"ရုံးတက်ရင်း ရုန်းထွက်" ကြမယ့် ဝါရှင်တန်မြို့တော်က မြန်မာသံဝန်ထမ်းတချို့ (ဦးကျော်စွာထွန်းနဲ့ ဆက်သွယ်မေးမြန်း)

ဝါရှင်တန်မြို့တော်က မြန်မာသံရုံး

သံရုံးတွေမှာ ဆက်လက်တာဝန်ထမ်းဆောင်ရင်း CDM အမိန့်မနာခံရေး အကြမ်းမဖက်လှုပ်ရှားမှုမှာ ပူးပေါင်းဆောင်ရွက်သွားမှာဖြစ်တယ်လို့ ဝါရှင်တန်ဒီစီ မြန်မာသံရုံး တတိယအတွင်းဝန် ဦးကျော်စွာထွန်းက ဗွီအိုအေ ကို ပြောပါတယ်။ ကြာသပတေးနေ့က ဝါရှင်တန် မြန်မာသံရုံးက သံဝန်ထမ်းငါးဦးဟာ မြန်မာပြည်သူတွေနဲ့ တသားတည်း ရပ်တည်ကြောင်း ပြသတဲ့အနေနဲ့ CDM လှုပ်ရှားမှုမှာ ပူးပေါင်းပါဝင်ကြောင်း ထုတ်ဖေါ်ကြေညာခဲ့ကြတာပါ။ အရပ်သားအစိုးရထံ အာဏာပြန်ရရေး ”ရုံးတက်ပြီး ရုန်းထွက်” မယ့်သံရုံးဝန်ထမ်းတွေဆက်လက် ဆောင်ရွက် မယ့် အခြေအနေတွေနဲ့ ပတ်သက်လို့ ဦးကျော်စွာထွန်းကို မအင်ကြင်းနိုင်က သီးသန့် ဆက်သွယ်မေးမြန်းထားပါတယ်။

အင်ကြင်းနိုင်။ ။ အခု ဝါရှင်တန်ဒီစီ မြန်မာသံရုံး တတိယအတွင်းဝန် ဦးကျော်စွာထွန်း ဦးဆောင်ပြီးတော့ သံရုံးဝန်ထမ်း ၅ ယောက်ကနေ CDM အမိန့်မနာခံရေး အကြမ်းမဖက်လှုပ်ရှားမှုမှာ ပါဝင်လာတယ်ဆိုတဲ့အခါကျတော့ ဦးကျော်စွာထွန်းတို့ အခု ဘာဆက်လုပ်ဖို့ရှိသလဲ။

ဦးကျော်စွာထွန်း။ ။ ဘာဆက်လုပ်ဖို့ရှိသလဲဆိုတော့ ကျနော်တို့ရဲ့ အဓိက ရည်ရွယ်ချက်က Government System ကြီး down ဖို့ကို ဦးတည်ရည်ရွယ်တယ် အဲဒီအတွက်ကိုလည်း ဆက်လက်ဆောင်ရွက်သွားမှာပါ။

အင်ကြင်းနိုင်။ ။ ဆိုလိုတာက အခုဆိုရင် ဦးကျော်စွာထွန်း ကိုယ်တိုင် တတိယအတွင်းဝန်နဲ့ ဆက်ပြီးတော့ တာဝန်ထမ်းဆောင်မယ် တဖက်မှာလည်း CDM မှာ ပါဝင်တယ်ဆိုတဲ့ အနေအထားလားရှင့်။

ဦးကျော်စွာထွန်း။ ။ ဟုတ်ပါတယ်ခင်ဗျ။

အင်ကြင်းနိုင်။ ။ အဲဒီတော့ လက်ရှိမှာကျတော့ သံရုံးမှာက သံအမတ်ကြီး ဦးအောင်လင်းလည်း ရှိနေတဲ့အခါကျတော့ ဦးကျော်စွာထွန်းတို့က CDM မှာ ပါဝင်လာတယ်ဆိုတဲ့အခါကျတော့ သံအမတ်ကြီး ဦးအောင်လင်းနဲ့ ဆက်ဆံရေး ဘယ်လိုရှိမလဲရှင့်။

