စစ်ကောင်စီရဲ့ ဥပဒေ၊ အမိန့်၊ ညွှန်ကြားချက်များ တရားမဝင်ကြောင်း CRPH ထုတ်ပြန်

ပြည်သူ့လွှတ်တော်

အာဏာသိမ်းစစ်ကောင်စီက ထုတ်ပြန်ထားတဲ့ ဥပဒေတွေ၊ အမိန့် ညွှန်ကြားချက်တွေဟာ တရားမဝင်ဘူးလို့ ပြည်ထောင်စုလွှတ်တော် ကိုယ်စားပြု ကော်မတီ CRPH က ဒီနေ့ ကြေညာချက်ထုတ်ပြန်ပါတယ်။

"တရားမဝင်သည့် အာဏာသိမ်း အဖွဲ့အစည်းတစ်ခုအနေဖြင့် နိုင်ငံတော်ရဲ့ ဥပဒေပြုရေး၊ အုပ်ချုပ်ရေးနဲ့ တရားစီရင်ရေး မည်သည့်အာဏာကိုမှ ရယူကျင့်သုံးခွင့်မရှိဘူး" လို့ ထုတ်ပြန်ချက်မှာ ပြောထားပါတယ်။

ဒါကြောင့် အာဏာသိမ်းအဖွဲ့က နိုင်ငံ့ဝန်ထမ်းများအပါအဝင် ပြည်သူတွေအပေါ် သတ်မှတ်ပြဋ္ဌာန်းတဲ့ ဥပဒေ၊ အမိန့်၊ ညွှန်ကြားချက်တခုမှ တရားဝင်မှုမရှိတဲ့အတွက် ပြည်သူတွေအနေနဲ့ လက်ခံလိုက်နာစရာ လုံးဝမလိုဘူးလို့ ပြည်ထောင်စုလွှတ်တော် ကိုယ်စားပြု ကော်မတီက ထောက်ပြပါတယ်။

Civil Disobedience Movement လှုပ်ရှားမှုတွေဟာ စစ်အာဏာရှင် ဆန့်ကျင်တိုက်ဖျက်တဲ့ နိုင်ငံ့အရေးဆောင်ရွက်ချက်သာဖြစ်ပြီး ပါတီနိုင်ငံရေးဆောင်ရွက်တာ မဟုတ်တဲ့အတွက် ၂၀၀၈ ခုနှစ် ဖွဲ့စည်းပုံ အခြေခံဥပဒေပုဒ်မ ၂၆ ပုဒ်မခွဲ (က) နဲ့လည်း ငြိစွန်းခြင်းမရှိဘူးလို့ ပြောထားပါတယ်။

ဒါကြောင့် နိုင်ငံ့ဝန်ထမ်းတွေ အားလုံးအနေနဲ့ စစ်အာဏာရှင်ဆန့်ကျင်တဲ့ CDM လှုပ်ရှားမှုမှာ အပြည့်အဝ ပူးပေါင်း ပါဝင်ကြဖို့ တိုက်တွန်းသလို ဒီလှုပ်ရှားမှုမှာ ပါဝင်တဲ့ ဝန်ထမ်းတွေကို မူလအလုပ်တာဝန် ရာထူး တည်မြဲရေးအတွက် ဥပဒေပြဋ္ဌာန်းပြီး အပြည့်အဝ အာမခံချက်ပေးသွားမယ်လို့ ပြည်ထောင်စုလွှတ်တော် ကိုယ်စားပြုကော်မတီ CRPH က သဘောထား ကြေညာချက် ထုတ်ပြန်ပါတယ်။ 

 VOA (မြန်မာပိုင်း)

https://burmese.voanews.com/a/crph-declare-military-coup-is-illegal/5774211.html