မလေးရှားရောက် မြန်မာနိုင်ငံသား ၁၀၀ ကျော် နေရပ်ပြန်

ထိန်းသိမ်းရေးစခန်းတွေကနေ နေရပ်ပြန်ခွင့်ရတဲ့ မြန်မာများ။ (ဖေဖော်ဝါရီ ၁၅၊ ၂၀၂၁)

မြန်မာနိုင်ငံမှာ စစ်တပ်က အာဏာသိမ်းလိုက်ပြီးနောက် မတည်မငြိမ် အခြေအနေတွေ ကြုံနေရချိန်မှာပဲ မလေးရှားနိုင်ငံမှာ ကိုဗစ်ကပ်ဘေးကာလ ပိတ်မိနေသူ ၁၀၀ ကျော် ဒီကနေ့ နေရပ်ပြန်ခဲ့ကြပါတယ်။ မလေးရှားနိုင်ငံက ထိန်းသိမ်းရေး စခန်းတွေမှာ လွတ်ရက်ပြည့်နေတဲ့ သူတွေအပါအဝင် မြန်မာနိုင်ငံသားတွေ မြန်မာသံရုံးအစီအစဉ်နဲ့ နေရပ်ပြန်ခွင့်ရခဲ့ကြတာပါ။ အပြည့်အစုံကိုတော့ ဆက်သွယ်စုံစမ်းထားတဲ့ ဗွီအိုအေမြန်မာပိုင်းသတင်းထောက် မအေးအေးမာ ပြောပြပေးမှာပါ။

မလေးရှားနိုင်ငံမှာရှိတဲ့ ထိန်းသိမ်းရေးစခန်းတွေက လွတ်ရက်စေ့နေသူတွေ အပါအဝင် ကပ်ဘေးကာလ ပိတ်မိနေတဲ့ မြန်မာနိုင်ငံသားတွေကို ၁ ပတ် ၃ ကြိမ် နေရပ်ပြန်ဖို့ စီစဉ်ပေးနေရာမှာ ဒီကနေ့ တနင်္လာနေ့မှာလည်း ၁၀၀ ကျော် နေရပ်ပြန်ခွင့်ရခဲ့ကြတာပါ။ ဒီကနေ့ နေရပ်ပြန်သူတွေထဲမှာ ထိန်းသိမ်းရေးစခန်းက ပြန်လွတ်လာသူ အမျိုးသမီးတချို့လည်း ပါဝင်တယ်လို့ မလေးရှားနိုင်ငံအခြေစိုက် မြန်မာလူမှုကူညီရေးအသင်းဥက္ကဋ္ဌ ဦးစန်းဝင်းက ပြောပါတယ်။

“ဒီနေ့ ၅၁ ကြိမ်မြောက်ကယ်ဆယ်ရေးလေယာဉ်မှာတော့ မလေးရှားနိုင်ငံထဲက အကြောင်းအမျိုးမျိုးကြောင့် ထိန်းသိမ်းခံထားရတဲ့ မြန်မာနိုင်ငံသား ၄၀ ပြန်တယ်။ ဒီထဲမှာအမျိုးသမီး ၆ ဦး ပါတယ်။ အားလုံးပေါင်း အကြောင်းအမျိုးမျိုးကြောင့် ကယ်ဆယ်ရေးလေယာဉ်မှာ ပါသွားသူ ၁၇၀ ပါသွားပါတယ်။"

ပြီးခဲ့တဲ့အပတ်ထဲမှာပဲ မြန်မာစစ်အုပ်ချုပ်ရေးကောင်စီက မလေးရှားအစိုးရနဲ့ ညှိနှိုင်းပြီး မလေးရှား ထိန်းသိမ်းရေးစခန်းတွေက မြန်မာတွေကို ရေလမ်းကနေ အစုလိုက်အပြုံလိုက်ပြန်ခေါ်နိုင်ရေး ဆွေးနွေးနေတယ်လို့လည်း ပြောပါတယ်။ ညှိနှိုင်းမှုတွေအဆင်ပြေရင်တော့ ဒီလထဲမှာပဲ ရေကြောင်းခရီးစဉ်နဲ့ ပြန်ခွင့်ရမယ်လို့ ခန့်မှန်းရကြောင်းလည်း ဦးစန်းဝင်းကပြောပါတယ်။

“မလေးရှားမှာ ဒီလထဲမှာ နှစ်နိုင်ငံ လက်ရှိကတော့ ညှိနှိုင်းနေတယ် သိရတယ်။ ညှိနှိုင်းမှုတွေ ရေကြောင်းဖြတ်ကျော်မှုတွေ ညှိနှိုင်းပြီးရင် ဒီလထဲမှာ ပထမဦးဆုံး အသုတ်အနေနဲ့ ရက် ၂၀ ကျော်မှာ ပြန်ပို့မယ်လို့ သိရပါတယ်။ ပြန်ပို့မှာကတော့ လူ ၁,၂၀၀ လောက်လို့ ပြင်ပသတင်းတွေအရ သိရပါတယ်။”

ပြီးခဲ့တဲ့နှစ်တုန်းကတော့ ကပ်ဘေးကာလမှာ မလေးရှားထိန်းသိမ်းရေးစခန်းက ထောင်နဲ့ချီ ရှိတဲ့အကျဉ်းသားတွေ နေရပ်ပြန်ဖို့ရှိပေမဲ့ နိုင်ငံသားမှန်၊ မမှန်စစ်ဆေးနေတာမို့ကြန့်ကြာမှုတွေရှိနေတာပါ။ ဒီနောက်မှာတော့ ပြီးခဲ့တဲ့နှစ်ကုန်ကစပြီး ကယ်ဆယ်ရေးလေယာဉ်တွေမှာ လွတ်ရက်စေ့အကျဉ်းသားတွေကို ထည့်ပေးခဲ့ပြီး နေရပ်ပြန်ခွင့်ပြုခဲ့ပါတယ်။

မအေးအေးမာ/ VOA Burmese

https://burmese.voanews.com/a/malaysia-migrant-back-to-myanmar/5778629.html