မြန်မာစစ်တပ်နဲ့ ပူးပေါင်းဆောင်ရွက်မှု သြစတြေးလျ ဆိုင်းငံ့

သြစတြေးလျနိုင်ငံ ဆန်ဒနီမြို့က မြန်မာစစ်အာဏာသိမ်းမှု ဆန့်ကျင်ဆန္ဒပြပွဲ ( March 6 2021)

မြန်မာနိုင်ငံမှာ စစ်တပ်ကအာဏာသိမ်းပြီး ဆန္ဒပြပြည်သူကို အကြမ်းဖက်ချေမှုန်းမှုတွေ တိုးလုပ်လာနေတာကို တုန့်ပြန်တဲ့အနေနဲ့ မြန်မာအစိုးရနဲ့ စစ်ရေးပူးပေါင်းဆောင်ရွက်မှုတွေကို Australia က ဆိုင်းငံ့ထားလိုက်ပြီး မြန်မာအစိုးရ အတွက် ပေးအပ်နေတဲ့ ကူညီထောက်ပံ့မှုတွေကို အစိုးရမဟုတ်တဲ့ NGO အဖွဲ့တွေကို ပြောင်းလဲပေးအပ်မှာ ဖြစ်ကြောင်း Australia နိုင်ငံခြားရေးဝန်ကြီး Marise Payne က တနင်္ဂနွေနေ့မှာ ပြောကြားလိုက်ပါတယ်။

ဖေဖေါ်ဝါရီလ တရက်မှာ စစ်တပ်ကအာဏာသိမ်းပြီး ဒေါ်အောင်ဆန်းစုကြည် ဦးဆောင်တဲ့ အရပ်သား အစိုးကိုဖြုတ်ချခဲ့ချိန်ကစပြီး ဆန္ဒပြပြည်သူတွေကို သွေးမြေကျဖြိုခွင်းနေတာကို Australia အစိုးရက အထူးစိတ်ပူကြောင်းနဲ့ နိုင်ငံတကာရပိုင်ခွင့် ဖြစ်တဲ့ ငြိမ်းချမ်းစွာ စုဝေးခွင့် ဆန္ဒပြခွင့်တွေကိုပါ ချိုးဖေါက်နေတာအတွက် ပြင်းပြင်းထန်ထန် ရှုတ်ချလိုက်ပြီး ရဲတွေ အနေနဲ့ ဆန္ဒပြပြည်သူတွေ အပေါ်အကြမ်းမဖက်ဖို့ တိုက်တွန်းလိုက်ပါတယ်။

ဒါ့အပြင် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ စီးပွါးရေးအကြံပေး ဖြစ်တဲ့ အခု ရန်ကုန်မှာ အဖမ်းခံနေတဲ့ Australia ပါမောက္ခ Sean Turnell ကို သံရုံးကောင်စစ်ဝန်တွေ့ခွင့် ကန့်သတ်မှုချထားတာ အတွက် စိတ်ပူကြောင်းလည်းပြောပါတယ်။ ပါမောက္ခ Turnell ကိုရော အဖမ်းခံနေရတဲ့ ဒေါ်အောင်ဆန်းစုကြည်၊ သမ္မတဦးဝင်းမြင့်နဲ့ တခြားဥပဒေမဲ့ ဖမ်းထားသူတွေကို. အမြန်ပြန်လွှတ်ပေးဖို့ လည်း တောင်းဆိုပါတယ်။

Australia အစိုးရအနေနဲ့ မြန်မာ့အရေးမူဝါဒ ချမှတ်ဖို့ အထူးသဖြင့် အာဆီယံရဲ့ အိမ်နီးချင်းတွေ ဖြစ်တဲ့ ဂျပန်နဲ့ အိန္ဒိယ အပါအဝင် နိုင်ငံတကာမိတ်ဆွေတွေနဲ့ ကျယ်ပြန့်တဲ့ ဆွေးနွေးညှိနှိုင်းမှုတွေ လုပ်ဆောင်နေကြောင်းလည်း ပြောပါတယ်။

 ဗွီအိုအေ (မြန်မာပိုင်း)

https://burmese.voanews.com/a/australia-takes-action-over-myanmar-coup/5805641.html