ဦးကျော်စွာထွန်း။ ။ သံအမတ်ကြီး က ကျနော်တို့ကို နဂိုကတည်းက ရွေးချယ်ပိုင်ခွင့်ပေးထားပါတယ်။ လွတ်လပ်စွာ သဘောထားကွဲလွဲပိုင်ခွင့်ပေးထားပါတယ်။ ဘာတခုမှ ကျနော်တို့ကို တားမြစ်ထားခြင်း ၊ ချုပ်ကိုင်ထားခြင်းမရှိပါဘူး အဲဒါလေးတော့ ပြောပါရစေ။

အင်ကြင်းနိုင်။ ။ သူကိုယ်တိုင်ကတော့ CDM ထဲမှာ ပါဝင်ဖို့ကျတော့ အခုဆိုရင် နယူးရောက်က ကုလဆိုင်ရာ မြန်မာသံအမတ်ကြီး ဦးကျော်မိုးထွန်းလိုမျိုးပေါ့နော် သူက စစ်အာဏာသိမ်းတာကိုဆန့်ကျင်တယ်ဆိုတာမျိုး၊ ဒေါ်အောင်ဆန်းစုကြည် အရပ်သားအစိုးရကိုသာ သူက ကိုယ်စားပြုတယ်ဆိုတာမျိုးပေါ့။ ဦးအောင်လင်းဘက်ကရော အဲလို ပြတ်ပြတ်သားသားရပ်တည်လာမယ့်အခြေအနေရော ဘယ်လိုရှိမလဲရှင့်။

ဦးကျော်စွာထွန်း။ ။ အဲဒါကတော့ ကျနော်မပြောပါရစေနဲ့ ၊ ဘာဖြစ်လို့လဲဆိုတော့ ဒါက တဦးတယောက် ပုဂလိက ခံစားချက်ဖြစ်တဲ့အတွက်ကြောင့် သူကိုယ်တိုင်ပြောတာ သူကိုယ်တိုင်ဖြေတာပဲ ကောင်းပါလိမ့်မယ်။ ဘာဖြစ်လို့လဲဆိုတော့ ကျနော်က တမျိုးပြောလိုက် ၊ သူက တခုလုပ်တယ် ဆိုရင်လည်း ကျနော်လည်း မကောင်းပါဘူး။ သူလည်း မကောင်းပါဘူး။ အဲဒီအတွက် ကာယကံရှင်တွေကိုပဲ တိုက်ရိုက်မေးတာက ပိုပြီးသင့်တော်မယ်လို့ ထင်ပါတယ်။

အင်ကြင်းနိုင်။ ။ ဟုတ်ကဲ့။ ဦးကျော်စွာထွန်းတို့ကျတော့ အခုဆက်ပြီး သံအမတ်ကြီးကလည်း ရွေးချယ်ပိုင်ခွင့်ပေးထားတာဆိုတော့ သံရုံးကိစ္စတွေမှာလည်း ဆက်ပြီး လုပ်ဆောင်မယ်ဆိုရင် ဘယ်လိုပုံစံမျိုးဆောင်ရွက်မလဲရှင့်။ ဘာဖြစ်လို့လဲဆိုတော့ စစ်တပ်က ဖွဲ့စည်းထားတဲ့ အုပ်ချုပ်ရေးကောင်စီကလည်း ညွှန်ကြားချက်တွေကတော့ လာမှာပေါ့နော်။ အဲဒီလို ညွှန်ကြားချက်တွေနဲ့ ပတ်သက်ပြီးတော့ ဦးကျော်စွာထွန်းတို့ ဘယ်လို ဆက်လုပ်ဖို့ရှိသလဲရှင့်။

