မြောက်ဥက္ကလာနဲ့ တာမွေအခြေအနေ ဆရာဝန်တဦးနဲ့ မေးမြန်းချက်

မြောက်ဥက္ကလာဆန္ဒပြပွဲမြင်ကွင်း။ (မတ် ၃၊ ၂၀၂၁)

သေဆုံး ထိခိုက်ဒဏ်ရာရသူတွေ အများအပြားရှိနေတဲ့ မြောက်ဥက္ကလာပဆေးရုံကြီးက အရေးပေါ်အခြေအနေမှာ ဆရာဝန်၊ ကျန်းမာရေးဝန်ထမ်း အင်အားအရေးတကြီး လိုအပ်နေပေမဲ့ လုံခြုံရေးတပ်တွေဘက်က လမ်းပိတ်ဆို့ထားတဲ့အတွက် ကူညီကယ်ဆယ်ပေးဖို့ သွားနေတဲ့ဆရာဝန်တွေ အခက်ကြံုနေရတယ်လို့ ကိုယ်တိုင်သွားရောက်ကူညီကယ်ဆယ်ပေးဖို့ကြိုးစားနေတဲ့ ဆရာဝန်တဦးကပြောပါတယ်။ မြောက်ဥက္ကလာပ ပစ်ခတ်မှုတွေအတွင်း ပွဲချင်းပြီးသေဆုံးသူအရေအတွက် အရေးပေါ် ထိခိုက်ဒဏ်ရာရနေကြတဲ့ နောက်ဆုံးအခြေအနေကို ဗွီအိုအေမြန်မာပိုင်းသတင်းထောက် မဆုမွန် ဆက်သွယ်မေးမြန်းချိန် ဒေါက်တာကျော်မင်းထွန်းပြောပြပါတယ်။

မြောက်ဥက္ကလာဆန္ဒပြမှု မြင်ကွင်း။ (မတ် ၃၊ ၂၀၂၁)

ဒေါက်တာကျော်မင်းထွန်း။ ။ အခုမြောက်ဥက္ကလာဘက်ကို ကျနော်တို့သွားမယ့်အချိန်မှာ ဝင်လို့မရလိုက်ဘူး။ သူတို့ အားလုံးပိတ်လိုက်ပြီ။ Ambulance တွေ ထွက်တဲ့အချိန်မှာ သူတို့က လုံးဝပိတ်ချလိုက်တယ်။ အဝိုင်းကို ပိတ်လိုက်တယ်ဆိုတော့ ကျနော်တို့ဘယ်မှ သွားလို့မရတော့ဘူး။ ခေမာသီဘက်ရော၊ သုဓမ္မာဘက်ရော၊ မြောက်ဒဂုံဘက်ရော ဘယ်မှသွားလို့မရတော့ဘူး။ အဝိုင်းကို center ယူပြီးပိတ်လိုက်တယ်။ အနေအထားက မြောက်ဥက္ကလာဘက်ကို သွားကယ်လို့မရ၊ ကူလို့မရတဲ့အနေအထားဖြစ်သွားတယ်။

မဆုမွန်။ ။ ဆရာသိထားသလောက်လေးလည်း အခြေအနေလေး နည်းနည်းပြောပြပေးပါ။ မြောက်ဥက္ကလာအခြေအနေ ဆရာတို့ နောက်ဆုံးသိထားသလောက်ပေါ့။ ဆရာတို့ ကိုယ်တိုင်လည်း သွားဖို့ ကြိုးစားနေတယ်ဆိုတော့ ဘယ်လောက်ထိ စိုးရိမ်စရာအနေအထားရှိပါသလဲဆရာ။

