သျှမ်းသံတော်ဆင့်၊ မတ် ၁၅ရက်
သျှမ်းပြည်မြောက်ပိုင်း လားရှိုးမြို့တွင် ယနေ့ (မတ် ၁၅)ရက် ည ၈နာရီကျော်တွင် သံပုံးတီး သည်ဟုဆိုကာ လက်ပစ်ဗုံးဖြင့် လာရောက်ပစ်သွားကြောင်း သတင်းရရှိသည်။
စစ်အာဏာသိမ်းပြီးနောက် မြန်မာပြည်တဝှမ်းလုံး ပြည်သူများသည် ည(၈)နာရီရောက်တိုင်း စစ်အာဏာရှင်ကို အလိုမရှိသည့် အနေဖြင့် သံပုံးတီး ဆန္ဒပြမှုကို ပြုလုပ်ကြသည်။
ထို့ကြောင့် ယနေ့ ည (၈)နာရီတွင်လည်း သံပုံတီးမှုကြောင့် လားရှိုးမြို့ ရပ်ကွက် (၁၀) ကျောက်စိမ်းလမ်းထဲ သံပုံးတီးသည့် အိမ်ဘေး “ ပလောင်တောင်တန်း ”ကားဂိတ်ကို လက်ပစ်ဗုံးဖြင့် ပစ်ခတ်ကာ အမိုးအနည်းငယ်ပျက်စီးသွားကြောင်း သိရသည်။
“ ည (၈)နာရီ သံပုံးတီးတဲ့အချိန်မှာ ကားတစီး နဲ့ ရောက်လာပြီး ဗုံးပစ်လိုက်တာပဲ။ အသံတော်တော်မြည်သွားတယ်။ အသံ တအုန်းအုန်းပဲ။ မီးပွင့်တာမြင်ရတယ်။ အသံ က ၄ချက်လောက် ကြားရတယ်” ဟု ထိုရပ်ကွက်တွင်နေထိုင်သည့် သူ တဦးက သျှမ်းသံတော်ဆင့်ကို ပြောသည်။
လက်ပစ်ဗုံးလာရောက်ပစ်သူသည် စစ်ဝတ်စုံ အပြည့်ဝတ်ဆင်လာသည့် သူများဖြစ်ကြောင်း၊ မည်သူ အဖွဲ့အစည်း လာရောက်ပစ်သည်ကို သေချာမသိရှိကြောင်းလည်း ၎င်းက ပြောပြသည်။
“ ဒါက သံပုံးတီးတဲ့သူတွေ နောက်မတီးအောင် ခြိမ်းခြောက်လိုက်တဲ့သဘောပဲ။ ညဆိုရင်လည်း ရဲကားတွေက နေရာတိုင်း လိုက်ပတ်နေတာ။ ပြည်သူတွေကို လိုက်ခြောက်နေတာပဲ” ဟု လားရှိုး ရက်ကွက် (၁၂)ဒေသခံ အမျိုးသမီး တဦး ကပြောသည်။
SHAN News (Burmese Version)
Reviewed by THITHTOOLWIN
on
06:48
Rating:
No comments:
Post a Comment