ဦးကျော်စွာထွန်း။ ။ ကျနော်အရင်ဆုံးပြောပါရစေ အထဲမှာ လုပ်တဲ့ CDM Movement က ရုံးမတက်ပဲ ရုန်းထွက်တာပါ။ ဒီက CDM Movement က ရုံးတက်ပြီးတော့ ရုန်းထွက်တာပါ။ ဒီမှာ ရုံးတက်ပြီးတော့ ရုန်းထွက်တယ်ဆိုတာမှာ ကျနော်တို့ အာဏာဖီဆန်ခြင်းလို့ ပြောလို့ရပါတယ်။ အဓိက ဒီ စစ်ကောင်စီအစိုးရဲ့ အာဘော်တွေ၊ လမ်းညွန်ချက်တွေမှာ ကျနော်တို့ လိုက်နာကျင့်သုံးခြင်းမရှိပဲနဲ့ ကျနော်တို့ အခုလက်ရှိဆိုရင် မအင်ကြင်းနိုင်တို့လည်းသိပါတယ် ကျနော်တို့ မြန်မာပြည်ကို ပြန်တဲ့ relief flight တွေ၊ သံရုံးဆိုင်ရာ ကိစ္စရပ်တွေ အစစ မြန်မာလူမျိုးအကျိုးအတွက်ပေါ့နော် ကျနော်တို့ မလုပ်မဖြစ်ဆိုတာတွေရှိပါတယ်။ ကျနော်တို့မှ မလုပ်ပေးရင် သူတို့ ဘယ်လိုလုပ်ကြမလဲ အဲဒါမျိုးလေးတွေပေါ့။ အခုလက်ရှိ ပြည်သူတွေအတွက် လုပ်ရမယ့် အလုပ်တွေရှိပါတယ် ကျနော်တို့ မြန်မာလူမျိုးတွေအတွက် သူတို့ရဲ့ ကောင်းကျိုးတွေအတွက်ရှိပါတယ် အဲဒါတွေကတော့ ကျနော်တို့ ဆက်လုပ်မှာပါ။ ကျနော်တို့ရဲ့ သဘောထားနဲ့ မသက်ဆိုင်တာတွေကိုတော့ သူတို့ အမိန့်နာခံပြီး လုပ်ဆောင်ပေးသွားမှာ မဟုတ်ပါဘူး။

အင်ကြင်းနိုင်။ ။ အခုဒါဆိုရင် အခုလို သံရုံးဝန်ထမ်းတွေက CDM မှာ ပါဝင်ပေမယ့် သံရုံးအလုပ်တွေ အထူးသဖြင့် ဒီ အမေရိကန်မှာရှိနေတဲ့ မြန်မာနိုင်ငံသားတွေအတွက် သံရုံးရဲ့ လုပ်ဆောင်ရမယ့် တာဝန်တွေကိုတော့ မပျက် ဆောင်ရွက်သွားမယ်ဆိုတဲ့အနေအထားလားရှင့်။

ဦးကျော်စွာထွန်း။ ။ ဟုတ်ပါတယ်ခင်ဗျ ၊ နောက်ပြီးတော့ အခုလက်ရှိ CRPH ကျနော်တို့ မျှော်မှန်းတဲ့ ဒီမိုကရေစီအစိုးရ ပေါ်ထွန်းရေးအတွက် အခု CRPH ကနေ ဖွဲ့စည်းထားတဲ့ ယာယီအစိုးရကိုလည်း နိုင်ငံတကာ အသိအမှတ်ပြုအောင် ၊ အာဏာသက်ရောက်နိုင်အောင် ကျနော်တို့ အကူအညီတောင်းသွားမယ်။

အင်ကြင်းနိုင်။ ။ ဒါဆိုရင် ဦးကျော်စွာထွန်းတို့ အခုလို CDM အမိန့်မနာခံရေးမှာ ပါဝင်လာတယ် တဖက်မှာလည်း ရုံးဆက်တက်မယ်ဆိုတော့ မိသားစုအပေါ်မှာ CDM Movement မှာ ပါဝင်တဲ့အတွက် ထိခိုက်လာနိုင်ခြေ ရှိသလားရှင့်။

ဦးကျော်စွာထွန်း။ ။ ဒါကတော့ ကျနေ်ာတို့လည်း အတိအကျ မပြောပြနိုင်ဘူးခင်ဗျ။ ဘာဖြစ်လို့လဲဆိုတော့ လူတွေစိတ်ထဲကို ကျနော်တို့ မြင်နိုင်စွမ်းမရှိတဲ့အတွက်ကြောင့် ဘာဖြစ်လာမလဲဆိုတာလည်း ကျနော်တို့ မပြောနိုင်ပါဘူး။ ကျနော်တို့ ၅ ယောက်ကတော့ မျှော်မှန်းပြီးသားပါ ဘာပဲ ဖြစ်လာဖြစ်လာဆိုပြီးတော့ ကျနော်တို့ ဆုံးဖြတ်ချက်ချခဲ့တာပါ။

