ရခိုင်ပညာရေးဝန်ထမ်းတွေ အလုပ်ပြန်ဝင်ဖို့ ညွှန်ကြား

ရခိုင်ပြည်နယ်ရှိ ပြည်နယ်ပညာရေးမှူးရုံး။ (ဇူလိုင် ၁၆၊ ၂၀၂၀)

စစ်တပ်က အာဏာသိမ်းပြီးနောက် ရခိုင်ပြည်နယ်မှာ အခြေခံပညာရေးကျောင်းတွေ ဖွင့်လှစ်နိုင်ဖို့အတွက် ပညာရေးဝန်ထမ်းအားလုံး ဒီကနေ့ စတင်ပြီး ပုံမှန်ကျောင်းတက်ဖို့ ပြည်နယ် ပညာရေးမှူးရုံးက ထုတ်ပြန်ထားပါတယ်။ တစ်နိုင်ငံလုံး အတိုင်းအတာနဲ့ အာဏာရှင် အစိုးရကို ဆန့်ကျင်နေကြသလို ဌာနဆိုင်ရာ ဝန်ထမ်းတွေဟာလည်း အနုနည်းနဲ့ အာဏာဖီ ဆန်တဲ့ CDM တွေမှာ ပါဝင်လာကြပြီး ရခိုင်ပြည်နယ်က ပညာရေးဝန်ထမ်းတချို့လည်း CDM မှာ ပါဝင်နေကြပါတယ်။ ဒီအကြောင်း အပြည့်အစုံကိုတော့ ဗွီအိုအေ မြန်မာပိုင်း သတင်းထောက် ကိုသက်နိုင်က ပြောပြပါမယ်။

ရခိုင်ပြည်နယ်မှာ အခြေခံပညာရေးကျောင်းတွေ ဖွင့်လှစ်နိုင်ဖို့နဲ့ ကျောင်း ဥပဓိရုပ် ကောင်းမွန်ဖို့အတွက် ပညာရေးဝန်ထမ်းအားလုံး ဒီကနေ့ စတင်ပြီး ပုံမှန်ကျောင်းတက်ဖို့ ပြည်နယ်ပညာရေးမှူးက မနေ့က ထုန်ပြန်လိုက်တာဖြစ်ပါတယ်။

စစ်တပ်က အာဏာသိမ်းပြီးနောက် မြန်မာနိုင်ငံအဝှမ်း အာဏာရှင်ဆန့်ကျင်တဲ့ လှုပ်ရှားမှူတွေ ကြီးထွားလာနေပေမဲ့လည်း ရခိုင်ပြည်နယ်တစ်ခုတည်းမှာပဲ ပညာရေးဝန်ထမ်းတွေ ဒီကနေ့စပြီး ကျောင်းပုံမှန်တက်ရမယ်ဆိုတဲ့အပေါ် ပညာရေးဝန်ထမ်းတွေကြား စိုးရိမ်မှုတွေ လည်း ရှိနေကြတာပါ။

ပေါက်တောမြို့နယ်က မူလတန်းပြ ကျောင်းဆရာမ တစ်ဦးကတော့ ဒီကနေ့ ကျောင်းပြန် တက်ဖို့ အကြောင်းကို မနေ့က ညနေပိုင်းကမှ ဖုန်းဆက်လာတယ်လို့ ပြောပါတယ်။

“မနေ့ကကျတော့ ကျမတို့ တာဝန်ခံ ကျောင်းအုပ်ကပေါ့နော်... ကျောင်းဆရာမကြီးက ဖုန်းဆက်တယ်။ မနက်ဖြန် ကျောင်းလာရမယ်ပေါ့နော်။ စာသင်ရမယ်လို့တော့ မပြောဘူး။ သူတို့လည်း အထက်က မြို့နယ်ပညာရေးမှူးရုံးက ညွန်ကြားလို့ ဆရာ၊ ဆရာမတွေကို ၂၂ ရက်နေ့ ကျောင်းကို အရောက်ခေါ်ထားရမယ်ဆိုလို့ ခေါ်တာလို့ ပြောပါတယ်။”

ရခိုင်ပြည်နယ်မြောက်ပိုင်း ပုဏ္ဏားကျွန်းမြို့နယ် ပညာရေးမှူး ဦးညီထွေးကတော့ ပိတ်ထားတဲ့ ကျောင်းတွေ ဥပဓိရုပ်ကောင်းဖို့နဲ့ ကျောင်းပြန်ဖွင့်နိုင်ဖို့အတွက် ဆရာ၊ ဆရာမတွေကို ကျောင်းတက်ဖို့ ခေါ်ရတာ ဖြစ်တယ်လို့ ပြောပါတယ်။

