မြန်မာကိုဗစ်တိုက်ဖျက်ရေး IMF အကူအညီ ဒေါ်လာသန်း ၃၅၀ ပြန်ယူနိုင်မယ့် အလားအလာမရှိ

ရန်ကုန်မြို့ ဧရာဝတီကိုဗစ်စင်တာမှာ ကိုဗစ်လူနာတဦးကို ကုသပေးနေတဲ့ ကျန်းမာရေးဝန်ထမ်း နှစ်ဦး။ (ဒီဇင်ဘာ ၁၉၊ ၂၀၂၀)

နိုင်ငံတကာငွေကြေးရန်ပုံငွေအဖွဲ့ (IMF) အနေနဲ့ မြန်မာနိုင်ငံမှာ ကိုဗစ်တိုက်ဖျက်ရေးကူညီငွေ အမေရိကန်ဒေါ်လာ သန်း ၃၅၀ ကို ငွေသားအနေနဲ့ စစ်အာဏာမသိမ်းခင် ပြီးခဲ့တဲ့အပတ်ကပဲ ပို့ခဲ့တာက ပြန်ယူနိုင်ဖို့ အလားအလာမရှိပါဘူး။

ဒီ IMF နိုင်ငံတကာငွေကြေး အဖွဲ့ကြီးအနေနဲ့ ဒီ ကိုဗစ်ကမ္ဘာ့ကပ်ရောဂါတိုက်ဖျက်ရေးအရေးပေါ်ရန်ပုံငွေအဖြစ် အရင်မြန်မာ့ဒီမိုကရေစီအစိုးရကို ကြိုတင်စည်းကမ်းသတ်မှတ်မှု မထားဘဲပေးခဲ့တဲ့ ကူညီမှုမျိုးကို အရင်တုန်းကလည်း ကမ္ဘာမှာ ပြန်တောင်းနိုင်တဲ့ အနေအထားမျိုး မရှိခဲ့ဖူးပါဘူး။

အခုလို IMF က ငွေသားပေးပို့ခဲ့အပြီး ရက်ပိုင်းတွင်းမှာပဲ မြန်မာစစ်တပ်ခေါင်းဆောင်တွေအနေနဲ့ အာဏာသိမ်းခဲ့ပြီး ရွေးကောက်ခံခေါင်းဆောင် နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်နဲ့ အခြားရွေးကောက်ခံခေါင်းဆောင်တွေကို ထိန်းသိမ်းခဲ့ပါတယ်။

ဒီနိုင်ငံတကာငွေကြေးပေးပို့မှုဆိုင်ရာ ကျွမ်းကျင်သူတွေက အခုလို IMF က ဇန်နဝါရီ ၁၃ ရက်မှာ ဆုံးဖြတ်ပြီး အရေးပေါ်အမြန် ပို့ပြီးသားငွေကို ပြန်တောင်းနိုင်ဖို့ လုပ်နိုင်တဲ့အနေအထားက မရှိသလောက်နည်းပါတယ်လို့ ဆိုပါတယ်။

ဒီ IMF အဖွဲ့ ပြောခွင့်ရ အမျိုးသမီးကလည်း အခုငွေပို့ပြီးဖြစ်တာကို အတည်ပြုပေးခဲ့ပြီး မြန်မာနိုင်ငံမှာ နောက်ဆုံးဖြစ်ပျက်နေတာတွေကိုလည်း အနီးကပ်စောင့်ကြည့်နေခါ စီးပွားရေးနဲ့ မြန်မာပြည်သူတွေအပေါ် ရိုက်ခတ်လာနိုင်မှုတွေအတွက် အထူးစိုးရိမ်နေတယ်လို့ ဆိုပါတယ်။

ခုလိုအချိန်မှာ အမေရိကန် သမ္မတသစ် Joe Biden အနေနဲ့လည်း ပထမဆုံး နိုင်ငံတကာပြဿနာအဖြစ် မြန်မာ့အာဏာသိမ်းမှုကို ကြုံလိုက်ရပြီး အာဏာသိမ်း ဗိုလ်ချုပ်ကြီးတွေကို ဒဏ်ခပ် ပိတ်ဆို့မှုအသစ်တွေလုပ်ဖို့ သတိပေးထားခါ နိုင်ငံခြားရေးဝန်ကြီးဌာနကလည်း မြန်မာကိုပေးတဲ့ နိုင်ငံခြားအကူအညီတွေကို ပြန်သုံးဖို့ရှိတယ်လို့ ဆိုပါတယ်။ 

ဗွီအိုအေ (မြန်မာပိုင်း)

https://burmese.voanews.com/a/myanmar-covid-imf-aid/5763398.html