ဆန္ဒပြရာမှာပါဝင်တဲ့ ကလေးသူငယ်တွေကို မထိခိုက်စေဖို့ Save the Children တောင်းဆို

ရန်ကုန်မြို့ မြေနီကုန်းလမ်းဆုံမှာ ပြုလုပ်တဲ့ စစ်အာဏာရှင် ဆန့်ကျင်ဆန္ဒပြ မြင်ကွင်း။

မြန်မာနိုင်ငံမှာ ငြိမ်းချမ်းစွာ ဆန္ဒထုတ်ဖော်နေသူတွေကို လေးစားဖို့နဲ့ အဲဒီထဲက ကလေးငယ်တွေကို အကာအကွယ်ပေးဖို့ နိုင်ငံပေါင်း ၁၀၀ ကျော်မှာ ကလေးငယ်တွေအတွက် အကူအညီပေးနေတဲ့ Save the Children အဖွဲ့ကြီးက တနင်္ဂနွေနေ့မှာ တောင်းဆိုလိုက်ပါတယ်။

စစ်တပ်က အာဏာသိမ်းထားတဲ့ မြန်မာနိုင်ငံမှာ နေ့စဉ်ရက်ဆက် ဆန္ဒပြမှုတွေအတွင်း စနေနေ့က မန္တလေးမှာ အသက် ၁၈ နှစ်အောက် လူငယ်လေးတဦး သေဆုံးခဲ့တဲ့သတင်းကြောင့် Save the Children အဖွဲ့ကြီးက တုန်လှုပ် အံ့သြခဲ့ရကြောင်းနဲ့ ဆန္ဒပြသူတွေကြားက ကလေးငယ်တွေရဲ့ လုံခြုံရေးအတွက်ပါ စိုးရိမ်ကြောင်း ပြောပါတယ်။

သေဆုံးသွားတဲ့ လူငယ်အပြင် တခြား သေဆုံးထိခိုက်ဒဏ်ရာရသူတွေရဲ့ မိသားစုဝင်တွေအတွက် ဝမ်းနည်းကြောင်း အဖွဲ့ရဲ့ပြောခွင့်ရက ပြောကြားလိုက်ပြီး ငြိမ်းချမ်းစွာ ဆန္ဒပြခွင့်ကို လေးစားကြဖို့နဲ့ ကလေးငယ်တွေကို အကာအကွယ်ပေးကြဖို့ သက်ဆိုင်သူအားလုံး၊ အထူးသဖြင့် လုံခြုံရေးတပ်ဖွဲ့ဝင်တွေကို ထပ်မံတောင်းဆိုကြောင်း ပြောပါတယ်။

ဒါ့အပြင် မြန်မာနိုင်ငံဟာ ကုလသမဂ္ဂ ပဋိညာဉ်စာတမ်းပါ ကလေးငယ်ရပိုင်ခွင့်နဲ့ နိုင်ငံတကာ လူ့အခွင့်အရေးတွေကို လေးစားလိုက်နာဖို့ စာချုပ် ချုပ်ဆိုထားတဲ့ နိုင်ငံတနိုင်ငံ ဖြစ်တာနဲ့အညီ ကလေးငယ်တွေကို အထူးကာကွယ်စောင့်ရှောက်ဖို့လည်း ပန်ကြားခဲ့ပါတယ်။

အထူးသဖြင့် လာမယ့်ရက် သီတင်းပတ်တွေအတွင်း သေဆုံးမှု၊ ထိခိုက်ဒဏ်ရာရတာတွေ မရှိရအောင် ကလေးငယ်တွေကို အတတ်နိုင်ဆုံး အကာအကွယ်ပေးရေး အားလုံးက ဝိုင်းဝန်း ဆောင်ရွက်ကြဖို့ကိုလည်း တိုက်တွန်းထားပါတယ်။

ဗွီအိုအေ (မြန်မာဌာန)

https://burmese.voanews.com/a/save-the-children-urges-myanmar/5787065.html