်တွေဘက်က ဘူထိုစာတွေ သုံးကာ ဖျက်ဆီးသွားတယ်လို့ အဲဒီမှာ ရှိနေတဲ့ ဒေသခံတွေကပြောပါတယ်။

စမ်းချောင်းမြို့နယ်ထဲမှာလည်း သပိတ်ကို ဖြိုခွဲတာတွေ ရှိသလို အာဏာရှင်ဆန့်ကျင်ရေးကိုပုံစံမျိုးစုံသုံး ဖော်ထုတ်တာတွေရှိပါတယ်။ ထမိန်တန်းဆင်ကာ လမ်းထဲကို အာဏာပိုင်တွေ မဝင်နိုင်အောင်တားဆီးတာတွေ လုပ်တာမျိူးတွေ ရှိခဲ့တယ်လို့ အဲဒီနေရာကိုရောက်နေတဲ့ ဗွီအိုအေသတင်းထောက်အဂ္ဂနွန်က ပြောပါတယ်။

"ဒီနေ့စမ်းချောင်းရဲ့ အခြေအနေက ဒီမနက်ပိုင်း ကျွန်းတောလမ်းဘက်မှာ ဖြိုခွင်းလိုက်တယ်ကြားတယ်။ ဒီနေ့က စစ်တပ်က ပိုများတယ်လို့ ကြားတယ်။ အသံဗုံး၊ မျက်ရည်ယိုဗုံးတွေ ပစ်ခတ်ဖြိုခွဲတယ်။ ကျွန်းတောလမ်းပေါ်တလျှောက်မှာ ဒီဆန္ဒပြတဲ့လူတွေရှိတယ်။ တိုင်းရင်းသားတော်တော်များများလည်း ပါတယ်။ နောက်ပြီးတော့ သူတို့ ခံတပ်တွေ အဆင့်ဆင့်ခံထားတာတွေ့ရတယ်။ ရဲတွေ၊ စစ်သားတွေ အလွယ်တကူ မဝင်ရောက်နိုင်အောင် ကာကွယ်ထားတာတွေ့ရတယ်။ ထမိန်တန်းတွေ လှမ်းတာတွေလည်း တွေ့ရတယ်။ စစ်တပ်တွေက ဖြိုခွဲဖို့ အသင့်စောင့်ဆိုင်းတာတွေလည်း တွေ့ရတယ်။"

စမ်းချောင်းမြို့နယ် ပဒုမ္မာလမ်း၊ ကျွန်းတောလမ်း၊ ဗဟိုလမ်းတစ်ဝိုက်မှာလည်း စစ်အုပ်ချုပ်ရေးအာဏာပိုင်တွေက မျက်ရည်ဗုံး အသံဗုံးနဲ့ လောက်လေးခွတွေသုံးပြီး ဆန္ဒပြလူအုပ်စုကို အကြမ်းဖက် ပစ်ခတ်ဖြိုခွဲမှုတွေလုပ်ခဲ့ပါတယ်။

တာမွေ ဗညားဒလလမ်းတလျှောက် ဩဘာလမ်း၊ သီတာလမ်း၊ ၁၄၆ လမ်း၊ ၁၄၅ လမ်းဘက်မှာပါ မျက်ရည်ဗုံးများ ပစ်ခွဲတာတွေအပြင် အိမ်တွေပေါ်အထိ ပစ်ခတ်တာတွေ ရှိခဲ့ပါတယ်။ အဲဒီနေရာတွေ အကုန်လုံးကို စစ်နဲ့ ရဲအင်အား ၃၀၀ နီးပါးလောက်က ဝင်ရောက်ခဲ့တယ်လို့ မြို့ခံတွေကပြောပါတယ်။ ထိခိုက်မှုအခြေအနေတော့ မသိရသေးပါဘူး။

ရန်ကုန်မြို့ နေရာအနှံ့မှာ ဆန္ဒပြသူတွေကို စစ်တပ်နဲ့ ရဲတပ်ဖွဲ့က အကြမ်းဖက်ပစ်ခတ် နှိမ်နင်းလို့ သွေးမြေကျတဲ့ အထိဖြစ်ခဲ့ရပေမဲ့ ဒီကနေ့မှာ နေရာတော်တော်များများမှာ လူငယ်တွေဟာ ဆန္ဒဖော်ထုတ်နေတာတွေ ရှိနေဆဲဖြစ်ပါတယ်။

ေမခ/ VOA Burmese

https://burmese.voanews.com/a/yangon-myanmar-military-coup-protest/5801427.html