ဒေါ်အောင်ဆန်းစုကြည်ကို ဗုဒ္ဓဟူးနေ့ ရုံးထုတ်မည်

မှတ်တမ်းဓါတ်ပုံ ၂၀၁၉ ဇွန်လက ပြုလုပ်တဲ့ အာဆီယံထိပ်သီးဆွေးနွေးပွဲအတွင်း နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို တွေ့ရစဉ်

အာဏာသိမ်း စစ်တပ်က ဖမ်းထားတဲ့ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို ဒီကနေ့ မတ်လ ၂၄ ရက်နေ့ ဗုဒ္ဓဟူးနေ့မှာ တရားရုံး ကြားနာဖို့ ရက်ချိန်းရှိပါတယ်။ ဒေါ်အောင်ဆန်းစုကြည်ကို ပြစ်မှုဆိုင်ရာ ပုဒ်မ ၄ ခုနဲ့ စွဲဆိုထားပြီး နောက်ထပ် ပြစ်မှုဆိုင်ရာ စွဲချက်တွေ ထပ်ပြီး တင်ဖို့ အလားအလာ ရှိကြောင်း ဒေါ်အောင်ဆန်းစုကြည်ရဲ့ ရှေ့နေ ဦးခင်မောင်ဇော်က ဗွီအိုအေကို ပြောပါတယ်။

ခွင့်ပြုချက် မရှိဘဲ Walkie-Talkies တွေ အသုံးပြုမှု၊ COVID 19 ကန့်သတ်တားမြစ်ချက် ချိုးဖောက်မှု၊ ဆက်သွယ်ရေး ဥပဒေ ချိုးဖောက်မှု၊ လူထု ဆူပူအုံကြွအောင် လှုံ့ဆော်မှု စွဲချက်တွေ တင်ထားပြီး ဒီစွဲချက် တခုစီက ထောင်ဒဏ် ၃ နှစ်ထိ ချခံရနိုင်တဲ့ စွဲချက်တွေ ဖြစ်တယ်လို့လည်း ဒေါ်အောင်ဆန်းစုကြည်နဲ့ တွေ့ခွင့် မရသေးတဲ့ သူမရဲ့ ရှေ့နေ ဦးခင်မောင်ဇော်က ပြောပါတယ်။

ဒေါ်အောင်ဆန်းစုကြည်ကို ဗွီဒီယို ကွန်ဖရင့်စ်နဲ့ ဗုဒ္ဓဟူးနေ့မှာ တရားရုံး ထုတ်ဖို့ တရက် အလို အင်္ဂါနေ့မှာတော့ အာဏာသိမ်း စစ်တပ်ရဲ့ အုပ်ချုပ်ရေး ကောင်စီက နေပြည်တော်မှာ သတင်းစာ ရှင်းလင်းပွဲ လုပ်ခဲ့ပြီး ရန်ကုန်တိုင်း ဝန်ကြီးချုပ် ဦးဖြိုးမင်းသိန်းရဲ့ ပြောဆိုချက်ဆိုတဲ့ ဗွီဒီယိုကို ဖွင့်ပြခဲ့ပါတယ်။

“အဝတ်အထည် အစားအသောက်ထည့်တဲ့ အိတ်တွေထဲမှာ ထည့်ထားတဲ့ အမေရိကန်ဒေါ်လာ ၁ ထုတ်လျင် အရွက် ၁၀၀ ပါတဲ့ ရာတန် အထုတ် ၂၀ ဒေါ်လာ ၂ သိန်းနဲ့ အကယ်ဒမီရွှေ ၁၀ ကျပ်သားအတုံး၊ အပိုင်း ၂၅ ပိုင်း စုစုပေါင်း ၂ ပိသာခွဲကို ကျနော် တဦးတည်း ယူဆောင်၍ ဒေါ်အောင်ဆန်းစုကြည် နေအိမ်ထဲကို ဝင်ပြီးတော့ ဒေါ်အောင်ဆန်းစုကြည် ကိုယ်ရေးကိုယ်တာအတွက်ပဲ သုံးသုံး၊ ပါတီ အောင်နိုင်ရေးအတွက်ပဲ သုံးသုံး ၊ ဒေါ်ခင်ကြည်ဖောင်ဒေးရှင်းအတွက်ပဲ သုံးသုံး လိုတဲ့နေရာမှာ သုံးပါလို့ပြောပြီး ကျနော်ကိုယ်တိုင် ဒေါ်အောင်ဆန်းစုကြည် လက်ထဲကို ထည့်ပေးခဲ့တာ ဖြစ်ပါတယ်။”