ဒေါက်တာကျော်မင်းထွန်း။ ။ အနေအထားကတော့ ဖြစ်ဖြစ်ချင်း on the spot မှာ သုံးယောက်လောက် ဆုံးသွားတဲ့အထိဖြစ်တယ်လို့ ကြားတယ်ပေါ့နော်။ ဒဏ်ရာရတဲ့သူတွေကလည်း များတယ်ပေါ့နော်။ ဒဏ်ရာကလည်း တော်တော်ရကြတယ်။ ပြီးတော့ ဆေးရုံမှာ ရောက်ပြီးတော့ သေတဲ့လူနာတွေလည်း ရှိတယ်။ ဆုံးတဲ့လူနာတွေက အားလုံး total ၇ နာရီ ၅ မိနစ်ရဲ့ report အရ သေဆုံးတဲ့သူအားလုံးပေါင်း... ဆေးရုံရောက်ပြီး သေတာတွေရော၊ လမ်းမှာ ဆုံးတာတွေရော ၁၅ ယောက် အကြမ်းဖျင်းရှိတယ်။ ပြင်းထန်ဒဏ်ရာတွေကတော့ ၅၀ အပေါ်မှာ ရှိတယ်။ ပြင်းထန်ဒဏ်ရာမှာ ဆိုရင် ကျည်ရှိတာတွေရော၊ ချော်လဲရင်းနဲ့ ပြုတ်ကျတာတွေရော၊ ရိုက်ခံရတာတွေရော... အစုံပေါ့နော်။ အယောက် ၅၀ ကျော်တယ်။

မဆုမွန်။ ။ ဆရာတို့ နောက်ဆုံးသိထားသလောက်ဆိုရင် မြောက်ဥက္ကလာပ ဆေးရုံမှာ ဆရာဝန်တွေနဲ့ ဒီဆေးဝန်ထမ်းတွေပေါ့နော်... ကူညီကယ်ဆယ်ပေးနေသူတွေ အနေအထားပေါ့နော်... သူတို့ဘယ်များ အခက်အခဲရှိကြလဲ။ ဆရာတို့လည်း သွားဖို့လည်း ကြိုးစားနေကြတဲ့သူတွေဆိုတော့လေ။

ဒေါက်တာကျော်မင်းထွန်း။ ။ အခု အခက်အခဲကတော့ လူအင်အားပေါ့နော်။ ဆေးရုံကတော့ ပိတ်ထားတယ်။ ဒီ emergency ချက်ချင်းဖြစ်တဲ့အပေါ်မှာ ချက်ချင်းဖွင့်ပြီး ချက်ချက်ကုတယ်။ ရုတ်တရက်ကြီးဆိုတော့ လူအင်အားလိုတယ်။ လိုအပ်မှုရှိသွားတာပေါ့နော်။ volunteer ဆရာဝန်တွေကလည်း ချိတ်ပြီးတော့ ကူညီပေးတယ်။ အဓိကကတော့ ဆရာဝန်အင်အားလေး လိုအပ်ချက်ရှိတယ်။ ဖြစ်ဖြစ်ချင်းမှာတော့ ဝုန်းဒိုင်းကြဲတဲ့အချိန်မှာတော့ တော်တော်အခက်ဖြစ်သွားတယ်။ လူအင်အားလိုအပ်ချက်ပုံစံမျိုးဖြစ်သွားတယ်ပေါ့နော်။

မဆုမွန်။ ။ ဆရာဒါကတော့ မြောက်ဥက္ကလာအခြေအနေပေါ့နော်။ ခုဏက ပြောခဲ့တဲ့ တာမွေဘက်က နောက်ဆုံးအခြေအနေလည်း ပြောပြပေးပါ။ ဆရာတို့လည်း ကိုယ်တိုင် ကုသပေးနေတာဆိုတော့လေ။

ဒေါက်တာကျော်မင်းထွန်း။ ။ တာမွေဘက်မှာတော့ ကျနော်တို့က အဓိက တာမွေ၊ ကျောက်မြောင်းဘက်အခြမ်းမှာတော့ နည်းနည်းကြမ်းသွားတယ်။ ဒဏ်ရာရတဲ့သူတွေလည်း တော်တော်ကြီးများတယ်။ သေဆုံးတော့မရှိဘူး။ အဲဒီမှာကျတော့ အဓိက ရာဘာကျည်ဆံ ထိတဲ့သူများတယ်။ ပြီးတော့ ရိုက်ခံရတဲ့ လူနာ များတယ်။ ပြီးတော့ ချော်လဲရင်နဲ့ ထိခိုက်ဒဏ်ရာရတဲ့သူများတယ်။ ကျနော်တို့က ဒီ on ground မှာတော့ လုပ်သင့်လုပ်ထိုက်တာ မြန်မြန်လုပ်ပြီးတော့ ပြန်ခိုင်းလိုက်တယ်ပေါ့နော်။ အကြမ်းဖျင်းစာရင်းက ကျနော်တို့ဆီရောက်လာတဲ့ data အရတော့ ၁၅ ယောက်ဝန်းကျင်ရှိတယ်။ မြေပြင်အခြေအနေမှာလုပ်ပြီး ပြန်တဲ့လူနာကတော့ ၂၀ ကျော်လောက်ရှိတယ်။ ဖမ်းခံရတဲ့ ပြည်သူလူထုတွေကတော့ အယောက် ၄၀၀ ကျော်လောက်ရှိတယ်။ ဝရုဏ်းသုန်းကား ဖြစ်တဲ့အချိန်မှာတော့ ကိုယ်တွေလည်း ထိမှာတို့၊ ပါသွားမှာတို့လို ပုံစံမျိုးအနေအထားရှိတော့ အားလုံးငြိမ်တယ်၊ အခြေအနေကောင်းတယ်ဆိုတော့မှပဲ ဝင်လို့ရတဲ့အနေအထားရှိတယ်ပေါ့နော်။