အင်ကြင်းနိုင်။ ။ အဲဒီတော့ လုံခြုံရေးအနေအထားရော ဘယ်လိုဖြစ်လာနိုင်မလဲရှင့်။ ဦးကျော်စွာထွန်းတို့ ၅ ယောက်စလုံး CDM မှာပါဝင်လာတဲ့ သံရုံးဝန်ထမ်းတွေ ၅ ယောက်စလုံးရဲ့ လုံခြံုရေး အခြေအနေရော။

ဦးကျော်စွာထွန်း။ ။ ကျနော်တို့ ယုံကြည်ပါတယ်ခင်ဗျ။ ဒီလို ဒီမိုကရေစီ နိုင်ငံကြီးမှာ နေနေတဲ့ ကာလအတွင်း ကျနေ်ာတို့ရဲ့ အသက်အိုးအိမ်စည်းစိမ်တော့ လုံခြုံမယ်လို့ မျှော်လင့်ပါတယ်။

အင်ကြင်းနိုင်။ ။ ဒီမှာရှိတဲ့အသိုင်းအဝိုင်းပေါ့နော်၊ ဝါရှင်တန်ဒီစီ၊ ဗာဂျီးနီးယား ၊ မေရီလန်း မြန်မာအသိုင်းအဝိုင်းကနေပြီးတော့ သံရုံးဝန်ထမ်းတွေအနေနဲ့ CDM မှာ ပါဝင်ဖို့ဆိုပြီးတော့ တောင်းဆိုလာတာတွေရှိတယ်ပေါ့ ။ အဲလိုတောင်းဆိုလာတဲ့အချိန်မှာ အခုချိန်ရောက်မှ ဦးကျော်စွာထွန်းတို့ CDM မှာ ပါတယ်ဆိုပြီတော့ ဆုံးဖြတ်ချက်ချလိုက်တဲ့ အကြောင်းအရင်းကို ပြောပြပါဦး။

ဦးကျော်စွာထွန်း။ ။ တကယ့်တကယ် အချိန်အတိအကျပြောမယ်ဆိုရင် ကျနော်တို့ နေပြည်တော်မှာ ပစ်ခံရတဲ့ ကလေးမလေး အသက်ဆုံးရှုံးသွားတဲ့အချိန်ကစပြီးတော့ ကျနော်တို့ ရင်ထဲမှာ မကောင်းခဲ့ကြတာပေါ့။ ကျနော်တို့ ငိုကြွေးခဲ့ပါတယ်။ အဲဒီအချိန်ကနေပြီးတော့ ကျနော်တို့ တယောက်နဲ့တယောက် ဆန္ဒလေးတွေ ဖလှယ်ကြပါတယ်။ အဲဒီအချိန်ကစပြီး ကျနော်တို့ အကောင်အထည်ဖော်ပါတယ်။ ဖြစ်လာနိုင်တဲ့ အကျိုးဆက်တွေကို ကျနေ်ာတို့ စဉ်းစားထားကြပါတယ်။ ဘယ်လိုပြောမလဲဆိုရင် ကျနော်တို့ ဒီ Movement ထဲ ပါဖို့ ကျနော်တို့ ကြိုးစားခဲ့တာ လွန်ခဲ့တဲ့ ၂ ပတ်ကျော်၊ ၃ ပတ်ကတည်းကပါ။ အခုမှ မဟုတ်ပါဘူး။ ထောက်ရှူခဲ့တာပေါ့ဗျာ။ အရာအားလုံးကို ကျနော်တို့ ထောက်ရှုခဲ့ရင်နဲ့ အချိန် ကြာမြင့်ခဲ့တာပါ။ ဒါပေမယ့် ဒီနေ့မှာတော့ ကျနော်တို့ နောက်ဆုံး Finalize လုပ်ပြီး decision ချဖြစ်သွားတယ်လို့ ကျနော်တို့ ပြောပါရစေ။

အင်ကြင်းနိုင်။ ။ အခု ဒီ CDM Movement မှာ ပါဝင်လာတဲ့ ဦးကျော်စွာထွန်းတို့အနေနဲ့ နယူးရောက်မှာရှိတဲ့ ကုလဆိုင်ရာ မြန်မာအမြဲတမ်းကိုယ်စားလှယ်ရုံးနဲ့ရော အထူးသဖြင့် သံအမတ်ကြီး ဦးကျော်မိုးထွန်းနဲ့ ဘယ်လိုပူးပေါင်းဆောင်ရွက်ဖို့ ရှိသလဲရှင့်။

