ရွေးကောက်ပွဲကော်မရှင်အဖွဲ့ဝင်တွေ ဖမ်းဆီးမှု NLD ပါတီ ရှုတ်ချ

Members of the Union Election Commission wear face masks during a press conference, announcing that general elections in Myanmar will proceed as planned in November despite coronavirus concerns, in Naypyitaw, Myanmar, June 4, 2020. © 2020 AP

ရွေးကောက်ပွဲမှာ မဲစာရင်းအမှားတွေကြောင့် မဲမသမာမှု ရှိနိုင်တယ်လို့ဆိုပြီး အာဏာသိမ်းယူထားသူတွေက ရွေးကောက်ပွဲတာဝန်ရှိသူတွေကို မတရား ဖမ်းဆီး ခြိမ်းခြောက် ဖိအားပေးပြီး မဲရလာဒ်တွေကို ပြင်မယ်ဆိုရင် ပြည်သူတွေထည့်ခဲ့တဲ့ စစ်မှန်တဲ့ မဲရလာဒ်နဲ့ ရွေးကောက်ပွဲ တရားဝင်ဖြစ်မှုကို မသမာတဲ့နည်းနဲ့ ပုံဖျက်ပြောင်းလဲတာဖြစ်တဲ့အတွက် လုံးဝ လက်ခံမှာ မဟုတ်ဘူးလို့ အမျိုးသားဒီမိုကရေစီအဖွဲ့ NLD ပါတီ ဗဟိုအလုပ်အမှုဆောင်အဖွဲ့က ကြေညာချက် ထုတ်ပြန်ပါတယ်။

ဒီနေ့ ထုတ်ပြန်တဲ့ ကြေညာချက်မှာ ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးလှသိန်း၊ အတွင်းရေးမှူး ဦးမြင့်နိုင်၊ အဖွဲ့ဝင် ဦးသန်းဌေးတို့ကို ဖမ်းဆီးပြီး မမှန်မကန် သက်သေခံဖို့ မမှန်သက်သေခံ ဖန်တီးမှုတွေလုပ်ဖို့ အာဏာသိမ်းယူထားသူတွေက လုပ်နေတယ်လို့ ဆိုပါတယ်။

မနေ့ညဖက် ဖေဖော်ဝါရီလ ၁၀ ရက်နေ့ ညပိုင်းမှာ တိုင်းဒေသကြီး၊ ပြည်နယ်၊ ခရိုင် မြို့နယ်တွေက ရွေးကောက်ပွဲ ကော်မရှင်အဖွဲ့ခွဲ ဥက္ကဋ္ဌတွေနဲ့ အတွင်းရေးမှူးတွေကို ဖမ်းဆီးသွားတယ်လို့ အဲဒီကြောငြာချက်ထဲမှာ ရေးထားပါတယ်။

ရွေးကောက်ပွဲ ရလာဒ်ကို ဘယ်ကော်မရှင် အဖွဲ့ခွဲကမှ ပြုပြင် ဖန်တီးနိုင်တာ မဟုတ်ပေမဲ့ ကော်မရှင်အဖွဲ့ခွဲတာဝန်ရှိသူတွေကို ဖိအားပေး ခြိမ်းခြောက်ပြီး မဲရလာဒ်တွေ ပြင်ဖို့ ကြိုးစားတာကို လက်ခံမှာ မဟုတ်ဘူးလို့ NLD ဗဟိုအလုပ်အမှုဆောင်အဖွဲ့က ကြေညာချက် ထုတ်ပြန်ပါတယ်။ 

VOA Burmese

https://burmese.voanews.com/a/nld-declear-that-military-arrest-election-commision/5774383.html