စစ်အာဏာရှင်ဆန့်ကျင်ရေး ငြိမ်းချမ်းစွာ ဆန္ဒဖော်ထုတ်မှုတွေကို NLD ထောက်ခံသည်

ရန်ကုန်မြို့တွင် စစ်အာဏာသိမ်းတာကို ကန့်ကွက် ဆန္ဒပြနေကြစဉ်။ (ဖေဖော်ဝါရီ ၆ ရက်)

မြန်မာနိုင်ငံမှာ စစ်တပ်က အာဏာသိမ်းလိုက်တာကို မကျေနပ်လို့ နည်းလမ်းမျိုးစုံနဲ့ ငြိမ်းချမ်းစွာ ကန့်ကွက်၊ ဆန္ဒဖော်ထုတ်နေတာတွေကို NLD အမျိုးသားဒီမိုကရေစီအဖွဲ့ချုပ်အနေနဲ့ ပူးပေါင်းပါဝင်ပြီး ထောက်ခံအားပေးသွားမယ်လို့ ဧရာဝတီတိုင်းဒေသကြီး လွှတ်တော်ကိုယ်စားလှယ် ဦးသိန်းဆွေက ပြောလိုက်ပါတယ်။ ဦးသိန်းဆွေကို ကိုဇော်ဝင်းလှိုင်က ဆက်သွယ် မေးမြန်းထားပါတယ်။

မေး။ အခု ဦးသိန်းဆွေကို ကျနော် မေးနေတဲ့အချိန်မှာကိုဘဲ ရန်ကုန်မြို့က လှည်းတန်းဒေသတဝိုက်မှာ ဆန္ဒပြနေကြတာတွေ ရှိပါတယ်။ အဲဒီအပေါ်မှာ ဦးသိန်းဆွေအနေနဲ့ ဘာများပြောချင်ပါသလဲ ခင်ဗျ။

ဦးသိန်းဆွေ။ “ဆန္ဒပြတာကတော့ ကြားရတာတော့ လှည်းတန်းတဝိုက်တင် မဟုတ်ဘူးဗျ။ သင်္ကန်းကျွန်းဘက်တွေမှာလည်း ပြတယ်။ ကြည့်မြင်တိုင်ဘက်တွေမှာလည်း ပြတယ်။ ပြတဲ့နေရာတွေက သောင်းချီတယ်။ လူထုကိုယ်တိုင်ကကို မခံမရပ်နိုင်ဖြစ်လာပြီးတော့ ငြိမ်းချမ်းစွာနဲ့ ဆန္ဒဖော်ထုတ်နေကြတဲ့ အနေအထား ဖြစ်လာတယ်။ ကျနော်တို့က ပြည်သူနဲ့တသားတည်းရှိတဲ့ ပါတီ အဖွဲ့အစည်းဖြစ်တယ်။ ပြည်သူ့ဆန္ဒကို ကျနော်တို့က အလေးထားတဲ့ပါတီဖြစ်တယ်။ ဒါကြောင့်မို့လို့ ဒီကနေ့ ဆောင်ရွက်နေကြတဲ့ ပြည်သူလူထုရဲ့ ငြိမ်းချမ်းစွာ ထုတ်ဖော် ပြသမှုတွေ၊ ထုတ်ဖော် ဆန္ဒပြမှုတွေ၊ နောက်တခါ ဒီ ငြိမ်းချမ်းစွာနဲ့ လုပ်ဆောင်နေတဲ့ လုပ်ရပ်မှန်သမျှအတွက် ကျနော်တို့ အမျိုးသားဒီမိုကရေစီအဖွဲ့ချုပ်အနေနဲ့ ထောက်ခံတယ်၊ အားပေးတယ်။”