ဦးကျော်စွာထွန်း။ ။ ဒါကတော့ လက်တလော မဖြစ် သေးပါဘူး။ ဆိုလိုတာက ကျနော်တို့ PR ကြီးအနေနဲ့လည်း ကျနော်တို့အပေါ် ခိုင်းစေချင်တာတွေရှိမလဲ။ ကျနော်တို့ကတော့ ဆောင်ရွက်ပေးဖို့ အသင့်ပါပဲ။

အင်ကြင်းနိုင်။ ။ ကျမတို့ ကြားတာ မနေ့ကဆိုရင် သံအမတ်ကြီး ဦးကျော်မိုးထွန်း ရုံးအဖွဲ့ရှိရာ နေရာကို ဝါရှင်တန်မှာရှိတဲ့ စစ်သံမှူးဘက်က လာတယ်ဆိုတာမျိုးတွေ လာပြီးတော့ ဖိအားပေးမယ်ဆိုတဲ့ သတင်းတွေထွက်ပေါ်လာတဲ့ အနေအထားတွေလည်းရှိတော့ ဒီအပေါ်မှာ ဦးကျော်စွာထွန်းတို့ ဘယ်လို ပြောပြနိုင်မလဲရှင့်။

ဦးကျော်စွာထွန်း။ ။ အဲဒါကတော့ ကျနော်တော် တောင်းဆိုချင်တာ တခုရှိပါတယ်။ တကယ့်လက်တွေ့ အခြေအနေကို စုံစမ်းပေးပါ။ ဘာလုပ်သလဲဆိုတာ။ ကျနော်က အတွင်းလူဖြစ်တဲ့အတွက်ကြောင့် ကျနော်ပြောပြပါမယ်။ မနေ့က သံအမတ်ကြီးက ကျနော်တို့ကို ပြောပါတယ်။ သူ နယူးယောက်သွားပါမယ်၊ ဟိုဘက်မှာလည်း လူချင်းတူပေမယ့် သံရုံးတရုံးနဲ့ တရုံး ထမ်းဆောင်ခြင်းတူပေမယ့် အတွေးအခေါ် စိတ်ဓါတ်ချင်းမတူကြပါဘူးခင်ဗျ။ အဲဒါဆိုတော့ ဟိုဘက်မှာလည်း ကြားက အငယ်တွေပေါ့ဗျာ PR ကြီးရယ် နောက် သူ့အောက်က တာဝန်ထမ်းဆောင်နေတဲ့ အငယ်တွေထဲမှာ သူတို့ ဘာဆက်လုပ်ရမလဲ ဟိုဟာလုပ်ရမလားဆိုတာ ဇဝေဇဝါနဲ့ ရင်ဆိုင်နေရတဲ့ အနေအထားလေးတွေရှိပါတယ်။ အဲဒီအပေါ်မှာ ဒီ ကျနော်တို့ ဝါရှင်တန်မြို့တော်က သံအမတ်ကြီးက သွားရောက်အားပေးခြင်းနဲ့ ဆွေးနွေးခြင်းတခုပဲရှိပါတယ် ကျန်တဲ့ရည်ရွယ်ချက်ကတော့ တခုမှ မပါပါဘူး။

အင်ကြင်းနိုင်။ ။ ဟုတ်ကဲ့ သံအမတ်ကြီး ဦးအောင်လင်းက သံအမတ်ကြီး ဦးကျော်မိုးထွန်းနဲ့ရော တွေ့ခဲ့သေးလား။

ဦးကျော်စွာထွန်း။ ။ ကျနော်ကြားမိသလောက်ကတော့ မတွေ့ခဲ့ပါဘူး လို့ကြားပါတယ်။

အင်ကြင်းနိုင်။ ။ ဟုတ်ကဲ့။ ဦးကျော်စွာထွန်းတို့ရော သံအမတ်ကြီးတို့ဘက်က လွတ်လပ်စွာ ရွေးချယ်ပိုင်ခွင့် ပေးထားတယ်ဆိုပေမယ့် နောက်ပိုင်းမှာ ဖိအားပေးတာမျိုးရော ဖြစ်လာနိုင်သလားရှင့်