မဆုမွန်။ ။ ဟုတ်ကဲ့ဆရာ၊ ဆရာခုဏကပြောတဲ့ လူမှုကယ်ဆယ်ရေးအသင်းတွေရော၊ ဒီဆေးဝန်ထမ်းတွေရော၊ ပရဟိတ ဆရာဝန်တွေရော... အားလုံးက ဝိုင်းပြီးတော့ ကူပေးနေကြတယ်။ ဒါပေမဲ့ ဒီကနေ့ မြောက်ဥက္ကလာဖြစ်စဉ်မှာဆိုရင် လူမှုကယ်ဆယ်ရေးလုပ်ပေးနေတဲ့ ဝန်ထမ်းတွေပေါ့နော်... ပရဟိတဝန်ထမ်းတွေကိုလည်း လုံခြုံရေးတွေဘက်ကနေ ဖမ်းတာ၊ ဆီးတာ၊ ရိုက်နှက်တာလည်း ရှိနေတော့ အခုလို ဆေးကုသဖို့ အရေးပေါ်လိုအပ်နေတဲ့ အခြေအနေမှာ ကိုယ်တိုင်လည်း ကုပေးနေတဲ့ ဆရာဝန်တယောက်အနေနဲ့ ဘာများ ပြောချင်တာရှိပါသလဲရှင့်။

ဒေါက်တာကျော်မင်းထွန်း။ ။ ကျနော်တို့ အခုက ပြည်သူလူထုအတွက်ကို အဓိက ဘာပဲဖြစ်ဖြစ်ပေါ့နော်... ရဲဖြစ်ဖြစ်၊ စစ်သားဖြစ်ဖြစ်၊ ပြည်သူလူထုဖြစ်ဖြစ် ထိခိုက်ဒဏ်ရာရတဲ့ ဘယ်သူမဆို ကုသပေးရမှာ ကျနော်တို့ တာဝန်ပေါ့နော်။ ဘယ်သူဒဏ်ရာရသလဲ။ ဒဏ်ရာရတဲ့သူ ကျနော်တို့က ကုမှာပဲ။ ကုမယ်ဆိုတော့ အတတ်နိုင်ဆုံးပေါ့နော်... ကျနော်တို့ rescue team တွေပေါ့နော်... ambulance service ရှိမယ်၊ ဆရာဝန်တွေရှိမယ်၊ သူနာပြုတွေရှိမယ်၊ volunteer တွေရှိမယ်၊ ကြက်ခြေနီတွေရှိမယ်။ အဲဒီအဖွဲ့အစည်းတွေကို ဖြစ်နိုင်ရင်တော့ ethic အရပေါ့နော်... ကာကွယ်သင့်တယ်လို့ ကျနော်အကြံပြုချင်တယ်။ ရန်ရှာမှာလည်း မဟုတ်ဘူး၊ ရန်ပြုမှာလည်း မဟုတ်ဘူး။ ဖြစ်နိုင်ရင်တော့ အတတ်နိုင်ဆုံး cover လုပ်ပေးစေချင်တယ်ပေါ့နော်... အဲဒါလေး အကြံပြုချင်ပါတယ်။

 မဆုမွန်/ VOA Burmese

https://burmese.voanews.com/a/northokkalapa-tarmwe/5800082.html