မေး။ ဟုတ်ကဲ့ခင်ဗျ၊ ဒါနဲ့ပတ်သက်လို့ ကြားနေရတာတွေလည်း အမျိုးစုံဖြစ်နေပါတယ်။ အခုဟာက ဒီဆန္ဒပြပွဲတွေ၊ လမ်းမထွက်တာတွေကို NLD က မကြိုက်ဘူးတို့၊ ဒေါ်အောင်ဆန်းစုကြည်က လက်မခံဘူးတို့ အဲဒီလိုမျိုး သဘောထားတွေလည်း ကြားနေရတာတွေ ရှိပါတယ်။ ဦးသိန်းဆွေကရော၊ NLD က တာဝန်ရှိတဲ့သူတဦးအနေနဲ့ အခုလို လမ်းမတွေပေါ်ထွက် ဆန္ဒပြတာတွေအပေါ်မှာ ဘယ်လို သဘောရပါသလဲ ခင်ဗျ။

ဦးသိန်းဆွေ။ “ကျနော် ပွင့်ပွင့်လင်းလင်းပဲ ပြောမယ်ဗျ။ အခုဟာ သတင်းမှားတွေ ထုတ်လွှင့်နေတာတွေ ရှိတယ်။ သတင်းမှား ထုတ်လွှင့်နေတာတွေကလည်း တကယ်တန်းတော့ ဒါကို သတိပြုရမှာ။ ဒေါ်အောင်ဆန်းစုကြည် ပြန်လွတ်တယ်ဆိုပြီးတော့ မနေ့ကလည်း အုံးအုံးနဲ့ ဖြစ်ကြတယ်။ ပြန်မလွတ်သေးဘူး။ လွတ်တယ်ဆိုရင် ကျနော်တို့ပြည်သူကို အသိပေးမှာ။ ပြန်လွတ်တာနဲ့ ပြည်သူလူထုကို အသိပေးမှာ။ အဲဒီလို သတင်းမှားတွေကို မယုံကြည်ပါနဲ့။ ပြန်မလွတ်သေးဘူး။ နောက် ကျနော်တို့ CEC တွေကိုလည်း ဆက်လက်ပြီးတော့ ဖမ်းဆီး ထိန်းသိမ်းထားဆဲဘဲ ရှိတယ်။ ဒါကို သတင်းမှားတွေကို မယုံကြည်ဖို့ ကျနော်တို့ ပြောချင်တယ်။ နောက်တခုက ဒီကနေ့ လမ်းမပေါ်မှာ ထွက်လာတဲ့ ကဏ္ဍပေါင်းစုံကပုဂ္ဂိုလ်တွေ၊ ပြည်သူတွေ၊ ဒီပုဂ္ဂိုလ်တွေနဲ့အတူ ကျနော်တို့ အမျိုးသားဒီမိုကရေစီအဖွဲ့ချုပ်ကလည်း ပါဝင် ပူးပေါင်းပြီးတော့ ကျနော်တို့အနေနဲ့ ဆောင်ရွက်ကြတာ ဖြစ်တယ်။ အဲဒီအပေါ်မှာ ဒီ ဆန္ဒပြမှုနဲ့ပတ်သက်ပြီးတော့ မလုပ်ရဘူး၊ မပြုရဘူးဆိုတဲ့ ညွန်ကြားချက်မျိုး ကျနော်တို့ မရှိခဲ့ဘူး။ ဒါကြောင့်မို့လို့ ဒီအပေါ်မှာ သတင်းမှားတွေကို မယုံကြည်ပါနဲ့။ ကျနော်တို့ ပြောချင်တာကလေ နော်။ ကျနော်တို့ အခုလက်ရှိ အမျိုးသားဒီမိုကရေစီအဖွဲ့ချုပ်ရဲ့ လွှတ်တော်ကိုယ်စားပြုမှု ကော်မီတီတွေ CRPH ကို ကျနော်တို့ ဖွဲ့ထားတယ်။ ဒီကနေပြီးတော့မှ ဆက်သွယ် ဆောင်ရွက်နေတဲ့ လုပ်ငန်းစဉ်တွေ ရှိမယ်။ နောက်တခါ အခု လမ်းမတွေပေါ်မှာထွက်ပြီးတော့ ဆန္ဒပြနေကြတဲ့ ပြည်သူတွေ၊ ဒါဟာ ကျနော်တို့အနေနဲ့ ဒီလူတွေနဲ့အတူ တသားတည်းရှိတယ်ဆိုတာကို ကျနော်တို့ ပြောချင်တယ်။”