ဦးကျော်စွာထွန်း။ ။ မဖြစ်လာနိုင်ပါဘူး ကျနော်က ဒီသံအမတ်ကြီးနဲ့ နေခဲ့တာ ၃ နှစ်ကျော် တာဝန်ထမ်းဆောင်ခဲ့တဲ့အချိန်မှာ ဒီသံအမတ်ကြီးရဲ့ စိတ်ဓါတ်နဲ့ သဘောထားကို ကောင်းစွာသိပါတယ်။

အင်ကြင်းနိုင်။ ။အဲဒီတော့ အခု မြန်မာနိုင်ငံမှာဆိုရင်လည်း အကြမ်းဖက် ဖြိုခွဲနှိမ်နင်းနေတာကြောင့် လူသေဆုံးမှုတွေဆိုရင် ၅၀ လောက်တောင်ရှိနေပြီဖြစ်တဲ့အတွက် ဒီအပေါ်မှာရော ဦးကျော်စွာထွန်းတို့ အတတ်နိုင်ဆုံးပေါ့နော် ဒီဟာမျိုးတွေ မဖြစ်အောင် ရပ်တန့်နိုင်အောင် ဘယ်လိုဆောင်ရွက်ပေးနိုင်ဖို့ ရှိလဲရှင့်။

ဦးကျော်စွာထွန်း။ ။ ဒါကတော့ ကျနော်တို့ ဝါရှင်တန်မှာရှိတဲ့ ကျနော်တို့ကနေပြီးတော့ မြေပြင်အနေအထားကို တိုက်ရိုက် State department ပဲ ဖြစ်ဖြစ် White House ပဲ ဖြစ်ဖြစ် လက်ရှိအနေအထားကို လက်တွေ့ကျကျ သိနိုင်အောင် ကျနော်တို့ Information တွေ share လုပ်ဖို့ ရှိပါတယ်။

အင်ကြင်းနိုင်။ ။အခုဆိုရင် ဦးကျော်စွာထွန်းတို့ ဝါရှင်တန်မှာရှိတဲ့ မြန်မာသံရုံးက သံရုံးဝန်ထမ်း ၅ ဦးက ဒီ CDM မှာ ပါဝင်လာတဲ့အတွက် အမေရိကန် ပြည်ထောင်စုမှာ ရှိတဲ့ မြန်မာအသိုင်းအဝိုင်းရော တခြားနိုင်ငံတွေကရော ဒီ မြန်မာအသိုင်းအဝိုင်းကနေပြီးတော့ တကယ့်ကို နာမည်တွေနဲ့ ဂုဏ်ပြုတာတွေလည်း တွေ့ရပါတယ် ဒီအပေါ်မှာ ဦးကျော်စွာထွန်းတို့ ဘယ်လို တုံ့ပြန်ချင်သလဲ။

ဦးကျော်စွာထွန်း။ ။ အခုလို လက်ခံကြိုဆိုပေးတဲ့အတွက် အများကြီး ကျေးဇူးတင်ပါတယ်။ ကျနော်တို့အနေနဲ့လည်း ကျနော်တို့ ယုံကြည်တဲ့ အစိုးရတရပ် တည်ဆောက်နိုင်ရေးအတွက် ကိုယ်စွမ်းဉာဏ်စွမ်း ရှိသမျှ ကျနော်တို့ ဆက်လက်ဆောင်ရွက်သွားပါမယ်။ ကျနော်တို့လည်း ယုံကြည်တဲ့အနေနဲ့ ပါဝင်ခဲ့တယ် ၊ ထို့အတူ လက်တလောမှာ အများယုံကြည်လက်ခံထားတဲ့ အစိုးရစနစ်ပြောင်းလဲရေးအတွက် ကိုယ်စွမ်း ရှိသမျှ ဉာဏ်စွမ်း ရှိသမျှ ဆက်လက်ဆောင်ရွက်သွားပါမယ်လို့ ပြောချင်ပါတယ်။

၀ါရှင်တန်ဒီစီ မြန်မာသံရုံး တတိယအတွင်းဝန် ဦးကျော်စွာထွန်းကို မအင်ကြင်းနိုင်ဆက်သွယ်မေးမြန်းခဲ့တာပါ။

အင်ကြင်းနိုင်/ VOA Burmese

https://burmese.voanews.com/a/some-staffs-from-embassy-of-myanmar-washington-dc-join-the-cdm-/5802633.html