ပြည်သူလက်ခံတဲ့အစိုးရပေါ်ရေး သီတဂူဗုဒ္ဓတက္ကသိုလ်ကြီးများ ထုတ်ပြန်

သီတဂူကမ္ဘာ့ဗုဒ္ဓတက္ကသိုလ်ကြီး၏ ထုတ်ပြန်ကြေညာချက်။ (ဓာတ်ပုံ - သီတဂူဆရာတော်နဲ့ သီတဂူသတင်းများ (Facebook) - ဖေဖော်ဝါရီ ၀၈၊ ၂၀၂၁)

မြန်မာနိုင်ငံမှာ ပြည်သူ့ဆန္ဒနဲ့ မဆန့်ကျင်တဲ့ အစိုးရ တရပ်အမြန်ဆုံးပေါ်လာရေးအတွက် ငြိမ်းချမ်းတဲ့နည်းလမ်း၊ ဓမ္မနဲ့ ညီတဲ့ နည်းလမ်းတွေနဲ့ ဆောင်ရွက်ကြဖို့ သီတဂူကမ္ဘာ့ဗုဒ္ဓတက္ကသိုလ်ကြီးများက သံဃာတော်တွေက အလေးအနက် တိုက်တွန်းလိုက်ပါတယ်။ သီတဂူ ကမ္ဘာ့ဗုဒ္ဓ တက္ကသိုလ်ကြီးများရဲ့ သဘောထားထုတ်ပြန်ချက်ဆိုပြီး ဒီနေ့ ဖေဖော်ဝါရီလ ၈ ရက် နေ့စွဲနဲ့ သီတဂူဆရာတော်နဲ့ သီတဂူသတင်းများ Facebook စာမျက်နှာမှာ ကြေညာချက်ကို ဖော်ပြထားပါတယ်။ လက်ရှိဖြစ်ပေါ်နေတဲ့ နိုင်ငံရေးကိစ္စရပ်တွေဟာ ဓမ္မလမ်းကြောင်းကနေ သွေဖယ်ပြီး အဓမ္မလမ်းကြောင်းကနေ လေ ျှာက်လမ်းနေတယ်လို့ ယူဆတဲ့အတွက် ရဟန်းရှင်လူနဲ့ တိုင်းသူပြည်သားတွေ စိတ်မချမ်းမသာ ဖြစ်နေကြကြောင်း။ ခုလို တိုင်းသူပြည်သားတွေ စိတ်မချမ်းမမြေ့ဖြစ်မယ့် ဘယ်လို ဆောင်ရွက်မှုမျိုးကိုမဆို သီတဂူ ကမ္ဘာ့ဗုဒ္ဓ တက္ကသိုလ်ကြီးများရှိ သံဃာတော်တွေက လက်ခံသဘောတူမှာ မဟုတ်ဘူးလို့ ကြေညာချက်မှာ ဖော်ပြထားပါတယ်။ ငြိမ်းချမ်းသာယာခြင်းကို ပြုတတ်၊ ပြောတတ်သူတွေမပါတဲ့ အဖွဲ့အစည်းဟာ ဓမ္မနဲ့ လျော်ညီတဲ့ အဖွဲ့အစည်းမဟုတ်ဘူးလို့လည်း သီတဂူ ကမ္ဘာ့ဗုဒ္ဓ တက္ကသိုလ်ကြီးများက ဦးဆောင်ဆရာတော်တွေရဲ့ လက်မှတ်နဲ့ ကြေညာချက်ထုတ်ပြန်ထားပါတယ်။

ဒီထုတ်ပြန်ချက်ဟာ စစ်ဗိုလ်ချုပ်တွေနဲ့ နီးစပ်တဲ့ ဆက်ဆံရေးရှိသူ သီတဂူဆရာတော်ကြီးရဲ့ သဘောထား ထုတ်ပြန်ချက်တော့ မဟုတ်ပါဘူး။

အများလူထုဆန္ဒနဲ့ ဆန့်ကျင်ပြီး အာဏာသိမ်းတဲ့လုပ်ရပ်ကို ဆန့်ကျင်ကြောင်း မန္တလေးမြို့ မစိုးရိမ်တိုက်သစ် နာယက ဆရာတော်တွေကလည်း ဖေဖော်ဝါရီလ ၇ ရက်နေ့က ကြေညာချက်ထုတ်ပါတယ်။ အာဏာသိမ်းတဲ့အပေါ် လုံးဝ မနှစ်သက်၊ လက်မခံ၊ အားမပေး၊ ရှုတ်ချ ကန့်ကွက်တယ်လို့ ကြေညာချက်မှာ ဖော်ပြထားပါတယ်။ ပြည်သူလူထု အများဆန္ဒကို ဆန့်ကျင်နေတဲ့ အာဏာသိမ်းလုပ်ရပ်ကို တရားနည်းလမ်းနဲ့အညီ ဖြေရှင်ဆောင်ရွက်ဖို့လည်း အထူးတိုက်တွန်းထားပါတယ်။ တည်ငြိမ် အေးချမ်း သာယာဝပြောတဲ့ ဖယ်ဒရယ်ပြည်ထောင်စုကြီးတခု အမြန်ဆုံး ပေါ်ပေါက်လာစေဖို့ အလေးအနက် ဆုတောင်း မေတ္တာပို့သကြောင်း မန္တလေးမြို့ မစိုးရိမ်တိုက်သစ် နာယကဆရာတော်ကြီးတွေက ကြေညာချက် ထုတ်ပြန်ထားပါတယ်။

ဗွီအိုအေ (မြန်မာပိုင်း)

https://burmese.voanews.com/a/sitagu-statement-myanamr-military-coup/5769560.html