ဦးဖြိုးမင်းသိန်းရဲ့ အခု ဗွီဒီယိုဖိုင်ကို ဖွင့်ပြမယ်လို့ မတ်လ ၁၁ ရက် သတင်းစာ ရှင်းလင်းပွဲမှာ အာဏာသိမ်း စစ်တပ်ရဲ့ အုပ်ချုပ်ရေး အဖွဲ့ ပြောခွင့်ရ ဦးဇော်မင်းထွန်းက ကြိုပြီး ပြောခဲ့တာပါ။

ဒီမတိုင်ခင်ကလည်း လုပ်ငန်းရှင် တဦး ဖြစ်တဲ့ ဦးမောင်ဝိတ်က ဒေါ်အောင်ဆန်းစုကြည်ကို ကိုယ်တိုင် ငွေကြေး ပေးခဲ့တယ်လို့ ပြောဆိုထားတဲ့ ဗွီဒီယိုဖိုင်ကိုလည်း စစ်တပ်ရဲ့ အုပ်ချုပ်ရေး အဖွဲ့က ထုတ်ခဲ့ပါတယ်။ ဒီဖြောင့်ချက်ပေး ပြောဆိုချက်တွေကို အာဏာသိမ်း အဖွဲ့က ဘယ်လို ပုံစံ ရယူခဲ့သလဲ ဆိုတာ မသိရသလို ဦးဖြိုးမင်းသိန်းရဲ့ ပြောဆိုချက် ဆိုတဲ့ ဗွီဒီယိုဖိုင်ရဲ့ အရည်အသွေးကို ထောက်ပြပြီး အတုအယောင် ဖြစ်တယ်ဆိုတဲ့ ပြောဆိုချက်တွေလည်း ရှိနေပါတယ်။

ဒါ့အပြင် ဒေါ်အောင်ဆန်းစုကြည်နဲ့ ဘီလျံနာ သူဌေး George Soros တွေ့ဆုံခဲ့တဲ့ ဓာတ်ပုံနဲ့ နိုင်ငံပိုင် သတင်းစာတွေမှာ ဖော်ပြပြီး George Soros ရဲ့ Open Society Foundations ရဲ့ မြန်မာ အဖွဲ့က ဝန်ထမ်း တဦးကို စစ်ဆေးချက် အရ တရားမဝင် ငွေကြေး လွှဲပြောင်းမှုတွေ ရှိတယ်လို့ ဖော်ပြထားတာပါ။ ဖမ်းထားတဲ့ ဒေါ်အောင်ဆန်းစုကြည်ကိုတော့ ရှေ့နေနဲ့ တွေ့ခွင့် မပေးသေးသလို မတ်လ ၁ ရက်နေ့က ဗွီဒီယို ကွန်းဖရင့်နဲ့ တရားရုံး ကြားနာမှုမှာလည်း တရားသူကြီးနဲ့သာ တွေ့ဆုံခွင့် စကားပြောခွင့် ပေးခဲ့ပါတယ်။ 

ဗွီအိုအေ (မြန်မာပိုင်း)

https://burmese.voanews.com/a/myanmar-aung-san-suu-kyi-trial-on-wednesday-/5825894.html