“မဟုတ်ဘူး။ ဒီလိုပါ အရင်တုန်းကတည်းက ကျောင်းဥပဓိရုပ်ကောင်းဖို့အတွက် ကျောင်းအုပ်ကြီးနဲ့ ဆရာ၊ ဆရာမတွေက ကျောင်းမှာနေပြီးတော့ ဆောင်ရွက်ရမယ်ဆိုတာ ရှိပြီးသားပါ။ ကျောင်းမှာနေရမယ့် သဘောပါ။ ကျောင်းဥပဓိရုပ်ကောင်းအောင် လုပ်နေရမယ့် သဘောပါ။ ဝန်ထမ်းက ဝန်ထမ်းနေရာမှာ ရှိနေရမယ့် သဘောပါပဲ... ပုံမှန်ပါပဲ။”

တစ်နိုင်ငံလုံး အတိုင်းအတာနဲ့ အာဏာရှင် အစိုးရကို ဆန့်ကျင်တဲ့ လှုပ်ရှားမှုတွေဟာလည်း ကြီးထွားလာနေသလို သက်ဆိုင်ရာ ဌာနဆိုင်ရာဝန်ထမ်းတွေဟာလည်း အနုနည်းနဲ့ အာဏာဖီ ဆန်တဲ့ CDM လှုပ်ရှားမှုတွေမှာ ပါဝင်လာကြပါတယ်။

ရခိုင်ပြည်နယ် ပေါက်တောမြို့နယ်က မူလတန်းပြဆရာမ တစ်ဦးကလည်း ညွန်ကြားချက် အတိုင်း ကျောင်းသွားတက်မှာ မဟုတ်သလို စစ်အာဏာရှင် လက်အောက်မှာ ဝန်ထမ်းဆက်မလုပ်ဖို့ ဆုံးဖြတ်ထားတယ်လို့ ပြောပါတယ်။

“ကျမကတော့ ကျောင်းကို လုံးဝမသွားဖို့ ဆုံးဖြတ်ထားပါတယ်။ ဘာကြောင့်လဲ ဆိုတော့ အခုက စစ်တပ်က အာဏာသိမ်းထားတယ်ဆိုတော့ ကျမတို့ ကျောင်းကို သွားလိုက်လို့ရှိရင် သူတို့ကို ထောက်ခံသလို ဖြစ်သွားလိမ့်မယ်။ ကျမကတော့ စစ်အာဏာရှင်ကို လုံးဝ ဆန့်ကျင်တယ်။ ကန့်ကွက်တယ်။ အဲဒါကြောင့် CDM လုပ်မယ်လို့ ဆုံးဖြတ်ထားတယ်။ သူတို့ အုပ်ချုပ်တဲ့ လက်အောက်မှာ ကျမ အလုပ်မလုပ်ချင်ဘူးပေါ့နော်။ အဲဒါကြောင့် ကျောင်းကို လုံးဝမသွားပါဘူး။ ပြတ်ပြတ်သားသား တခုခု ဆုံးဖြတ်ရမယ်ဆိုရင် အလုပ်ထွက်ဖို့ ဆုံးဖြတ်ထားပါတယ်။”

မြန်မာနိုင်ငံမှာ အခြေခံပညာကျောင်းတွေကို ပြီးခဲတဲ့ အရပ်သားအစိုးရလက်ထက်မှာက တည်းက ကိုရိုနာဗိုင်းရပ်စ် ကုူးစက်မှုတွေကြောင့် ပိတ်ထားခဲ့ရတာဖြစ်ပြီး လက်ရှိမှာတော့ တစ်နိုင်ငံလုံး အတိုင်းအတာနဲ့ အခြေခံကျောင်းတွေကို ဖွင့်လှစ်နိုင်ဖို့ ဆောင်ရွက်နေတယ်လို့ ရခိုင်ပြည်နယ် ပညာရေးမှူးရုံးက ထုတ်ပြန်တဲ့ ထုတ်ပြန်ချက်ထဲမှာ ဖော်ပြထားပါတယ်။

သက်နိုင်/ VOA Burmese

https://burmese.voanews.com/a/rakhine-education-myanmar-military-coup/5787670.html