နိုင်ငံခြားရေးဝန်ကြီးဌာန အရာရှိတချို့ဖမ်းဆီးခံရ

နိုင်ငံခြားရေးဝန်ကြီးဌာန။ (ဓာတ်ပုံ - Ministry of Foreign Affairs Myanmar)

နေပြည်တော်က နိုင်ငံခြားရေးဝန်ကြီးဌာန အရာရှိတချို့ကို အရပ်ဝတ်တွေ ဒီကနေ့ လာရောက်ဖမ်းဆီးတာ ရှိခဲ့တယ်လို့ ကနဦးသတင်းရထားတာပါ။

ဒီကနေ့မနက်ပိုင်းမှာတော့ နိုင်ငံခြားရေးဝန်ကြီးဌာန ဒုညွှန်မှူး ဦးချမ်းအေးကို အရပ်ဝတ်လူ ၆ ယောက်က နိုင်ငံခြားရေးဝန်ကြီးဌာနရုံးချုပ်ကနေ မျက်နှာစွပ်ကာ ခေါ်ဆောင်သွားတယ်လို့ မျက်မြင်သက်သေတဦးကပြောပါတယ်။

"၆ ယောက်လောက်ကြားထဲကပေါ့... ဒီတိုင်း အေးဆေးပဲ... ဘာမှ ချုပ်နှောင်ထားခြင်းမရှိဘဲ၊ ခေါ်လာခဲ့ပြီးတော့ ရှေ့ကားကလည်း အလုံကားမျိုး နောက်ကားကလည်း အလုံကားပဲ။ ယူနီဖောင်း မပါဘူး။ အရပ်ဝတ်ပဲ.. လူပုံစံတွေကတော့ ထောင်ထောင်မောင်းမောင်းတွေ ဝင်တဲ့ အချိန်မှာ တွန်းတင်တယ်။ နောက်ကားပေါ်ရောက်တော့ တံခါးမပိတ်ခင်မှာ ခေါင်းကို စွပ်လိုက်တယ်။ အဲဒါ လေးပါဗျ။ ဦးချမ်းအေးက သူက CDM လို့တော့ မကြေငြာဘူး။ ဒါပေမဲ့ ထောက်ခံမယ့်ထဲမှာတော့ ပါမယ်ထင်တယ်။ ဘာလို့လဲဆိုတော့ သူက သူ့သူငယ်ချင်း တယောက် ထိုင်းကနေပြီးတော့ လက်ထောက်ညွှန်ကြားရေးမှူးနဲ့ အလုပ်ထွက်သွားပြီးတော့ အပြင်မှာနေတဲ့သူနဲ့ အချိတ်အဆက်တွေ ရှိတယ်ဗျ။ အချိတ်အဆက်ရှိတော့ အတွင်းသတင်းတွေ ပေါက်ကြားမှုနဲ့ ပတ်သက်ပြီးတော့ သံသယရှိပြီးတော့ ခုလို ခေါ်တယ်လို့လည်း ကျနော်က မြင်တယ်။ တရုတ်ဂတ်စ်ပိုက်လိုင်းကိစ္စနဲ့ ပတ်သတ်လို့ အစည်းအဝေးလုပ်တဲ့ကိစ္စလေ... အဲဒီကိစ္စနဲ့ပတ်သတ်ပြီး သတင်းပေါက်ကြားလို့ဆိုပြီး စစ်ဆေးရေးဝင်နေတယ်... MOFA မှာလေ။"

မျက်မြင်တဲ့ သူတဦးပြောပြချက်ဖြစ်ပြီး လုံခြုံရေးအရ အသံပြုပြင်ထားရတာဖြစ်ပါတယ်။ ဦးချမ်းအေးကို ဘယ်ခေါ်ဆောင်သွားသလဲ ဆိုတာကတော့ ခုထိမသိရသေးပါဘူး။