မေး။ နောက်တခု အခု ပြည်သူတွေကြားထဲမှာ စိုးရိမ်မှုဖြစ်နေတာက စစ်အာဏာသိမ်းတာကို မကျေနပ်လို့ ကန့်ကွက် ဆန္ဒပြကြတာတော့ ဟုတ်ပါပြီ၊ အခုချိန်ထိတော့ ၂ ရက်ရှိပြီပေါ့နော်။ မနေ့ကပြတယ်၊ ဒီကနေ့ပြတယ်။ အခုလဲ ပြနေကြတယ်ပေါ့။ ဒါပေမယ့် အဲဒီ ဆန္ဒပြတဲ့လူတွေကို အကြမ်းဖက်တုန့်ပြန်တာမျိုး ဘာညာ ဖြစ်လာခဲ့ရင် ဘယ်လို ရှေ့ဆက်သွားမလဲဆိုတာမျိုး။ နောက် အခု ဆန္ဒပြနေကြတဲ့လူတွေက ငြိမ်းငြိမ်းချမ်းချမ်း ဆန္ဒပြနေကြပေမယ့် အဲဒီအထဲမှာ အုတ်ရောရော၊ ကျောက်ရောရောနဲ့ သူ့လူ ကိုယ့်ဘက်သားတွေ ပါလာပြီးတော့ အကြမ်းဖက်မှု မဖြစ် ဖြစ်အောင် ဖန်တီးတာတွေ ဘာတွေများ ဖြစ်လာမလားဆိုပြီး စိုးရိမ်မှုတွေ ထွက်နေကြတာတွေလည်း ရှိပါတယ်။ အဲဒါတွေနဲ့ ပတ်သက်လို့ရော ဆန္ဒပြနေကြတဲ့သူတွေအပေါ်မှာ ဘာများ ပြောချင်ပါသလဲ။

ဦးသိန်းဆွေ။ “ကျနော်တို့ကတော့ ဒီ ငြိမ်းချမ်းစွာ ဆန္ဒထုတ်ဖော်မှု၊ ဆန္ဒပြမှုတွေကို သဘောတူတယ်။ နောက်တခုက အခု ကျန်းမာရေးဝန်ထမ်းတွေ အပါအဝင် ဝန်ထမ်းပေါင်းစုံကနေပြီးတော့မှ ဆောင်ရွက်နေကြတဲ့ အုပ်ချုပ်တဲ့စစ်အစိုးရ၊ စစ်အာဏာရှင်တွေရဲ့ အာဏာသိမ်းမှုကို လက်မခံဘူးဆိုတာကို ကျန်းမာရေးဝန်ထမ်းတွေ အပါအဝင် ဝန်ထမ်းပေါင်းစုံကလည်း ဒါကို ဆန့်ကျင်နေကြတယ်။ အဲဒီတော့ ဒီလိုမျိုးအချိန်အခါမှာ ကျနော်တို့အနေနဲ့ ငြိမ်းချမ်းစွာနဲ့ ဆောင်ရွက်မှုမှန်သမျှကို၊ စစ်အာဏာသိမ်းမှုကို နည်းလမ်းပေါင်းစုံနဲ့ ငြိမ်းချမ်းစွာ ဖော်ထုတ်မှုတွေကို ကျနော်တို့အနေနဲ့ ထောက်ခံတယ်။ အဲဒီနေရာမှာ NLD ခေါင်းစဉ်နဲ့ အကြမ်းဖက်မှုတွေကို အပြင်မှာ ဆောင်ရွက်လာရင် အဲဒါက ပြည်သူရဲ့ ရန်သူဘဲဖြစ်တယ်။ ဒါကို ကျနော်တို့အနေနဲ့ ပြတ်ပြတ်သားသား ပြောချင်တယ်။ ပြည်သူနဲ့ တသားတည်းရှိတယ်။ ပြည်သူနဲ့ တသားတည်း ရပ်တည်နေတယ်။ အဲဒီအတွက် ပြည်သူရဲ့ ငြိမ်းချမ်းစွာလုပ်ဆောင်တဲ့ လုပ်ဆောင်မှုမှန်သမျှကို ဟန့်တားတဲ့ပုဂ္ဂိုလ်တိုင်းသည် ဒါသည် ကျနော်တို့ NLD ကနေပြီးတော့ ညွန်ကြားတာ မဟုတ်ဘူးဆိုတာကို ကျနော်တို့ ပြတ်ပြတ်သားသား ပြောချင်တယ်။”