ပြီးခဲ့တဲ့ ရက်ပိုင်းကလည်း CDM အကြမ်းမဖက် အာဏာဖီဆန်ရေး လှုပ်ရှားမှုမှာ ပါဝင်တဲ့ နိုင်ငံခြားရေးဝန်ကြီးဌာန ဝန်ထမ်း ၁၁ ယောက်ကို စစ်အုပ်ချုပ်ရေးကောင်စီဘက်က ဖမ်းဆီးထားပြီး ရာဇသတ်ကြီးပုဒ်မ ၅၀၅(က)နဲ့ နေပြည်တော် ဒက္ခဏသီရိမြို့နယ်တရားရုံးမှာ တရားစွဲဆိုထားတာရှိပါတယ်။ ဒီလူတွေဟာ ဖေဖော်ဝါရီ ၁၈ ရက်နေ့မှာ အဖမ်းခံခဲ့ရတာပါ။ သူတို့တွေကိုတော့ လာမယ့် မတ် ၁၅ ရက်နေ့မှာ ရုံးထုတ်သွားဖို့ ရှိပါတယ်။

"အချိန်တိကျတော့ မသိရသေးဘူး။ အဲဒီ ၁၅ ရက်နေ့တော့ ရုံးချိန်းထပ် ရှိတယ်ဆိုပြီး သိတယ်။ လိုက်ပေးမယ့် ရှေ့နေတွေဆီကနေ ပြောပါတယ်ဗျ။ ၁၅ ရက်နေ့ဆိုတာကိုတော့ အတည်ပြုပါတယ်။ နေရတာလည်း သူတို့က ထောင်ကို အရင်တုန်းက ကိုဗစ်စင်တာထားဖို့အတွက်ဆိုပြီး ယာယီအနေနဲ့ လုပ်ထားတာရှိတယ်လေ။ အဲဒီကိုဗစ်စင်တာမှာထားတယ်လို့ ပြောတယ်။"

ရာဇသတ်ကြီးပုဒ်မ ၅၀၅(က)နဲ့ အမှုဖွင့်ဖမ်းဆီးခံထားရတဲ့ နိုင်ငံခြားရေးဝန်ထမ်း ၁၁ ယောက်ကတော့ အမျိုးသား ၃ ယောက်နဲ့ အမျိုးသမီး ၈ ယောက်တို့ ဖြစ်ပါတယ်။ သူတို့ကို တရားစွဲဆိုတဲ့ ပုဒ်မ ၅၀၅ (က) ဟာ တပ်မတော် ကို ပြိုကွဲအောင် လှုံ့ဆော်မှု/လုပ်ဆောင်မှု ဖြစ်ပြီး ပြစ်မှုထင်ရှားရင် ထောင်ဒဏ် သုံး နှစ်ထိ ချမှတ်ခံရနိုင်ပါတယ်။

လက်ရှိ မြန်မာစစ်အာဏာသိမ်းမှုအပေါ်ထား ရှိတဲ့တရုတ်နိုင်ငံရဲ့သဘောထားအပေါ်လူထုအကြား မကျေမနပ်ဖြစ်နေကြပြီး တရုတ်ဆန့်ကျင်ရေး လှုံ့ဆော်မှုတွေ ရှိနေပါတယ်။ ကျောက်ဖြူနဲ့ ယူနန်ပြည်နယ်အကြားသွယ်တန်းထားတဲ့ ဓါတ်ငွေ့ပိုက်လိုင်းကို ဖျက်ဆီးပစ်ဖို့ဆိုတဲ့ တိုက်ရိုက်/သွယ်ဝိုက်လှုံ့ဆော်မှုတချို့လည်း ဖေ့စ်ဘွတ်မှာ ပျံ့နှံ့နေပါတယ်။

 ဗွီအိုအေ (မြန်မာပိုင်း)

https://burmese.voanews.com/a/mofa-director-arrested/5807303.html