မေး။ အခု လမ်းမပေါ်ထွက် ဆန္ဒပြတာအပါအဝင်ပေါ့၊ အခုလက်ရှိ ဒီ စစ်အာဏာသိမ်းမှုအပေါ်မှာ Civil Disobedience ဆိုပြီးတော့ စောစောက ဦးသိန်းဆွေပြောသလို အစိုးရနဲ့ ပူးပေါင်းဆောင်ရွက်ခြင်းမပြုဘဲ လုပ်နေကြတဲ့သူတွေ၊ ဒီအပေါ်မှာ မကျေမခဲဖြစ်နေတဲ့ ပြည်သူတွေကို NLD ပါတီအနေနဲ့ နောက်ထပ် ဘာများ မှာချင်တာ ရှိပါသေးလဲ ခင်ဗျ။

ဦးသိန်းဆွေ။ “ကျနော့်အနေနဲ့ကတော့ ဒီ ငြိမ်းချမ်းစွာနဲ့ ဆန္ဒဖော်ထုတ်နေတဲ့သူတွေ၊ နောက်အခု ဒီ Civil Disobedience နဲ့ ပတ်သက်ပြီးတော့ ဆောင်ရွက်နေကြတဲ့ပုဂ္ဂိုလ်တွေကို တတ်နိုင်သမျှ ကူညီပေးကြပါ။ တတ်နိုင်သမျှ အားပေး ထောက်ပံ့ပေးကြပါ။ ဒီပုဂ္ဂိုလ်တွေရဲ့ လိုအပ်တဲ့ကိစ္စအဝဝကိုလည်း လုပ်နိုင်တဲ့ဘက်ကနေပြီးတော့ ဝိုင်းဝန်းပြီးတော့ ဖြည့်ဆည်းပေးကြပါ၊ အားပေးပေးကြပါ။ အဲဒီတော့ အဓိကပြောချင်တာကတော့ ပြည်သူအချင်းချင်း ဝိုင်းဝန်း ပူးပေါင်း ကူညီပေးကြပါ၊ အားပေး ထောက်ခံပေးကြပါ။”

မေး။ အခု ပြည်သူတွေက Civil Disobedience တို့၊ ဆန္ဒပြတာတို့ လုပ်တာကို NLD အနေနဲ့ ငြိမ်းချမ်းစွာ လုပ်ဆောင်ကြဖို့ တိုက်တွန်းတယ်၊ နောက်ပြီးတော့ Civil Disobedience ကိစ္စကို အားပေးတယ် ဆိုပေမယ့်လည်း ရေရှည်မှာ ဒီ စစ်အာဏာရှင်ပြုတ်ကျအောင် ဘယ်လိုလုပ်မယ်ဆိုတဲ့ဟာမျိုး NLD ခေါင်းဆောင်ပိုင်းမှာ စဉ်းစားနေတာတွေ ရှိပါပြီလား။ ဘယ်လို ရှေ့ဆက် ခရီးသွားကြဖို့ စီစဉ်ထားပါသလဲ။

ဦးသိန်းဆွေ။ “အသီးသီးကိုယ်စီ သိပါလိမ့်မယ်။ ဒီအတွက် အဖြေတခုကို ကျနော်တို့ ထုတ်ပါလိမ့်မယ်။ ဒီမှာတော့ ကျနော့်တဦးတည်း သဘောထားနဲ့လည်း ကျနော် ပြောလို့ မရပါဘူး။ နောက်တခု ကျနော်ပြောချင်တာက UN ကနေပြီးတော့မှလည်း နိုင်ငံအားလုံးဟာ တသဘောတည်း သဘောတူညီပြီးတော့ Resolution (ဆုံးဖြတ်ချက်) ထွက်လာတယ်။ ဒီဟာကလည်း ထပ်မံပြီးတော့ နိုင်ငံတကာကိုလည်း ကျနော်တို့အနေနဲ့ ကျေးဇူးတင်ကြောင်း ပြောချင်တယ်။ နောက်တခုက နိုင်ငံတကာမှာရှိတဲ့ UN အပါအဝင်၊ နိုင်ငံတကာအဖွဲ့အစည်းတွေ၊ နောက်တခါ နိုင်ငံတကာရောက်နေတဲ့၊ ပြည်ပမှာရှိနေတဲ့ ဒီမိုကရေစီလိုလားတဲ့ အင်အားစုတွေ အားလုံးကလည်း ဒီ စစ်အုပ်ချုပ်မှုကို လက်မခံဘဲနဲ့ တတ်နိုင်တဲ့ဘက်က၊ လုပ်နိုင်တဲ့ဘက်ကနေပြီးတော့ ဝိုင်းဝန်း ပူးပေါင်း ဆောင်ရွက်ပေးကြပါ။ အားပေး ထောက်ခံ ကူညီပေးကြပါလို့ တိုက်တွန်းချင်တယ်။ နောက်ဆုံး ပြောချင်တာကတော့ ဒီကနေ့ဟာ ပြည်သူလူထုအတွက် ဒီကာလဟာ အင်မတန်မှ အရေးကြီးတဲ့ကာလ ဖြစ်ပါတယ်။ ဒါကြောင့် ပြည်သူအားလုံးရဲ့ ငြိမ်းချမ်းစွာ ဆောင်ရွက်နေမှုမှန်သမျှကို ပြည်သူတရပ်လုံးက အပြန်အလှန် ပူးပေါင်း ဆောင်ရွက်ကြရင်းနဲ့ ကျနော်တို့ရဲ့ ဆောင်ရွက်နေကြတဲ့ စစ်အာဏာရှင် ချုပ်ငြိမ်းရေးကို ဝိုင်းဝန်း ပူးပေါင်း ဆောင်ရွက်ပေးကြပါလို့ဘဲ တိုက်တွန်းချင်ပါတယ်။”

ဦးသိန်းဆွေဟာ ပြီးခဲ့တဲ့ ၂၀၁၅ ခုနှစ် ရွေးကော်ပွဲမှာလည်း ဧရာဝတီတိုင်းဒေကြီး မဲဆန္ဒနယ် ၁၀ ကို ကိုယ်စားပြုပြီး အမျိုးသားလွှတ်တော်အမတ်အဖြစ် ရွေးကောက်တင်မြှောက်ခံခဲ့ရသူ ဖြစ်ပါတယ်။ 

ကိုဇော်ဝင်းလှိုင်/ VOA Burmese

https://burmese.voanews.com/a/interview-with-nld-mp-on-anti-coup-protests-in-myanmar/5768461.html